Ñwaè' Ruêm 11

1M be kèr bipshi yuu mo'. Wà' Nyʉ̀ à mà' yì bèe a? Àde' yi ba wa' ka' koo mʉcàr. Mɛ mɛ̀ yu mò' efa bèe Isrɛ̀l. M yu ŋwɛ̀ embe ndʉ̀' Abràhâm, a ba ŋwɛ̀ embe ntɛ̀' Bɛnjamɛ̀n. 2Nyʉ̀ à mà' yì bèe ce e m ce efa rkɛ̀' ka'. Mbò wèe rìŋ yuu ce a m saŋ mbe Ŋwǎ' Nyʉ̀ àmbò Àlajà nà a? À m ba mbe nfè' mò', e laa bebep àmbò bèe Isrɛ̀l nè Nyʉ̀. 3E m làa enɛ̂, “Tatâ, bèe ca a yʉshi yo ŋgǎa ntuu, a kɛɛshi wo bdǐ' ntòo mfa, à ku bɛti mɛ̀. Wowèe a ce ròo à ryʉ mɛ̀.” 4Nyʉ̀ à beesì nè ye enɛ kɛ? E m bèesi enɛ̂, “Mɛ̀ bɛr yà bèe ncʉ̀kì sàambâ, ce wowèe a loo nè Baal ka'.” 5Yi ku ba wa' foŋ sè'ni na. Mʉ bèe mò' a ku ba à mʉ̀ bèe Isrɛ̀l ce Nyʉ̀ à ce njo' yi ntee bòŋboŋ. 6Yi ka' ba enɛ Nyʉ̀ à ce wowèe njo' yi ntee bòŋboŋ banɛ e ce wowèe ba njo' yuu mo' ce wowèe a gèe ka'. E m ka' ba ce wowèe ba njo' yuu mo' ce wowèe a m gèe, yi ntee bòŋboŋ anà à m ba ba ntee bòŋboŋ ghup ka'.

7Yuu m ce làa yi yu ba enɛ kɛ? Yi yu enɛ bèe Isrɛ̀l wɛɛwɛ a m koni yuu ce a m ce ròo ese Nyʉ̀ ka'. Mʉ bèe ce Nyʉ̀ à m ce nà a bèe ce a m koni yuu anà. Nyʉ̀ à m gèe bɛr bèe a cip btù'. 8Yi ku ba àmbò a saŋ mbe Ŋwǎ' Nyʉ̀. A saŋ mbo enɛ̂, “Nyʉ̀ à m gèe wowèe a mɛŋnì buu, a ce yɛ buu ka', a ker ce yu' buu ka', caar ba' ntìni na.” 9Dɛvìd ye ye à m làa enɛ̂,

“Gèe tɛ yuu ce wowèe a ce yu' rbòŋ àgho nà,

yi kʉti ba taa ce yi be koo wowèe.

Gèe tɛ wowèe a taŋte, kèr kote à yuu anà,

yɛ ŋgɛ' njo' yap yuu ce a gèe anà.

10Gèe tɛ wowèe a fâp,

fà dì' wowèe a bo kèr yɛ buu ka'.

Gʉʉ wap mnjì nfesè.”

11Wà' cena yi yu enɛ wowèe a m kote tɛ wowèe a bo gwè kèr nàti ka' a? Àde' yi ba wa' ka' koo mʉcàr. À ka' ba njobè' wowèe a m gèe yuu bebep, Nyʉ̀ à fa fɛŋ nè bèe enje jɛɛ tɛ wowèe a bo lùŋ, tɛ bèe Isrɛ̀l a ko'ndoŋ nè wowèe. 12Ka' ba enɛ yuu bebep ce wowèe a m gèe nà à m kʉti ba bghònì nè ŋgòŋ, rgwè ce wowèe a m gwè nà à kʉtì ba bghònì nè bèe enje jɛɛ, banɛ bghònì ce sèe be kè koni à nfè' ce Jus wɛɛwɛ a yu'ni nè Nyʉ̀ foŋ nà, vi be kè ba magòr àmbò kɛ?

13M ce làa sè'ni na ba nè wèe ce wèe yu ye bèe enje jɛɛ. M yu ŋwɛ̀ ntuu ba nè bèe enje jɛɛ. M ce lòr la rfà' ca à mcɛ̌r ka', 14tɛ m bo yɛ mɛnɛ àde' m gee yà bèe à ko'ndoŋ tɛ bèe mo' efa wowèe a bo lùŋ lɛ. 15Nyʉ̀ à m ka' ma' wowèe, bɛr bèe enjep ŋgòŋ a konì fɛŋ à rkʉti àbee a Nyʉ̀ wèe, banɛ yi be ba à njɛ̌ɛ kɛ à nfè' ce Nyʉ̀ à ka' koo wowèe à yì bèe? Yi be ba àmbò bèe ce a kweŋger a kʉti lɛ btèe wa'a. 16Ŋwɛ̀ à ka' top mkʉ̌ŋ brɛ̂d, too brɛ̌d yì entòmbì fa nè Nyʉ̀, banɛ brɛ̌d wɛɛwɛ ce e be tòo efa mkʉ̀ŋ anà yu yǐ Nyʉ̀. Mŋgǎŋ ce ka' ba vi Nyʉ̀, banɛ mmba' ce yu vi foŋ. 17Yi ka' ba enɛ a m fàrshi mmba' mo' efa ce Olèf ce a m byè à mŋkʉ̀, a lor wèe ce wèe yu ye mmba' ce Olèf ce à rìŋ a bar nje ce Olèf ce à mŋkʉ̀, wèe à ce kù' nè mdip enje nyòr ce anà, 18banɛ wèe fa nàa tu enɛ wèe à càa mmba' ce ce a m fàrshi efa Olèf ce à mŋkʉ̀ nà ka'. Wèe à ka' ce nàa nyor, wèe kuushi enɛ yu ba wèe ce wèe ce gèe mŋgǎŋ ce vi ce kù' ka', yu ba mŋgǎŋ ce ce vi gèe wèe à ka' ce kù'.

