ᒉᓂᓯᔅ 27

ᒉᑲᑉ ᑮᑲᑲᔦᔑᐋᒡ ᐅᑌᑌᓐ

1ᐁᑮ ᐊᓂ ᐊᔨᔑᓭᓂᒃ ᑕᔥ ᐋᐃᓯᒃ Isaac ᐐᑫ ᑮᐊᑭᐌᓰᐎ, ᑳᐐᓐ ᑲᔦ ᐋᐱᒋ ᑮᐙᐱᓰ᙮ ᐅᑮ ᐊᑐᒫᓐ ᐅᑯᓯᓴᓐ ᐄᔂᓐ Esau ᐁᑮᐃᓈᒡ, ᐄᔂ᙮

ᒦᑕᔥ ᑳᐃᔑ ᓇᑴᑖᑯᒡ, ᐅᐅᒫ ᓂᑕᔮ, ᐅᑮᐃᑰᓐ᙮

2ᐋᐃᓯᒃ ᑮᐃᑭᑐ, ᐃᓇᔥᑫ, ᐋᔕ ᐐᑫ ᓂᑕᑭᐌᓰᐤ, ᑳᐐᓐ ᓂᑭᑫᑕᓰᓐ ᐋᓃᓐ ᐊᐲ ᑮᔑᑲᒃ ᑫᓂᐳᔮᓐ᙮ 3ᑕᑲ ᓅᑯᒻ ᒫᒌᔥ ᑭᒥᑎᒀᑉ, ᑭᐱᑾᑰᓐ ᑲᔦ ᒌᔖᔭᓐ ᐱᑾᑕᑲᒥᒃ ᒋᐊᑕᐌᒋᑫᑕᒪᐎᔭᓐ᙮ 4ᑮᔑᑌᐴᓂᔒᑲᓐ ᑕᔥ ᑲᔦ ᑳᒥᓄᐱᑕᒫᓐ ᒦᒋᒻ, ᐲᑕᒪᐎᔒᑲᓐ ᐃᑕᔥ᙮ ᐊᐲ ᑕᔥ ᑮᐃᔥᒀ ᒦᒋᔮᓐ, ᑭᑲ ᒦᓂᓐ ᑕᔥ ᐃᐃ ᐃᔥᒀᒡ ᑳᐐ ᐃᔑ ᔕᐌᓂᒥᓈᓐ ᒋᑆ ᓂᐳᔮᓐ, ᐅᑮᐃᓈᓐ᙮

