ᒉᓂᓯᔅ 26

ᐋᐃᓯᒃ ᑮᐃᔑᑖᒡ ᑮᕒᐋᕒ

1ᒦᓇᐙ ᓴ ᑳᐐᓐ ᑮᐊᔮᓯᓅᓐ ᒦᒋᒻ ᐃᐃᒫ ᐊᑮᕽ ᑳᑮ ᐃᔑᐌᐸᑭᐸᓐ ᐅᑖᓈᕽ ᒣᒀ ᐁᐸᕒᐊᐋᒻ ᑮᐱᒫᑎᓯᒡ᙮ ᒦ ᓴ ᐋᐃᓯᒃ Isaac ᑳᑮ ᐃᔖᒡ ᐱᓬᐃᔅᑎᔭ Philistine ᑳᐅᒌᓂᒡ ᐅᑭᒋᐅᑭᒫᒥᓂ ᐊᐱᒣᓬᐁᒃ ᐁᔑᓂᑳᓱᓂᒡ ᐁᔑᐊᔮᓂᒡ ᐆᑌᓈᕽ ᑮᕒᐋᕒ Gerar᙮ 2ᑳᑎᐯᒋᑫᓂᒡ ᓴ ᐅᑮ ᓈᑯᓰᑖᑰᓐ ᐋᐃᓯᒃ ᐁᑮᐃᑯᒡ, ᑫᑯ ᐌᑎ ᐄᒋᐸᑮᕽ Egypt ᐃᔖᑫᓐ᙮ ᐋᑎ ᓴ ᐱᑯ ᑫᐃᓂᓈᓐ ᑫᐃᔑᐊᔮᔭᓐ, ᒦ ᐃᒫ ᑫᐃᔑᑖᔭᓐ᙮ 3#Gen 22.16-18. ᐅᐅᒫ ᓴ ᐊᑮᕽ ᑭᑲ ᐊᔮ᙮ ᑭᑲ ᐐᒌᐎᓐ, ᑲᔦ ᑕᔥ ᑭᑲ ᔕᐌᓂᒥᓐ᙮ ᐅᐅᓴ ᐊᑭ ᑭᑲ ᒦᓂᓐ ᑲᑭᓇ ᑲᔦ ᐃᑭ ᑭᐲᐌᓰᒪᒃ ᓂᒦᓈᒃ᙮ ᑖᐱᔥᑰ ᓴ ᑳᑮ ᐃᔑ ᑲᓇᐌᑕᒧᐗᒃ ᐁᐸᕒᐊᐋᒻ ᑳᑮ ᐃᓇᔓᑕᒪᐗᑭᐸᓐ, ᒦ ᓴ ᐯᔑᑾᓐ ᑫᐃᔑᒋᑫᑕᒪᐎᓈᓐ᙮ 4ᑲᔦ ᑕᔥ ᑭᑲ ᑑᑕᐎᓐ ᒋᐊᓂ ᐹᑏᓄᐙᒡ ᑭᐲᐌᓰᒪᒃ ᒋᑕᔑᐙᒡ ᑖᐱᔥᑰ ᑳᑕᔑᐙᒡ ᐗᓇᑯᔕᒃ ᑮᔑᑯᕽ ᐁᔮᐙᒡ᙮ ᓂᑲ ᒦᓈᒃ ᓴ ᐅᐅ ᒥᓯᐌᑲᒥᒃ ᐃᑭ ᑭᐲᐌᓰᒪᒃ᙮ ᑲᑭᓇ ᓴ ᐯᒫᑎᓯᐙᒡ ᐅᐅᒫ ᐊᑮᕽ ᓂᑲ ᑲᑴᒋᒥᑰᒃ ᒌᔑ ᔕᐌᓂᒪᒀ ᑖᐱᔥᑰ ᑫᔑ ᔕᐌᓂᒪᒀ ᑭᐲᐌᓰᒪᒃ᙮ 5ᑭᑲ ᔕᐌᓂᒥᓐ ᓴ ᑫᑮᓐ ᐋᓃᔥ ᐁᐸᕒᐊᐋᒻ ᓂᑮ ᓇᐃᑖᒃ ᐁᑮ ᑑᑕᕽ ᑳᑮ ᐃᔑ ᐊᑕᐌᓂᒪᒃ, ᑲᔦ ᑕᔥ ᐁᑮ ᑲᓇᐌᑕᕽ ᑲᑭᓇ ᓂᑎᓈᑯᓂᑫᐎᓇᓐ, ᐅᑮᐃᑰᓐ᙮

