Ñwaè' Ruêm 6

1Sèe be ka' làa seekɛ sè'ni? Wà' yi yu enɛ sèe be kù ce gèe buu bbebep tɛ bèe a bo yɛ rbǒŋntee Nyʉ̀ gòr a? 2Àde' yi ba wa' ka' koo mʉcàr. Sèe yu àmbò bgʉ̌ʉ bèe ce àde' buu bbebep ker gee yuu mo' nè sèe ka'. Àde' sèe ker ce gèe buu bbebep à njɛ̌ɛ kɛ? 3Mbò wèe rìŋ weenɛ à m ba à nfè' ce a m bàptir sèe à rlii Jisòs nà, sèe Jisos Krǎis wèe à kweŋgèr àbee a? 4A tuŋ sèe Jisos Krǎis wèe àbee à bàptir ce a m bàptir sèe nà, yi ba enɛ sèe wowèe à kweŋger àbee. A m gèe enɛ sèe wowèe kweŋger àbee tɛ sèe bo koni ryòŋ, gèe ba ŋgěe fi àmbò Jisos Krǎis à m fʉʉ efa rkwe à ŋger Tàr Nyʉ̀, a koni ryòŋ foŋ nà.

5Sèe à ka' ba àbee sèe Jisos Krǎis wèe à li rkwe, banɛ sèe be kè ba àbee sèe wowèe, fʉʉ efa rkwe àmbò e m fʉʉ nà. 6Sèe rìŋ seenɛ à m ba à nfè' ce a m taa Krǎis mbe kìntaa nà, a m taa njɛ̀ɛ ŋwɛ̀ ce sèe à m ba nà mbo foŋ tɛ a bo yʉ yìsèe nděe mbembep, fà dì' sèe bo kèr ba bkwàa nè buu bbebep ka'. 7Yi yu wa'a njobè' ŋwɛ̀ à ka' kwe wɛɛ, banɛ ŋgàŋ à lùŋ efa buu bbebep. 8Yi yu foŋ enɛ àmbò sèe Krǎis wèe à kwe àbee na, sèe à byemi enɛ sèe be cu sèe Krǎis wèe foŋ, 9njobè' sèe rìŋ seenɛ àmbò Nyʉ̀ à m fʉr Krǎis efa rkwe nà, àde' e ker kwe ka'. Rkwe li ker tʉr ŋger mbe yě ndù ka'. 10E m kwe wa'a, a ker kwe ka', tɛ yuu bebep yi ker gèe yuu mo' nè ye ka'. Li rcu ce e ce cu sè'ni na, e ce cu a Nyʉ̀. 11Banɛ wee wèe foŋ à ba yɛ wee mnyor àmbò bèe ce a kweŋger, yuu bebep yi ker ce gèe yuu mo' nè wèe ka', wèe à ce cu sè'ni wèe Nyʉ̀ wèe njobè' wèe Jisos Krǎis wèe yu àbee.

12Banɛ wèe fa mà'shi tɛ yuu bebep yi tʉr ŋger mbendù wee mnyor ce vi be kweŋger, tɛ wèe ce gèe buu bbebep ce wèe ce kòŋ na ka'. 13Wèe fa mà'shi tɛ ŋgʉ̀' mò' efa yè nyor kʉti ba yuu ce wèe be ce gèe buu bbebep àgho ka'. Fa nè yè nyor ba nè Nyʉ̀ àmbò bèe ce a kweŋger, a kʉti btèe. Mà'shi nè tɛ yè nyor wɛɛwɛ ba ba yuu ce Nyʉ̀ be ce gèe mfǎ' myɛɛnì àgho. 14Buu bbebep be kèr tʉr ŋger mbe wěe ndù ka' njobè' wèe ker bii njeptii mncir ka', wèe yu ba njeptii rbǒŋntee Nyʉ̀.

15Sèe be gèe seekɛ sè'ni? Wà' sèe be ce gèe buu bbebep njobè' sèe ker bii njeptii mncir ka', a ba ba njeptii rbǒŋntee Nyʉ̀ a? Àde' yi ba wa' ka' koo mʉcàr. 16Mbò wèe rìŋ enɛ wèe à ka' fa wêe mnyor nè ŋwɛ̀ tɛ wèe bo ce yu'ni nè ŋgàŋ àmbò bkwàa wa'a, banɛ wèe yu bkwàa nè ŋwɛ̀ ce wèe ce yu'ni nè ye anà a? Wèe à ka' fa wêe mnyor à rgèe buu bbebep, wèe ba bkwàa nè buu bbebep, sɛ' efa gho à ba rkwe. Wèe à ka' fa wêe mnyor à rgèe ŋgèe ryu'nì, wèe ba bkwàa nè ŋgèe ryu'nì, sɛ' efa gho yu enɛ wèe be ba byɛɛnì à bsii Nyʉ̀. 17Sèe yoŋshi Nyʉ̀ njobè' wèe ce wèe à m ba bkwàa nè buu bbebep, à m kupse, a yu'ni ba nè ryɛ'nì ce a m yɛ'ni wèe nà nè ye ntee wɛɛwɛ. 18Wèe à lùŋ efa buu bbebep, a ba bkwàa nè ŋgěe yɛɛnì. 19M ce làa àmbo ŋgěe bkwàa tɛ yuu ce m ce làa yi bo ba rara njobè' yi yu tatap nè wèe à rrìŋ buu ca nè bfee vǐ ŋwɛ̀. À m ba entombì wèe à fa wêe mnyor nè buu bbebep, a ce gèe ba bsàrbuu. Banɛ wèe fa wêe mnyor sè'ni na ba nè ŋgěe yɛɛnì, tɛ wèe bo ba bèe Nyʉ̀ ce wèe yu brara.

20À m ba à nfè' ce wèe à m ba bkwàa nè buu bbebep nà, ŋgěe yɛɛnì yi m tʉr yuu mo' à rgèe nè wèe ka'. 21Wèe à m ye ba njɛ̀ɛ sɛ' kɛ efa buu ce rìtu yi ce koo wèe àgho sè'ni na? Sɛ' efa buu anà yu ba rkwe. 22À ka' ba sè'ni na ce wèe à lùŋ efa buu bbebep a ba bkwàa nè Nyʉ̀ na, sɛ' efa gho yu enɛ wèe yu bèe Nyʉ̀ ce wèe yu brara, lò koni ryòŋ ce nfesè. 23Blà' efa buu bbebep yu rkwe, rfa ce Nyʉ̀ ce fa nè bèe à cicì à ba ryòŋ ce nfesè ce sèe à koni njobè' sèe yu àbee sèe Jisos Krǎis ce e yu Tata nè sèe.

Currently Selected:

Ñwaè' Ruêm 6: LNT

Highlight

Copy