5ᐅᕒᐃᐯᑲ Rebekah ᑕᔥ ᐅᑮ ᐱᓯᑕᐙᓐ ᐋᐃᓯᑰᓐ ᐁᑲᑲᓅᓈᓂᒡ ᐄᔂᓐ᙮ ᐊᐲ ᑕᔥ ᑳᐊᓂ ᒫᒑᓂᒡ ᐄᔂᓐ ᐱᑾᑕᑲᒥᒃ ᐁᑮ ᐃᔖᓂᒡ ᐁᐊᑕᐌᒋᑫᓂᒡ, 6ᐅᕒᐃᐯᑲ ᐅᑮᐃᓈᓐ ᐅᑯᓯᓴᓐ ᒉᑲᐴᓐ Jacob, ᐃᓇᔥᑫ, ᓂᑮ ᓅᑕᐙ ᑭᑌᑌ ᐁᑲᑲᓅᓈᒡ ᑭᓴᔦᓴᓐ ᐄᔂᓐ᙮ ᒦᑕᔥ ᐅᐅ ᑳᐃᓈᒡ, 7ᐲᑕᒪᐎᔑᓐ ᐊᔭᐋᐎᔥ ᒋᑮᔑᑌᐴᔑᔭᓐ ᒦᒋᒻ ᑳᒥᓄᐱᑕᒫᓐ, ᒋᒦᒋᔮᓐ᙮ ᓂᑲ ᑲᑴᒋᒫ ᑕᔥ ᑳᑎᐯᒋᑫᒡ ᒋᔕᐌᓂᒥᒃ ᐁᓈᓴᒦᒡ ᒋᑆ ᓂᐳᔮᓐ, ᐅᑮᐃᓈᓐ᙮ 8ᐅᕒᐃᐯᑲ ᑕᔥ ᑮᐊᓂ ᐃᑭᑐ, ᓂᑯᓯᔅ, ᐱᓯᑕᐎᔑᓐ, ᐃᔑᒋᑫᓐ ᑲᔦ ᑳᐐᐃᓂᓈᓐ᙮ 9ᐃᔖᓐ ᐌᑎ ᑳᔑ ᐅᑯ ᐊᔮᐙᒡ ᒫᓇᑎᑾᒃ, ᑲᑮᑭᓐ ᑕᔥ ᓃᔑᓐ ᒫᓇᑎᑰᓴᒃ ᑳᐋᒋᐳᐙᒡ, ᐲᑕᒪᐎᔒᑲᓐ ᐃᑕᔥ᙮ ᓂᑲ ᐅᔑᑖᐙᓐ ᑕᔥ ᐃᐃ ᒦᒋᒻ ᑭᑌᑌ ᑳᒥᓄᐱᑕᕽ᙮ 10ᐃᔑᐎᑕᐙᑲᓐ ᑕᔥ ᑭᑌᑌ ᐃᐃ ᒦᒋᒻ, ᒋᑲᑴᒋᒫᒡ ᑭᔐᒪᓂᑑᓐ ᒋᔕᐌᓂᒥᒃ ᒋᑆ ᐃᔥᒀ ᐱᒫᑎᓯᒡ, ᑮᐃᑭᑐ᙮

11ᒉᑲᑉ ᑕᔥ ᐅᑮᐃᓈᓐ ᐅᒫᒫᓐ, ᐃᓇᔥᑫ, ᑭᑭᑫᓂᒫ ᐄᑐᒃ ᐄᔂ ᐁᒦᔖᑯᓇᐌᒡ, ᓃᓐ ᑕᔥ ᐁᒦᔑᓯᓯᐙᓐ᙮ 12ᑫᒋᓈᒡ ᐄᑐᒃ ᓂᑲ ᑯᑎᓂᒃ ᓂᑌᑌ᙮ ᐃᓇᔥᑫ ᑕᔥ ᐅᑲᔦᔑᑫᔥᒃ ᓂᑲ ᐃᔑᓈᑯᓯᐙᓐ ᐁᓈᓴᒦᒡ᙮ ᒪᒐᑭᒥᑰᐎᓐ ᓴ ᓂᑲ ᑲᔥᑭᑕᒫᔅ, ᑳᐐᓐ ᐐᓐ ᔕᐌᑖᑯᓯᐎᓐ, ᑮᐃᑭᑐ᙮