6ᒦᔥ ᐃᐃᒫ ᐋᐃᓯᒃ ᐆᑌᓈᕽ ᑮᕒᐋᕒ ᑳᐊᔮᒡ᙮ 7#Gen 12.13; 20.2. ᐊᐲ ᓴ ᐃᓂᓂᐗᐞ ᐁᑲᑴᒋᒥᑯᒡ ᐅᒋ ᐐᐗᓐ ᒦ ᓴ ᑳᐃᓈᒡ ᐁᐅᑕᐌᒫᒡ᙮ ᐋᓃᔥ ᑮᓇᓃᓵᓀᑕᒻ ᒋᓂᓯᓐᒡ ᑮᔥᐱᓐ ᐃᑭᑐᒡ ᐅᕒᐃᐯᑲᐗᓐ Rebekah ᐄᓴᓐ ᐁᐐᐎᒡ᙮ ᐐᑫ ᐄᑐᒃ ᑮᑌᑕᑯ ᒥᓄᓈᑯᓯ ᐊᐊ ᐅᕒᐃᐯᑲ᙮ 8ᓈᓈᑫ ᓴ ᑕᔥ ᐁᐊᓂ ᐊᔨᔑᓭᓂᒃ ᑭᓉᔒᔥ ᐃᑯ ᐃᐃᒫ ᑳᐊᔮᓂᒡ ᐋᐃᓯᑰᓐ, ᐱᓬᐃᔅᑎᔭ ᐅᒋ ᑭᒋᐅᑭᒫ ᑮᐸᐹᐱ ᐙᓭᒋᑲᓂᕽ᙮ ᒦᔥ ᑳᑮ ᐙᐸᒫᒡ ᐋᐃᓯᑰᓐ, ᐃᓂ ᑲᔦ ᐐᐎᓂ ᐅᕒᐃᐯᑲᐗᓐ ᐁᒥᓉᓂᑎᓂᒡ᙮ 9ᔐᒫᒃ ᐃᑕᔥ ᐊᐱᒣᓬᐁᒃ ᐅᑮ ᑲᓅᓈᓐ ᐋᐃᓯᑰᓐ ᐁᑮᐃᓈᒡ, ᑌᐺ ᐄᓴᓐ ᑭᐐᐤ ᐊᐊ ᐃᑴ᙮ ᐌᑯᓀᓐ ᐃᑕᔥ ᑳᐅᒋ ᐃᑭᑐᔭᓐ ᐁᐅᑕᐌᒫᔭᓐ ᐊᐊ ᐃᑴ?

ᒦᔥ ᐅᐅ ᐋᐃᓯᒃ ᑳᐃᔑ ᓇᑴᑕᕽ, ᒦ ᓴ ᐃ ᑳᐃᓀᑕᒫᓐ ᒋᐅᒋ ᓂᓯᑰᔮᓐ ᐊᐊ ᐃᑴ᙮

10ᐊᐱᒣᓬᐁᒃ ᓴ ᑕᔥ ᐅᐅ ᑮᐃᑭᑐ, ᐋᓃᓐ ᐃᑕᔥ ᐃᓈ ᑳᐃᔑᒋᑫᔭᓐ᙮ ᐃᓇᔥᑫ ᐯᔑᒃ ᓂᑎᓂᓃᒻ ᐱᓵᓐ ᑳᐐᐯᒫᑴᓐ ᑭᐐᐗᓐ, ᑮᓐ ᐃᑕᔥ ᐄᓴᓐ ᑭᑖ ᐊᓈᒣᑖᑯᓯᐃᓈᒻ᙮ 11ᒦᔥ ᐊᐱᒣᓬᐁᒃ ᑳᐃᓈᒡ ᑲᑭᓇ ᐅᐱᒫᑎᓰᒪᐞ, ᐊᐌᓀᓐ ᓴ ᑯ ᑫᒫᔑ ᑑᑕᐙᒡ ᐅᓄ ᐃᓂᓂᐗᓐ, ᐃᓂ ᑲᔦ ᐐᐎᓂ, ᒦ ᓴ ᐊᐌ ᑫᓂᓯᓐᒡ᙮