19Seemò' à be ce nàa tu enɛ̂, “A m fàrshi mmba' mo' tɛ a bo bar mɛ̀ njo.” 20Yi yu mini wa'a. A m fàrshi wowèe njobè' wowèe a m byemi ka'. Wèe yu ŋgʉ̀' mò' efa ce anà njo' le rbyemì cà'cà'. Banɛ wèe fa nàa tu ka', wèe lor nfè'. 21Nyʉ̀ à m ka' tɛ koosimnse efa rfàrshi mmba' ce mo' efa ce Olèf yǐ à mŋkʉ̀ ka', banɛ e be koosimnse efa rfàrshi wèe foŋ ka'. 22Yɛ ka nè àmbò Nyʉ̀ ce gèe ŋgěe bòŋboŋ nè bèe mo', a ker ce jar nè bèe mò'. E ce jar nè bèe ce a gwè, a ce gèe ŋgěe bòŋboŋ nè wèe, ce wèe à ka' ku ce jɛ̀r ba njep yi nduunjì. Yi ka' tɛ ba wa' ka' banɛ e be fàr wèe foŋ. 23Bèe anà foŋ a ka' kupse byemi, banɛ Nyʉ̀ be bar wowèe nje ce ca. E tʉr ŋger à rgèe wa'a. 24E m lòr wèe ce wèe yu mmba' ce Olèf efa rìŋ, a bar nje ce Olèf yǐ à mŋkʉ̀, ce yi ke ba wa'a ka', banɛ nè mini-ŋwɛ̀, e tʉr ŋger à rlòr mmba' ce vǐ à mŋkʉ̀ ce a m fàrshi nà, bar nje ce anà.

25Bfʉr wâ, m ce kòŋ mɛnɛ wèe riŋ yuu ce bèe a m be riŋ ka', fà dì' wèe bo ce kwà'shi enɛ wèe tʉr bfee se ka'. Yi yu enɛ bèe Isrɛ̀l a be kù cip btù' nfesè ka'. A be kù cip btù' caar dù bà' à nfè' ce bèe wɛɛwɛ efa mʉ̀ bèe enje jɛɛ ce a ba byemi, a byemi nà. 26Ca yi be kè koni, tɛ bèe Isrɛ̀l wɛɛwɛ a lûŋ. A saŋ mbe Ŋwǎ' Nyʉ̀ enɛ̂,

“Ŋwɛ̀ ce e be fʉr bèe efa ŋgɛ' be vʉ̀ efa rla' Sayòn,

fʉr ŋgěe bebep embe ndʉ̀' Jakòp.

27Be ba à nfè' ce mɛ̀ siŋsi yàp buu bbebep,

tɛ yi ba enɛ mɛ̀ gèe yuu ce mɛ̀ m ye lè' mɛnɛ m be gèe nà.”

28Bèe Isrɛ̀l a yu ŋgǎa bbàa nè Nyʉ̀ njobè' wowèe a kani Nsuŋ Mbòŋmboŋ. Cena yu sɛ' nè wèe ce wèe yu bèe enje jɛɛ. Ka' yi yu wa'a, e m ce wowèe a ku bii kòŋ wowèe njobè' wap btâ. 29Nyʉ̀ à ka' ce bèe, ker ghoni wowèe, àde' e ker kupse yi ntee ka'. 30À m ba entòmbì, wèe à tee btu nè Nyʉ̀, à ka' ba sè'ni, Nyʉ̀ à koosìmnse nè wèe njobè' ntèetu bèe Isrɛ̀l. 31Wowo foŋ a tèe btu nè Nyʉ̀ sè'ni na tɛ Nyʉ̀ bo koosimnse nè wèe, kèr koosimnse nè wowèe foŋ. 32Yi yu enɛ Nyʉ̀ à fa bèe wɛɛwɛ à shaŋ ntèetu, tɛ e bo koosimnse nè wowèe wɛɛwɛ.

33Yɛ àmbò Nyʉ̀ yu ŋwɛ̌ ŋgòr nà! Yɛ àmbò e rìŋ buu, a tʉr bfee se nà! Àde' ŋwɛ̀ riŋ àmbò Nyʉ̀ ce kwà'shi ka'. Àde' ŋwɛ̀ riŋ àmbò Nyʉ̀ ce gèe yì buu ka'. 34A saŋ mbe Ŋwǎ' Nyʉ̀ enɛ̂,

“Ŋwɛ̀ ce e rìŋ àmbò Tata e ke kwà'shi yu nda?

Ŋwɛ̀ ce àde' e cep ye yu nda?”

35“Ŋwɛ̀ ce e m be fa Nyʉ̀ yuu tɛ Nyʉ̀ bo là' yuu ce e m fa nè ye anà yu nda?”

36Buu wɛɛwɛ à m lò ese Nyʉ̀, buu anà wɛɛwɛ à ba àgho njo' ye, buu wɛɛwɛ à ba yì buu. Tɛ bèe a ku'si ye nfè' sìp! Yi yu wa'a.

Currently Selected:

Ñwaè' Ruêm 11: LNT

Highlight

Copy