13ᐅᒫᒫᓐ ᑕᔥ ᐅᐅ ᐅᑮᐃᑰᓐ, ᓂᑯᓯᔅ, ᑕᑲ ᑫᔑ ᒪᒐᑭᒥᑰᔭᓐ ᓃᓐ ᓂᑲ ᐸᑲᒥᔥᑳᑯᓐ᙮ ᐃᔑᒋᑫᓐ ᑕᔥ ᑳᐃᓂᓈᓐ, ᒫᒑᓐ, ᓈᓯᑲᒪᐎᔑᓐ ᐃᑭ ᒫᓇᑎᑰᓴᒃ, ᐅᑮᐃᑰᓐ᙮ 14ᒉᑲᑉ ᑕᔥ ᑮᐊᓂ ᒫᒑ ᐁᑮ ᓈᓯᑲᐙᒡ ᒫᓇᑎᑰᓴᐞ ᐁᑮ ᐲᑕᒪᐙᒡ ᐅᒫᒫᓐ, ᒋᐅᔑᑑᓂᒡ ᒦᒋᒻ ᑳᑮ ᒥᓄᐱᑕᒥᓂᒡ ᐅᑌᑌᓐ᙮ 15ᐅᕒᐃᐯᑲ ᑕᔥ ᐅᑮ ᐅᑖᐱᓈᓇᓐ ᐅᑭᑭᔥᑭᑲᓂᓂ ᐄᔂᓐ ᑳᑮ ᓴᓰᑭᓯᓂᒡ ᐅᑯᓯᓴᓐ, ᑳᑮ ᐊᔮᓂᑭᓐ ᐅᐙᑳᐃᑲᓂᕽ᙮ ᒦᑕᔥ ᑳᐃᔑ ᐱᓯᑲᒨᓈᒡ ᒉᑲᐴᓐ ᐅᑯᓯᓴᓐ ᑳᑮ ᐅᔒᒣᔑᒫᐎᓂᒡ᙮ 16ᐅᑮ ᐱᓯᑲᒨᓈᓐ ᑕᔥ ᑲᔦ ᐅᓂᑭᓂᕽ ᒫᓇᑎᑰᓯᐗᔮᓇᐞ ᒋᒦᔖᑯᓂᑫᓂᒡ᙮ ᐅᑴᑲᓂᓃᕽ ᑲᔦ ᑳᑮ ᐃᔑ ᒦᔑᓯᓯᓂᒃ ᐅᑮ ᐊᑕᒪᐙᓐ ᒫᓇᑎᑰᓯᐗᔮᓇᐞ᙮ 17ᐅᑮ ᒦᓈᓐ ᑕᔥ ᑲᔦ ᐅᑯᓯᓴᓐ ᒉᑲᐴᓐ ᑳᑮ ᒥᓄᐱᑾᓂᓂᒃ ᒦᒋᒻ ᑳᑮ ᐅᔑᑑᒡ, ᐸᑴᔑᑲᓇᓐ ᑲᔦ ᐅᑮ ᑕᑯ ᒦᓈᓐ᙮

18ᒉᑲᑉ ᑕᔥ ᐅᑮ ᐱ ᓈᓯᑲᐙᓐ ᐋᐃᓯᑰᓐ ᐅᑌᑌᓐ ᐁᑮᐃᓈᒡ, ᓂᑌᑌ᙮

ᐅᐅ ᑕᔥ ᐅᑮᐃᑰᓐ, ᑭᓅᑕᐎᓐ, ᐊᐌᓀᓐ ᐊᐊ ᒪᔮ ᓂᑯᓯᔅ ᐁᔮᐎᔭᓐ? ᑮᐃᑭᑐᐗᓐ᙮

19ᒉᑲᑉ ᑕᔥ ᐅᑮ ᐃᔑ ᓇᑴᑕᐙᓐ, ᓃᓐ ᐄᔂ ᑳᓴᓰᑭᓯᒡ ᑭᑯᓯᔅ᙮ ᓂᑮ ᐃᔑᒋᑫ ᑕᔥ ᑳᑮ ᐃᔑ ᐊᓅᔑᔭᓐ᙮ ᐸᓯᑸᓐ ᐃᑕᔥ, ᒋᐅᓇᐱᔭᓐ ᒋᒦᒋᔭᓐ ᐅᐅ ᑳᑮ ᓂᑑᔮᓐ, ᑮᓐ ᓴ ᒋᔕᐌᓂᒥᔭᓐ, ᐅᑮᐃᓈᓐ᙮

20ᐋᐃᓯᒃ Isaac ᑕᔥ ᐅᑮᐃᓈᓐ ᐅᑯᓯᓴᓐ, ᐋᓃᓐ ᑕᔥ ᑳᐅᒋ ᐋᐱᒋ ᑭᑖᑕᐱ ᓂᑖᑫᔭᓐ?

ᒉᑲᑉ ᑕᔥ ᑮᐃᑭᑐ, ᑳᑎᐯᒋᑫᒡ ᑳᐅᑭᔐᒪᓂᑑᒥᔭᓐ ᓂᑮ ᐐᒋᐃᒃ ᒌᔑᓭᐗᒃ, ᑮᐃᑭᑐ᙮

21ᐋᐃᓯᒃ ᑕᔥ ᐅᑮᐃᓈᓐ ᒉᑲᐴᓐ, ᓂᑯᓯᔅ ᑕᑲ ᐯᔓ ᐲᔖᓐ, ᑭᐐ ᓵᒥᓂᓐ ᐁᐐ ᐊᑕ ᑭᑫᓂᒥᓈᓐ ᑕᑲ ᑮᓐ ᑌᐺ ᓂᑯᓯᔅ ᐄᔂ Esau ᐁᐋᐎᐗᓀᓐ, ᐅᑮᐃᓈᓐ᙮ 22ᒉᑲᑉ ᑕᔥ ᐯᔓ ᐅᑮ ᓈᓯᑲᐙᓐ ᐅᑌᑌᓐ ᐋᐃᓯᑰᓐ, ᐁᑮ ᓵᒥᓂᑯᒡ ᐁᑮ ᐃᑭᑐᓂᒡ ᑕᔥ, ᐃᑎᑯᓈ ᒉᑲᑉ ᐁᓂᑖᑯᓯᔭᓐ, ᔖᑰᒡ ᑕᔥ ᐃᓂ ᑭᓂᑲᓐ ᒦᒪᔮ ᐁᔑ ᒥᑰᒌᓂᑳᑌᑭᓐ ᑖᐱᔥᑰ ᐄᔂ ᐅᓂᑲᓐ᙮ 23ᑳᐐᓐ ᑕᔥ ᐅᑮ ᓂᓯᑕᐌᓂᒫᓰᓐ ᐁᒉᑲᐳᐎᓂᒡ ᐊᓃᔥ ᑮᐃᔑ ᒦᔖᑯᓂᑫᐗᓐ ᑖᐱᔥᑰ ᐅᑯᓯᓴᓐ ᐄᔂᓐ᙮ ᒦᑕᔥ ᑳᐃᔑ ᔕᐌᓂᒫᒡ᙮ 24ᐋᐃᓯᒃ ᑕᔥ ᑮᐊᓂ ᐃᑭᑐ, ᑮᓐ ᐃᓇ ᑌᐺ ᓂᑯᓯᔅ ᐄᔂ?