12ᐋᐃᓯᒃ ᓴ ᑮᑭᑎᑫ ᐃᐃᒫ ᐊᑮᕽ᙮ ᐯᔑᑾᓐ ᐃᑕᔥ ᐁᓃᐱᓂᓂᒃ ᓂᑯᑣᒃ 100 ᐊᐗᔑᒣ ᑳᑮ ᑭᑎᑫᐸᓐ ᒥᓂᒃ ᑮᒪᓂᔑᑫ, ᐋᓃᔥ ᑳᑎᐯᒋᑫᓂᒡ ᐃᐃ ᓇᑫ ᐅᑮ ᐃᔑ ᔕᐌᓂᒥᑰᓐ᙮ 13ᐐᑫ ᓴ ᑯ ᑮᐊᓂ ᒥᓄᓭ, ᑲᔦ ᑕᔥ ᐐᑫ ᑮᐊᓂ ᐐᑫ ᐌᓅᑎᓯ᙮ 14ᐋᐱᒋ ᓴ ᐁᐹᑏᓄᐋᒡ ᒫᓇᒑᓂᔕᐞ, ᐸᑳᓐ ᑲᔦ ᐊᐗᑳᓇᐞ, ᑲᔦ ᑕᔥ ᐊᓄᑮᐋᑲᓇᐞ, ᒦ ᓴ ᐃ ᑳᑮ ᐅᒋ ᐊᔮᔐᓂᒥᑯᒡ ᐃᐃ ᐱᓬᐃᔅᑎᔭ ᐊᑮᕽ ᑳᐅᒌᓂᒡ᙮ 15ᒦᔥ ᑳᑑᑖᑯᒡ ᐁᑮ ᒨᔥᑭᓇᑑᓂᒡ ᐅᑕᐃᐹᓇᓐ ᐅᑌᑌᐸᓃᓐ ᐁᐸᕒᐊᐋᒪᓐ ᐅᑕᓄᑮᐋᑲᓂᓂ ᑳᑮ ᐙᓂᑳᓄᑕᒥᓂᑯᐸᓀᓐ ᒣᒀ ᐅᑌᑌᐸᓃᓐ ᑮᐱᒫᑎᓯᓂᒡ᙮

16ᒦᑕᔥ ᐊᐱᒣᓬᐁᒃ ᑳᐃᓈᒡ ᐋᐃᓯᑰᓐ, ᑕᑲ ᐅᐅᒫ ᓂᑕᑮᒥᓈᓂᕽ ᐅᒋ ᒫᒑᓐ᙮ ᐅᓵᒻ ᑮᓐ ᓇᐗᒡ ᑭᒪᔥᑲᐌᑖᑯᔅ ᐊᐲᒡ ᓃᓇᐎᓐᑦ ᐁᐲᑌᑖᑯᓯᔮᕽ, ᐅᑮᐃᑰᓐ᙮ 17ᒦᑕᔥ ᐋᐃᓯᒃ ᑳᐃᔑ ᒫᒌ ᑯᓯᒡ ᐁᑮ ᐃᔑ ᑲᐯᔑᒡ ᐸᓴᑎᓈᕽ ᑮᕒᐋᕒ Gerar ᐁᔑᓂᑳᑌᓂᒃ᙮ ᑭᓉᔥ ᐃᑕᔥ ᐃᐃᒫ ᑮᐃᔑᑖ᙮ 18ᒦᔥ ᑳᑮ ᑮᐌ ᐙᓂᑳᑕᕽ ᐃᓂ ᐅᑕᐃᐹᓇᓐ ᐅᑌᑌᐸᓃᓐ ᐁᐸᕒᐊᐋᒪᓐ ᑳᑮ ᐙᓂᑳᑕᒥᓂᑯᐸᓀᓐ᙮ ᒦᐗᓐ ᐄᑐᒃ ᐃᓂ ᐱᓬᐃᔅᑎᔭ ᑳᐅᒌᓂᒡ ᑳᑮ ᒨᔥᑭᓇᑑᓂᒡ ᑮᐃᔥᒀ ᐱᒫᑎᓯᓂᒡ ᐁᐸᕒᐊᐋᒪᓐ, ᐊᑲᒥᒃ ᓴ ᐁᑮ ᐋᐸᒋᑑᓂᒡ᙮ ᐯᔑᑾᓐ ᓴ ᐅᑮ ᐃᔑᓂᑳᑖᓇᓐ ᐃᓂ ᐅᑕᐃᐹᓇᓐ ᑳᑮ ᐃᔑᓂᑳᑕᒥᓂᒡ ᐅᑌᑌᐸᓃᓐ᙮

