Hamakaki 1
1
Hamakaʼa muki vayaʼmogimo huʼnaya kavafeʼmo Ala kava nefeʼmo ha paiʼniya gemae
1 #
Aiy 13:1
Ala kava neʼmoʼa mani gemo mago kana huʼniya agufa gemo Hamakana alino amiʼnigeno aulagafatiʼmo agegekana huno afiʼniye. 2#Sam 13:1-4; Yel 14:9Afitenoʼaeʼmo, O Ala kava nene, huʼna, na magi afinaʼmo nagaemo magoʼe huʼna kagaefeʼmo lokiya vaiʼna ge hisugekaeʼmo oʼafigane. Nagaemo hosu vayaʼmogi kaveta huge kame huge nehaya kavafeʼmo lokiya vaiʼna ge huʼna kaha nepaugekaeʼmo hanageke yaʼmo aliʼnaya vayaʼaina hapa noʼmane. 3#Yel 15:10; 2 Pi 2:8Na kava higekaeʼmo vayaʼai hosu kavaʼapimo alika nave neline. Na kava higekaeʼmo hosu hanageke kavaʼapimo alika nave neline. Kumaya alige vayaʼmo apamagige vayaʼmo hapaege huʼnaya kavaʼapimo naulagaleʼmo afole neʼaiye. Agoti huʼa apateteʼapaeʼmo kaveta nehae. 4#Iyi 22:26; Mk 7:9Ani kavaʼmo nehayaʼmofeʼmo keʼaepa gemoʼa lokiyaʼamo ohaneʼnigeʼa aliʼa api aiʼa oʼapateʼnageno fatago kavaʼmo afole noʼaiye. Hosu vayaʼmogi fatago vayaʼmo faiʼa vego huʼa neʼapatayaʼmofeʼmo alagepa huʼa aliʼa api aiʼa noʼapatae, huno ha paiʼniye.
5 #
Aiy 28:21-22; Ap 13:41 Ala kava neʼmoʼa geʼaleʼmo aeno atagaina huno ha painoʼaeʼmo, Ago, huʼna, nagaemo alu nofi vaya alu nofi vayaʼmogi folagapiʼmo lokiya kavaʼmo huguve. Agetapa lahapau oʼaiyo. Nagaemo lapakaemo maiʼnaya afinaʼmo lusi aliʼyaʼmo aliguve. Mago vekamoʼmo ani kavafeʼmo lapa paiʼniyesinana ani geeