Ñwaè' Ruêm 9

1M ce làa ba yuu mini à rlii Krâis. M ce nya' mnde' ka'. Ya ntee ce Yʉ' Rara yi yu njo yi tɛɛ yà njìnsa' enɛ, 2m ce koosimnse sê, ntee yi ce yaŋ mɛ̀ à nfè' wɛɛwɛ, 3nè yà bèe ce a yu bfʉr wa seesê, wèr wowèe à ba lɛɛ e mo'sir. M ce kòŋ mɛnɛ ndòo co' mɛ̀, tɛ wèr Jisos Krǎis gapni, ce yi ka' ba enɛ ŋgàpni anà yi be jà' yà bèe. 4Wowèe a yu bèe Isrɛ̀l. Nyʉ̀ à m gèe wowèe a bo ba boo vi, a fa yi fòo nè wowèe. E m ye lè' a wowèe, a fa wowèe mncir. E m suŋ wowèe àmbò àde' wowèe a gee rloo. E m gèe mi mkà'ni ba nè wowèe. 5Wowèe a yu bèe embe ndʉ̀' Abràham ba Aisìk ba Jakòp. A m bi Krǎis à ŋwɛ̀ embe ndʉ̀' anà, e ba Nyʉ̀ ce e tʉr ŋger mbendù buu wɛɛwɛ. Sèe yoŋshi ye à nfè' sìp. Yi yu wa'a.

6Wà' yi yɛɛti enɛ yuu ce Nyʉ̀ à m kà' nè bèe Isrɛ̀l yi buu efa rgèetì a? Yi yu wa' ka'. Bèe wɛɛwɛ embe ndʉ̀' Isrɛ̀l a yu bèe Isrɛ̀l ka'. 7Yi yu foŋ enɛ bèe wɛɛwɛ a yu boo Abràham njobè' wowèe a yu bèe embe ndʉ̀' Abràham ka'. Nyʉ̀ à m làa nè Abràham enɛ̂, “Boo ce a be lɛ̀ lo rlii be ba boo Aisìk.” 8Cena yi ce dùŋshi enɛ yu boo wɛɛwɛ ce Abràham à m bi ce a yu boo Nyʉ̀ ka'; yu ba boo ce a m bi njo' mŋkà'ni ce Nyʉ̀ à m gèe nè Abràham ce a ce bè' à boo Abràhâm. 9Nyʉ̀ à m gèe mŋkà'ni anà, a laa enɛ̂, “Nfè' be ghɛɛ tɛ m kʉti; tɛ Sɛ̀ra bi muu mbaŋrù.” 10Yi ku ba ba wa' cà'cà' ka'. Boo Rɛ̀bɛkà a m tʉr tàr mò'sir ce e yu yìsèe ta Aisìk. 11-12Ka' yi yu wa'a, à m ba à nfè' ce boo anà a m ku bii njep rbʉ̀, a ke' be gèe yuu bbebep kɛ̀ yuu bòŋboŋ ka', Nyʉ̀ à laa nè Rɛ̀bɛkà enɛ̂, “Nlee be fà' nè Ŋkɛ'.” Nyʉ̀ à m gèe wa' tɛ yi bo ba enɛ à ce ba ye a ce mò' efa boo ca àmbò e m kwà'shi, à ke' ba ba njobè' yuu mo' ce ŋwɛ̀ anà à m gèe ka', à m ba njobè' à m kɛ̀' ba Nyʉ̀. 13Yi ku ba àmbò a saŋ mbe Ŋwǎ' Nyʉ̀ enɛ̂, “Mɛ̀ m kòŋ Jakòp a baa Ɛsò.” nà.

14Banɛ sèe be làa seekɛ? Wà' sèe be làa seenɛ Nyʉ̀ à m gèe yuu mini ka' a? Àde' yi ba wa' ka' koo mʉcàr. 15Nyʉ̀ à m làa nè Musìs enɛ̂, “M be koosimnse nè ŋwɛ̀ ce mɛ̀ kòŋ. Be kwà'shi ba mɛ̀ ŋwɛ̀ ce m be gèe bòŋboŋ nè ye.” 16Banɛ yi yu enɛ Nyʉ̀ e ke ce ŋwɛ̀ ba àmbò ŋwɛ̀ ce kòŋ kɛ̀ njo' yuu ce ŋwɛ̀ à gèe ka'. E ke ce ba njo' yì ŋkoosimnse cà'cà'. 17Nyʉ̀ à m làa nè Fɛrò mbe yě ŋwà' enɛ̂, “Mɛ̀ ko'si wɛ̀ mbe kʉʉ, tɛ m bo dùŋshi ya ŋger njì enjep wɛ̀, tɛ la rlii li bo yu'ti à ŋgòŋ wɛɛwɛ.” 18Banɛ Nyʉ̀ e ke koosimnse nè ŋwɛ̀ ce e kòŋ à rkoosimnse nè ye, ker teesi tu ese ŋwɛ̀ ce e kòŋ à rtèesi tu ese ye.