19ᐋᐃᓯᒃ ᓴ ᑕᔥ ᐅᑕᓄᑮᐋᑲᓇᐞ ᑮᐙᓂᑫᐗᐞ᙮ ᒦᔥ ᑳᑮ ᒥᒀᓂᑳᑕᒥᓂᒡ ᓃᐱᐗᐞ ᓂᐱ᙮ 20ᐃᐃ ᓴ ᑕᔥ ᐃᓂᓂᐗᐞ ᑮᕒᐋᕒ ᐌᒌᓂᒡ ᓀᔮᑲᒋᐋᓂᒡ ᐊᐗᑳᓇᐞ ᑮᐅᒋ ᑭᒋ ᑳᑮᑭᑐᐗᐞ ᐁᑮ ᑮᑳᒫᓂᒡ ᐋᐃᓯᒃ ᐅᑑᔥᑭᓃᑮᒪᐞ, ᐁᑮ ᐃᑭᑐᓂᒡ, ᓃᓇᐎᓐᑦ ᐄᑐᒃ ᐃᐃ ᓂᓂᐲᒥᓈᓐ᙮ ᒦᔥ ᐋᐃᓯᒃ ᑳᑮ ᐃᔑ ᐐᑕᒃ ᐃᐃ ᐅᑕᐃᐹᓂᓂ, ᑮᑳᑎᐎᓐ, ᐁᑮ ᐃᔑᓂᑳᑕᕽ ᐋᓃᔥ ᑮᐅᒋ ᑮᑳᒫᐗᒃ ᐃᐃ ᓂᐲᓂ᙮

21ᒦᓇᐙ ᑕᔥ ᐋᐃᓯᒃ ᐅᑕᓄᑮᐋᑲᓇᐞ ᑮᐙᓂᑫᐗᐞ᙮ ᒦᔥ ᑳᐃᔑ ᒥᑲᒥᓂᒡ ᓂᐲᓂ᙮ ᒦᑕᔥ ᐯᔑᑾᓐ ᑳᑑᑕᐎᒥᓐᒡ ᐅᑎᓂᓃᒪᐞ᙮ ᒦᑳᓂᑰᐎᓐ, ᐃᑕᔥ ᐅᑮ ᐃᔑᓂᑳᑕᓐ ᐃᐃ ᐅᑕᐃᐹᓐ᙮ 22ᑮᐅᒋ ᑯᓯ ᑕᔥ ᐃᐃᒫ ᒦᓇᐙ ᐁᑮ ᐙᓂᑫᒡ ᐁᑮ ᒥᑲᕽ ᓂᐲᓂ᙮ ᑳᐐᓐ ᐃᑕᔥ ᐊᐎᔭᓐ ᐅᑮ ᐅᒋ ᑮᑳᒥᑯᓰᓐ᙮ ᑕᐎᔥᑳᑰᐎᓐ, ᓴ ᐅᑮ ᐃᔑᓂᑳᑖᓐ ᐃᐃ ᐅᑕᐃᐹᓐ᙮ ᒦᔥ ᑳᐃᑭᑐᒡ, ᒦ ᓴ ᐃ ᑳᑎᐯᒋᑫᒡ ᐁᑕᐎᓇᒪᐎᓇᕽ ᒋᒥᓄᓭᐗᑭᒡ ᐅᐅᒫ ᐊᑮᕽ᙮

