Ñwaè' Ruêm 10

1Bfʉr wâ, m ce kòŋ nè ya ntee-ŋwɛ̀, a ker ce loo nè Nyʉ̀ enɛ bèe Isrɛ̀l a lûŋ. 2Mɛ̀ rìŋ mɛnɛ wowèe a lɛ̀ ntee à rdù àmbùu Nyʉ̀, a ke' riŋ njǐ mini ka'. 3Wowèe a m rìŋ njɛ̀ɛ njì ce Nyʉ̀ e ke gèe bèe a ba byɛɛnì ka', a ce ghèter à rròo ba nduunjì yap à rba byɛɛnì, a kani yap yu njì yì Nyʉ̀. 4Krǎis à m vʉ̀, rfà' efa mncir li mî, tɛ ŋwɛ̀ wɛɛwɛ ce e byemi nè ye bo ba yɛɛnì à bsii Nyʉ̀.

5Musìs à m saŋ àmbò àde' ŋwɛ̀ ba yɛɛnì njo' mncir, a laa enɛ̂, “Ŋwɛ̀ ce e ka' lɛ mncir wɛɛwɛ banɛ ŋgàŋ be cu njo' mncir anà.” 6À ka' ba àmbò njì ce àde' ŋwɛ̀ ba yɛɛnì njo' rbyemì, e laa enɛ̂, “Fa làa njep wɛ̌ ntee enɛ̂, ‘Àde' ko' nda mbe bùu lɛ?’ ka' (ce yi yu enɛ, Be sùu nda nè Krǎis embe bùu lɛ?). 7Fa làa njep wɛ̌ ntee enɛ̂, ‘Àde' ŋwɛ̀ du mbà yir lɛ?’ ka'” (ce yi yu enɛ be vʉ̀ nda nè Krǎis embà yir? lɛ). 8Ŋwǎ' Nyʉ̀ yi làa enɛ kɛ? Yi làa ba enɛ̂, “Blǎa Nyʉ̀ vi yu àtʉtʉ nè wɛ̀; vi yu ku wɛ̌ cùu, a ba njep wɛ̌ ntee.” Blàa anà yu blàa ce vi ce suŋ àmbò rbyemì ce wèr ce fè'shi. 9Wɛ̀ ka' làa eku wɛ̌ cùu enɛ Jisos yu Tatâ, byemi enjep wɛ̌ ntee enɛ Nyʉ̀ à m fʉr ye efa rkwe, banɛ à be lùŋ. 10Ŋwɛ̀ e ke byemi ba enjep ntee ka' ba yɛɛnì à bsii Nyʉ̀, e ke làa ba ekù cùu ka' lûŋ. 11Ŋwǎ' Nyʉ̀ yi làa enɛ̂, “Ŋwɛ̀ wɛɛwɛ ce e ka' byemi nè ye, banɛ e be coosi ŋgàŋ ka'.” 12Jus a ker ba jɛɛ efa bèe enje jɛɛ ka'. Krǎis yu Tata nè wowèe wɛɛwɛ. E ke ghòni ŋwɛ̀ wɛɛwɛ ce e ka' war nè ye. 13Yi ku ba àmbò a saŋ enɛ̂, “Ŋwɛ̀ wɛɛwɛ ce e ka' war à rlii Tatâ, banɛ ŋgàŋ be lùŋ” nà.

14Banɛ àde' bèe a war nè ye à njɛ̌ɛ kɛ ce wowèe a ka' tɛ byemi nè ye ka'? Àde' wowèe a byemì nè ye à njɛ̌ɛ kɛ ce wowèe a ka' tɛ yu' àmbò ye ka'? Àde' wowèe a yu' àmbò ye à njɛ̌ɛ kɛ ce ŋwɛ̀ à ka' tɛ fè'shi nè wowèe ka'? 15Àde' bèe a du fe'shi à njɛ̌ɛ kɛ ce a ka' tɛ tuu wowèe ka'? Yi ku ba àmbò a saŋ mbe Ŋwǎ' Nyʉ̀. A saŋ mbo enɛ̂, “Mkùu bèe ce a vʉ̀ a ce fè'shi Nsuŋ Mbòŋmboŋ mi bòŋ àmbò kɛ wa'a!”

16Ka' yi yu wa'a, bèe wɛɛwɛ a byemi Nsuŋ Mbòŋmboŋ ca ka'. Àsayà à m làa enɛ̂, “Tatâ, ŋwɛ̀ mò' yu ce e byemi yuu ce wèr à làa ka'.” 17Banɛ yi yu enɛ bèe a ke yu' wɛɛ ka' byemi; bèe a fè'shi àmbò Krǎis wɛɛ, bèe a ka' yu'.

18M ce bipshi mɛnɛ wowèe a m yu' nsuŋ ca ka' lɛ? Yi yu mini wa' ka'. Yi yu enɛ̂,

“Bèe a yu' yàp njèndoŋ à bdì' wɛɛwɛ enjep ŋgòŋ.

Wap blàa vi bà' à mmbuu ŋgòŋ wɛɛwɛ.”

19M ker ce bipshi mɛnɛ bèe Isrɛ̀l a m rìŋ ka' lɛ? M be bèesi nè yuu ce Musìs à m saŋ elǔuŋgòŋ. E m saŋ yuu ce Nyʉ̀ à m làa, enɛ̂,

“M be gèe tɛ wèe ko'ndoŋ nè bèe ce a ghɛɛte à to' ka'.

M be gèe tɛ ntee yi bep wèe nè to' ce yi rìŋ yuu ka'.” 20Àsayà ye ye à m raasi sê, a saŋ yuu ce Nyʉ̀ à m làa enɛ̂,

“Bèe ce a m ce ròo mɛ̀ ka', a yɛ mɛ̀.

Mɛ̀ dùŋshi yà nyor nè bèe ce a m ce bipshi enɛ m yu fɛ lɛ ka'.”

21À ka' ba àmbò bèe Isrɛ̀l, Àsayà à m saŋ yuu ce Nyʉ̀ à m làa enɛ̂, “Mɛ̀ mà' ma mmbo nè yà bèe, kɛ̌' à ŋgàptʉ' du ba' à mbùuŋkùr, wowèe a tee btu, a yu'ni nè mɛ̀ ka'.”

Currently Selected:

Ñwaè' Ruêm 10: LNT

Highlight

Copy