ᒉᑲᑉ ᑕᔥ ᑮᐃᑭᑐ, ᑫᑫᑦ ᓃᓐ ᓂᑎᓄᐤ᙮

25ᐋᐃᓯᒃ ᑕᔥ ᑮᐊᓂ ᐃᑭᑐ, ᓂᑯᓯᔅ, ᐲᑕᒪᐎᔑᓐ ᑕᔥ ᐃᐃ ᑳᑮ ᓂᑑᔭᓐ ᒋᐐᓯᓂᔮᓐ, ᒋᔕᐌᓂᒥᓈᓐ ᑕᔥ ᑲᔦᐲ᙮ ᒦᑕᔥ ᒉᑲᑉ ᑳᐃᔑ ᒦᓈᒡ ᒋᐐᓯᓂᓂᒡ, ᔔᒥᓈᐴᓂ ᑲᔦ ᐅᑮ ᑕᑯ ᒦᓈᓐ ᒋᒥᓂᑴᓂᒡ᙮ 26ᒉᑲᑉ ᐅᑮᐃᑰᓐ ᐅᑌᑌᓐ, ᓂᑯᓯᔅ, ᑕᑲ ᐯᔓ ᐲᔖᓐ ᒋᐅᒌᒥᔭᓐ᙮ 27#Heb 11.20. ᐯᔓ ᑕᔥ ᐅᑮ ᓈᓯᑲᐙᓐ ᐁᑮ ᐅᒌᒫᒡ᙮ ᐊᐲ ᑕᔥ ᑳᒥᓈᑕᒥᓂᒡ ᑭᑭᔥᑭᑲᓇᓐ ᑳᑮ ᑭᑭᔥᑲᕽ ᐋᓃᓐ ᐁᔑ ᒫᑾᓂᓂᑭᓐ, ᒦᑕᔥ ᑳᑮ ᔕᐌᓂᒥᑯᒡ ᐁᑮᐃᑯᒡ, ᒦ ᓴ ᐃ ᑌᐺ ᐁᔑ ᒫᑯᓯᒡ ᐊᐊ ᓂᑯᓯᔅ ᑳᐃᔑ ᒫᑾᓂᓂᒃ ᐃᐃ ᐱᑾᑕᑲᒥᒃ, ᑳᑎᐯᒋᑫᓂᒡ ᑳᑮ ᔕᐌᑕᒥᓂᒡ᙮ 28ᑕᑲ ᑲᔦ ᑭᔐᒪᓂᑑ ᑭᑲ ᒦᓂᒃ ᑳᑭᒥᐗᓂᓂᒃ ᑮᔑᑯᕽ ᑳᐅᒌᓂᒃ, ᑕᑲ ᑲᔦ ᐅᑲ ᐅᔑᑑᓇᓐ ᑭᑭᑎᑫᐗᑲᒥᑰᓐ ᒋᐌᓅᒋ ᓂᑖᐎᑭᒋᑫᒪᑲᓂᓂᑭᓐ᙮ ᑕᑲ ᑲᔦ ᓃᐱᐗᐞ ᑭᑲ ᒦᓂᒃ ᐸᑴᔑᑲᓇᓐ, ᔔᒥᓇᐞ ᑲᔦ ᑫᐅᒋ ᐅᔑᑑᔭᓐ ᔔᒥᓈᐳ᙮ 29#Gen 12.3. ᐯᒫᑎᓯᐙᒡ ᑲᔦ ᑭᑲ ᐸᒦᑖᑰᒃ, ᑲᑭᓇ ᑲᔦ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑭᑲ ᐅᒋᒌᑾᓇᐲᑖᑰᒃ᙮ ᑭᑲ ᐅᑭᒫᑲᑕᐙᒃ ᑲᔦ ᑎᐱᓇᐌ ᑭᑎᓇᐌᒫᑲᓇᒃ, ᐃᐃ ᑲᔦ ᑭᒫᒫ ᐅᑯᓯᓴᐞ ᑭᑲ ᐅᒋᒌᑾᓇᐲᑖᑰᒃ᙮ ᑫᒪᒐᑭᒥᒀ ᓴ ᑕᒪᒐᑭᒫᐗᒃ, ᑫᔕᐌᓂᒥᒀ ᓴ ᑕᔥ ᑕᔕᐌᑖᑯᓯᐗᒃ, ᑮᐃᑭᑐᐗᓐ᙮

ᐄᔂ ᐁᑮᐊᑕᐌᑕᕽ ᑫᐐᓐ ᒋᔕᐌᑖᑯᓯᒡ

30ᒦᑕᔥ ᑳᐊᓂ ᐃᔑᓭᒃ ᐋᐃᓯᒃ Isaac ᑳᐃᔥᒀ ᔕᐌᓂᒫᒡ ᒉᑲᐴᓐ Jacob, ᐁᑮ ᐊᓂ ᒫᒑᓂᒡ ᑕᔥ ᑳᑮ ᐃᔑᐊᔮᒡ᙮ ᑳᐐᓐ ᑕᔥ ᑕᔑᓈᓈᑫ ᑮᐃᔑᓭᓯᓂᓂ ᒦ ᐃ ᐋᔕ ᐄᔂᓐ Esau ᐅᑯᓯᓴᓐ ᑳᑮ ᐱ ᑕᑯᔑᓂᓂᒡ ᐁᑮ ᐃᔥᒀ ᐊᑕᐌᒋᑫᓂᒡ᙮ 31ᐄᔂ ᑕᔥ ᑫᐐᓐ ᐅᑮ ᑮᔑᓵᓐ ᒦᒋᒻ ᑳᑮ ᒥᓄᐱᑕᒥᓂᒡ ᐅᑌᑌᓐ, ᐁᑮ ᐲᑕᒪᐙᒡ ᑲᔦ᙮ ᒦᑕᔥ ᑳᐃᓈᒡ ᓂᑌᑌ, ᐸᓯᑸᓐ, ᒦᒋᓐ ᐅᐅ ᒦᒋᒻ ᑳᑮ ᓂᑑᔮᓐ, ᒦᑕᔥ ᑲᔦ ᒋᔕᐌᓂᒥᔭᓐ, ᐅᑮᐃᓈᓐ᙮

32ᐋᐃᓯᒃ Isaac ᑕᔥ ᑮᐃᑭᑐ, ᐊᐌᓀᓐ ᐃᑕᔥ ᑮᓐ?