23ᐲᐊᕒᔒᐸ Beersheba ᓴ ᑕᔥ ᐃᓇᑫ ᑮᐃᔑ ᑯᓯ᙮ 24ᐃᐃ ᐁᑎᐱᑲᓂᓂᒃ ᐃᑕᔥ ᐅᑮ ᓈᑯᓰᑖᑰᓐ ᑳᑎᐯᒋᑫᓂᒡ ᐁᑮᐃᑯᒡ, ᓃᓐ ᓴ ᑭᑌᑌ ᐁᐸᕒᐊᐋᒻ ᐅᑭᔐᒪᓂᑑᒪᓐ᙮ ᑫᑯ ᓭᑭᓯᑫᓐ, ᑭᐐᒌᐎᓐ ᐄᑐᒃ᙮ ᑭᑲ ᔕᐌᓂᒥᓐ ᑲᔦ ᒋᐊᓂ ᐹᑏᓄᐙᒡ ᑭᐲᐌᓰᒪᒃ ᐋᓃᔥ ᐃᐃᓇᑫ ᑳᐃᔑ ᐊᔓᑕᒪᐗᑭᐸᓐ ᐁᐸᕒᐊᐋᒻ, ᐅᑮᐃᑰᓐ᙮ 25ᒦᑕᔥ ᐋᐃᓯᒃ ᑳᐃᔑ ᐅᓈᐱᑭᓂᑫᒡ ᐁᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ ᒦᔥ ᐃᐃ ᑳᐃᔑ ᑲᐯᔑᒡ᙮ ᐅᑕᓄᑮᐋᑲᓇᐞ ᑲᔦ ᐃᐃᒫ ᐅᑮ ᐊᑣᓂᑳᑕᒥᓂ ᓂᐲᓂ᙮

ᑳᔑᐊᔓᑕᒫᑎᐙᒡ ᐋᐃᓯᒃ ᔑᑾ ᐊᐱᒣᓬᐁᒃ

26 # Gen 21.22. ᐊᐊ ᓴ ᐊᐱᒣᓬᐁᒃ ᑮᐲᔖ, ᐁᑮ ᐱ ᐐᒌᐎᑯᒡ ᐋᐊᓴᑦ Ahuzzath ᐁᔑᓂᑳᓱᓂᒡ ᑳᐐᑕᒫᑯᒡ ᑫᓂ ᐃᔑᒋᑫᒡ, ᐃᓂ ᑲᔦ ᐹᐃᑯᓬ Phicol ᐁᔑᓂᑳᓱᓂᒡ ᐅᔑᒫᑲᓂᔒᐎᑭᒫᓐ ᐁᑮ ᐱ ᐊᑕ ᐙᐸᒫᒡ ᐋᐃᓯᑰᓐ 27ᒦᑕᔥ ᐋᐃᓯᒃ ᑳᐃᔑ ᑲᑴᒋᒫᒡ, ᐌᑯᓀᓐ ᐃᑕᔥ ᐌᒋ ᐲᔖᔦᒃ ᐁᐱ ᐙᐸᒥᔦᒃ? ᑭᒫᔑ ᐐᒌᐎᒻ ᐄᑐᒃ, ᓂᑯᒋ ᐁᑮ ᐃᔑᓂᔕᐅᔦᒃ?