19Seemò' ŋwɛ̀ mò' efa wěe mʉ be làa nè mɛ̀ enɛ̂, “Yi ka' ba wa'a, Nyʉ̀ à ka' ce tàa ŋwɛ̀ njokɛ, àmbò yi yu ba enɛ àde' ŋwɛ̀ kanì efa rgèe yuu ce Nyʉ̀ ce kòŋ enɛ ŋgàŋ gee ka' na?” 20Wɛ̀ ce à ku ba ba ŋwɛ̀, à yu nda ka' bèesi cùu wèe Nyʉ̀? Àde' rkìŋ li laa nè ŋwɛ̀ ce e boo li enɛ̂, “Wɛ̀ boo mɛ̀ wa'a njokɛ” a? 21Àde' ŋwɛ̀ mboo mkìŋ lor mboo, gee yuu ce e kòŋ àgho. Àde' e lor mboo embe dǐ' mo'sir boo mkìŋ àgho mmbaa, rmo' li boŋ du misî, rmo' li ku ba ba à rkìŋ.

22Yi ka' ba enɛ Nyʉ̀ à m ce kòŋ à rdùŋshi li rshentee, gèe tɛ bèe a bo yɛ yi ŋger, a lo a kur ba ntee nè bèe ce a m gèe ntee yi bep ye, à ba bèe ce yi m ba enɛ e be yʉshi wowèe nà, 23banɛ e m gèe wa'a tɛ e bo dùŋshi rbòŋ efa yi fòo nè bèe ce e m ce koosimnse nè wowèe, à ba bèe ce e m kupshi tɛ wowèe a bo koni fòo anà nà. 24A sèe bèe ce Nyʉ̀ à kɛ' enɛ a ba yì bèe anà. E ku kɛ' bèe ba efa mʉ̀ Jus ka', e kɛ' bèe enje jɛɛ foŋ. 25Nyʉ̀ à làa mbe ŋwǎ' Hòsiyà enɛ̂,

“Bèe ce a m ba yà bèe ka',

m be too wowèe enɛ yà bèe.

M be too to' ce mɛ̀ m kòŋ ka' enɛ ya to' ce m kòŋ sê.” 26E ker laa foŋ enɛ̂,

“Mbe dì' ce a m làa nè wowèe enɛ, ‘wèe yu yà bee ka'’,

ku ba mbe dì' anà ce a be too wowèe enɛ boo Nyʉ̀ ce e yu ntèe.”

27À ka' ba yi àmbò bèe Isrɛ̀l, Àsayà à m làa yuu a kuu wowèe. E m làa enɛ̂, “Ka' bèe Isrɛ̀l a yu gòr àmbò nsaruŋ àwǎa rò wa'a, ku ba bèe mʉcàr efa wǎp mʉ ce a be lùŋ.” 28Tata be càasi nfè' ka', e be sa' mnsa' ŋgòŋ, teni. 29Yi ku ba àmbò Àsayà à m làa foŋ enɛ̂, “Tata Nyʉ̀ ce e tʉr ŋger mbendù buu wɛɛwɛ à m ka' tɛ bà mà'shi boo mò' nè sèe ka', sèe à m ba ba àmbò rla' Sodòm ba rla' Gòmorà.” wa'a.

30Cena yi yu ba enɛ kɛ? Yi yu enɛ bèe enje jɛɛ ce a m ce ghèter à rba byɛɛnì à bsii Nyʉ̀ ka', a yu sè'ni byɛɛnì njobè' lap rbyemì. 31Bèe Isrɛ̀l ce a m ce ròo yap à rba byɛɛnì njo' mncir ce a m ce lɛ̀, a m mòo làr. 32Wowèe a m mòo làr njokɛ? À m ba njobè' wowèe a m ghèter à rba byɛɛnì njo' mfà', ke' ba ba njo' rbyemì ka'. Wowèe a m kote à lùr, 33ce Ŋwǎ' Nyʉ̀ yi làa àgho nà. Yi làa enɛ̂,

“Yɛ̂, m ce lɛ̀ lùr à rla' Sayòn,

ce e be gèe tɛ bèe a kote.

Lùr anà be gèe tɛ wowèe a gweŋger.

Ŋwɛ̀ ce e ka' byemi nè ye, m ke coosi ŋgàŋ ka'.”

Currently Selected:

Ñwaè' Ruêm 9: LNT

Highlight

Copy