ᐄᔂ ᑮᐃᑭᑐ, ᓃᓐ ᐄᔂ, ᓂᑕᒻ ᑳᑮ ᓂᑖᐎᑭᒡ ᑭᑯᓯᔅ, ᑮᐃᑭᑐ᙮

33ᐋᐃᓯᒃ Isaac ᑕᔥ ᐐᑫ ᑮᑭᒋ ᓂᓂᑳᓂᒥᓯ ᒥᓯᐌ ᐁᑮ ᐗᑲᐎᓭᒡ ᐁᑮ ᐃᑭᑐᒡ, ᐊᐌᓀᓐ ᑕᔥ ᐊᐊ ᑳᑮ ᐲᑎᑲᐎᒡ ᐊᔭᐋᐎᔕᓐ ᑳᑮ ᓂᓵᒡ? ᐋᔕ ᑕᔥ ᓂᑮ ᐃᔥᒀ ᐐᓯᓐ ᒋᑆ ᑕᑯᔑᓇᓐ, ᐋᔕ ᑲᔦ ᓂᑮ ᔕᐌᓂᒫ᙮ ᒦᑕᔥ ᐃᑯ ᐃ ᓀᐱᒡ ᑫᔑ ᔕᐌᑖᑯᓯᒡ, ᑮᐃᑭᑐ᙮

34ᐊᐲ ᑕᔥ ᐄᔂ ᑳᓅᑕᕽ ᐁᐃᑭᑐᓂᒡ ᐅᑌᑌᓐ, ᐐᑫ ᑕᔥ ᑮᑭᒋ ᑭᔒᐌ ᐁᒪᐎᒡ, ᐁᑮ ᑭᒋ ᒥᒋᓇᐌᓯᒡ, ᐁᑮᐃᓈᒡ ᐅᑌᑌᓐ, ᓂᑌᑌ, ᔕᐌᓂᒥᔑᓐ, ᑫᓃᓐ ᓴ ᑲᔦ ᔕᐌᓂᒥᔑᓐ, ᐁᑮ ᐃᓇᑌᒧᒡ᙮

35ᐋᐃᓯᒃ ᑕᔥ ᑮᐃᑭᑐ, ᑮᒋᑭᐌᓯ ᐅᔕ ᑮᐲᔖ ᐁᑮ ᐗᔦᔑᐃᒡ᙮ ᑭᑮ ᒪᑲᒥᒃ ᐃᐃ ᑳᐐ ᐃᔑ ᔕᐌᑖᑯᓯᐗᑎᐸᓐ, ᑮᐃᑭᑐ᙮

36 # Gen 25.29-34. ᐄᔂ ᑕᔥ ᑮᐃᑭᑐ, ᑌᐺ ᓴ ᑾᔭᒃ ᑮᐃᔑᓂᑳᓈᐎᑎᐸᓐ ᐊᐲ ᒉᑲᑉ ᑮᐐᓱᒡ, ᐋᓃᔥ ᒦ ᐃ ᐁᑭᑑᒪᑲᓂᓂᒃ ᐅᐐᓱᐎᓐ ᐃᐃ ᑳᐱ ᐗᔦᔑᒥᒡ ᐋᔕ ᓃᔣ᙮ ᐁᑮ ᐅᑖᐱᓇᒪᐎᒡ ᑳᐐ ᑎᐱᓇᐌᐎᓯᐗᑭᐸᓐ ᓃᓐ ᓂᑕᒻ ᐁᑮ ᓂᑖᐎᑭᐗᒃ, ᐃᓇᔥᑫ ᑕᔥ ᑲᔦ ᓂᑮ ᑮᒨᒋ ᒪᑲᒥᒃ ᑳᐐ ᐃᔑ ᔕᐌᑖᑯᓯᐗᑭᐸᓐ᙮ ᒦᑕᔥ ᑳᐊᓂ ᐃᑭᑐᒡ, ᑳᐐᓐ ᐃᓇ ᑭᑮ ᐃᔥᑯᓇᓰᓐ ᑫᑰᓐ ᒋᔕᐌᑖᑯᓯᔮᓐ?