28ᒦᔥ ᐅᐅ ᑳᐃᔑ ᓇᑴᑖᑯᒡ, ᓂᑭᑫᑖᒥᓐ ᐄᑐᒃ ᑳᑎᐯᒋᑫᒡ ᐁᐐᒌᐎᒃ, ᒦᑕᔥ ᑳᐃᓀᑕᒫᕽ ᒋᑮ ᐊᔓᑕᒫᑎᔭᑭᐸᓐ ᒋᐐᒌᑎᔭᕽ, ᓃᓇᐎᓐᑦ ᑫᑮᓐ ᐃᑕᔥ᙮ ᑕᑲ ᓴ ᐃᔑ ᐊᔓᑕᒫᐎᔑᓈᒻ 29ᒋᒦᑳᔑᓯᐙᕽ, ᑖᐱᔥᑰ ᑳᑮ ᑑᑖᑰᔭᓐ ᐁᑮ ᐸᐹᒣᓂᒥᑰᓯᐗᓐ, ᐌᐌᓂ ᒨᔕᒃ ᐁᑮ ᑑᑖᑰᔭᓐ, ᐱᓵᓐ ᑲᔦ ᐌᐌᓂ ᐁᑮ ᐸᑭᑎᓂᑰᔭᓐ ᒋᓂ ᒫᒑᔭᓐ᙮ ᑌᐺ ᓴ ᓈᑾᓐ ᑳᑎᐯᒋᑫᒡ ᐁᑮ ᔕᐌᓂᒥᒃ, ᐅᑮᐃᑰᐞ᙮ 30ᒦᔥ ᐋᐃᓯᒃ ᐁᑮ ᑾᔮᒋᑑᒡ ᒦᒋᒻ ᐁᑮ ᐊᔕᒫᒡ, ᐁᑮ ᐐᓯᓂᐙᒡ, ᐁᑮ ᒥᓂᑴᐙᒡ ᑲᔦ᙮ 31ᐐᐸ ᓴ ᑕᔥ ᑭᑭᔐᑉ ᒣᒣᔥᑾᒡ ᑮᐋᔩᒋ ᐊᔓᑕᒫᑎᐗᒃ ᐃᐃ ᑳᑮ ᐃᓀᑕᒧᐙᒡ ᐋᓃᓐ ᐃᓇᑫ ᐙᐃᔑ ᐐᒌᑎᐙᒡ᙮ ᒦᔥ ᑳᑮ ᐴᔔᐋᒡ ᒋᓂ ᒫᒑᓂᒡ᙮ ᐱᓵᓐ ᐃᑕᔥ ᑮᐊᓂ ᒫᒑᐗᐞ᙮

32ᐃᐃ ᑕᔥ ᐁᑮᔑᑲᓂᓂᒃ ᐋᐃᓯᒃ ᐅᑕᓄᑮᐋᑲᓇᐞ ᐅᑮ ᐱ ᐐᑕᒫᑰᐞ ᐁᑮ ᐊᑣᓂᑳᑕᒥᓂᒡ ᓂᐲᓂ᙮ ᒦᔥ ᑳᐃᑯᒡ, ᓂᐱ ᓴ ᓂᑮ ᒥᑳᒥᓐ, ᐅᑮᐃᑰᐞ᙮ 33ᐊᔓᑕᒫᑎᐎᓐ ᓴ ᐅᑮ ᐃᔑᓂᑳᑖᓐ ᐃᐃ ᐅᑕᐃᐹᓐ᙮ ᒦᑕᔥ ᐲᐊᕒᔒᐸ Beersheba ᐌᒋ ᐃᔑᓂᑳᑌᒃ ᐃᐃ ᐆᑌᓇ ᑫᔮᐱ ᐅᐅ ᐃᔑ ᐊᐲ ᓅᑯᒻ ᑳᑮᔑᑲᒃ᙮

ᐄᔂ ᐐᐗᐞ ᐁᑕᔑᓱᓂᒡ

34ᐊᐲ ᓴ ᐄᔂ Esau ᓃᒥᑕᓇ 40 ᐁᑕᓱ ᐱᐴᓉᒡ ᑮᐐᐎ ᓃᔑᓐ ᐁᑦ Heth ᑳᑎᓄᐎᓂᒡ ᐃᑴᐗᐞ᙮ ᒎᑕᑦ Judith ᑮᐃᔑᓂᑳᓱᐗᓐ ᐃᓂ ᐯᔑᒃ ᐌᑌᑌᓂᒡ ᐲᐁᕒᐄ Beeri᙮ ᐃᓂ ᑕᔥ ᑯᑕᒃ ᐃᑴᐗᓐ ᐹᔑᒪᑦ Basemath ᑮᐃᔑᓂᑳᓱᐗᓐ ᐌᑌᑌᓂᒡ ᐄᓬᐊᓐ Elon᙮ 35ᒦᐗᐞ ᐃᑕᔥ ᐅᐅ ᐋᐃᓯᒃ ᐊᐊ ᑲᔦ ᐅᕒᐃᐯᑲ Rebekah ᐐᑫ ᑳᑮ ᒥᑯᔥᑳᑌᑕᒥᐃᑯᐙᒡ᙮

Currently Selected:

ᒉᓂᓯᔅ 26: OJBS

Highlight

Copy