37ᐋᐃᓯᒃ ᑕᔥ ᐅᑮ ᐃᔑ ᓇᑴᑕᐙᓐ ᐄᔂᓐ, ᐋᔕ ᐅᔕ ᓂᑮ ᐃᔑᐋ ᒋᐅᑭᒫᑲᑕᐎᒃ, ᓂᑮ ᐃᔑ ᔕᐌᓂᒫ ᑲᔦ ᑲᑭᓇ ᐅᑎᓇᐌᒫᑲᓇᐞ ᒋᐸᒦᑖᑯᒡ, ᓂᑮ ᐃᔑ ᔕᐌᓂᒫ ᑲᔦ ᒋᐊᔮᐙᒡ ᐸᑴᔑᑲᓇᓐ, ᒋᐊᔮᒡ ᑲᔦ ᔔᒥᓈᐳ ᐋᑎ ᑫᐅᑖᑎᓯᒡ᙮ ᓂᑯᓯᔅ, ᐃᓇᔥᑫ ᑕᔥ ᑳᐐᓐ ᑫᑰᓐ ᑫᔮᐱ ᑭᑖᑮ ᑑᑕᒪᐎᓯᓅᓐ, ᐅᑮᐃᓈᓐ᙮

38 # Heb 12.17. ᐄᔂ ᑕᔥ ᐅᑮᐃᓈᓐ ᐅᑌᑌᓐ, ᓂᑌᑌ, ᑮᒥᒋᐯᔑᑾᓐ ᐃᓇ ᑭᔕᐌᒋᑫᐎᓐ? ᓂᑌᑌ, ᑕᑲ ᑫᓃᓐ ᔕᐌᓂᒥᔑᓐ᙮ ᒦᑕᔥ ᑳᐃᔑ ᑭᔒᐌᒡ ᐁᑮ ᒪᐎᒡ᙮

39 # Heb 11.20. ᒦᑕᔥ ᐋᐃᓯᒃ, ᑳᐃᓈᒡ ᐄᔂᓐ,

ᐃᓇᔥᑫ ᑕᔥ ᑮᓐ,

ᐋᑎ ᑫᔑ ᑲᐯᔑᔭᓐ ᐅᐅᒫ ᐊᑮᕽ,

ᑳᐐᓐ ᑫᑰᓐ ᑭᑲ ᓂᑖᐎᑭᑑᓰᓐ,

ᑳᐐᓐ ᑲᔦ ᑮᔑᑯᕽ ᑕᐅᒋ ᔖᐳᐲᓯᓅᓐ ᑫᔑ ᑭᑎᑫᔭᓐ᙮

40 # Gen 36.8; 2Ki 8.20. ᑭᐸᔑᐸᐃᑫᐎᑯᒫᓃᕽ ᓴ ᑮᓐ ᑭᑲ ᐅᑖᑎᔅ,

ᑭᑲ ᐸᒦᑕᐙ ᓴ ᑲᔦ ᑮᒋᑭᐌᓯ᙮

ᐊᐲ ᑕᔥ ᐊᓂ ᑎᐯᓂᑎᓱᔭᓐ,

ᒦ ᓴ ᐃ ᑳᐐᓐ ᐊᐗᔑᒣ ᑭᑲ ᑎᐯᓂᒥᑯᓰ᙮

41ᐄᔂ ᑕᔥ ᐅᑮ ᓂᔥᑫᓂᒫᓐ ᒉᑲᐴᓐ ᐋᓃᔥ ᐅᑌᑌᓐ ᐅᑮ ᒦᓈᓂ ᐅᔕᐌᑖᑯᓯᐎᓐ᙮ ᒦᑕᔥ ᑳᐃᓀᑕᕽ, ᐋᔕ ᐄᑐᒃ ᑫᑳ ᒥᓴᐙ ᑕᐃᔥᒀ ᐱᒫᑎᓯ ᓂᑌᑌ ᒋᒪᐎᒪᒃ, ᒦᑕᔥ ᐃᐃ ᐊᐲ ᑫᓂᓴᒃ ᒉᑲᑉ, ᑮᐃᓀᑕᒻ᙮

42ᐊᐲ ᑕᔥ ᐅᕒᐃᐯᑲ Rebekah ᑳᓅᑕᕽ ᐋᓃᓐ ᑳᐃᑭᑐᓂᒡ ᐄᔂᓐ, ᔐᒫᒃ ᐅᑮ ᐊᑐᒫᓐ ᒉᑲᐴᓐ ᐁᑮᐃᓈᒡ, ᐱᓯᑕᐎᔑᓐ, ᑭᓴᔦᔅ ᐄᔂ ᐄᓴᓐ ᐃᓀᑕᒻ ᐁᐐ ᑎᐸᐊᒪᐎᒃ, ᐁᐐ ᓂᓯᒃ᙮ 43ᐃᓇᔥᑫ ᑕᔥ ᓂᑯᓯᔅ ᓇᐃᑕᐎᔑᓐ ᐅᐅ ᑳᐃᓂᓈᓐ, ᐸᓯᑸᓐ, ᐌᑎ ᐁᕒᐊᓐ Haran ᐆᑌᓈᕽ ᐊᐸᐃᐌᓐ, ᓂᑕᐌᒫ ᓬᐁᐸᓐ Laban ᑳᔑ ᐊᔮᒡ᙮ 44ᐊᐎ ᐐᒋᐊᔮᒻ ᐊᒋᓇ, ᒋᐊᑲᐙᐊᒡ ᑭᓴᔦᔅ ᒋᐋᑌᑭᑖᓱᒡ᙮ 45ᐹᓂᒫ ᑕᔥ ᑮᐴᓀᑕᕽ ᑳᑮ ᑑᑕᐗᒡ, ᐊᐎᔭ ᓂᑲ ᐃᔑᓂᔕᐙ ᒋᓈᓯᑲᐎᒃ᙮ ᐌᑯᓀᓐ ᑕᔥ ᑫᐅᒋ ᐗᓂᐊᒀᐸᓐ ᒥᒋᓃᔥ ᓂᑯᓯᓴᒃ ᐯᔑᑾᓐ ᐁᑮᔑᑲᓂᓂᒃ, ᐅᑮᐃᓈᓐ᙮

ᐋᐃᓯᒃ ᑮᐃᔑᓂᔕᐙᒡ ᒉᑲᐴᓐ ᒋᐃᔖᓂᒡ ᑳᑮᐃᔑᐊᔮᓂᒡ ᓬᐁᐸᓅᓐ

46ᐅᕒᐃᐯᑲ Rebekah ᑕᔥ ᐅᑮᐃᓈᓐ ᐋᐃᓯᑰᓐ Isaac, ᐁᑕᑕᐌ ᓴ ᓂᑐᒋ ᐐᔭᑭᔥᑫᑕᒻ ᐁᐱᒫᑎᓯᔮᓐ ᐃᑭ ᐅᒋ ᐃᑴᐗᒃ ᐁᑦ Heth ᑳᑎᓄᐎᓂᒡ᙮ ᑮᔥᐱᓐ ᑕᔥ ᑫᐐᓐ ᒉᑲᑉ Jacob ᐐᐎᒡ ᐃᓂ ᑎᓄ ᐃᑴᐗᓐ, ᒦ ᐃ ᐊᓂᔖ ᒋᐱᒫᑎᓯᔮᓐ, ᐅᑮᐃᓈᓐ᙮

Currently Selected:

ᒉᓂᓯᔅ 27: OJBS

Highlight

Copy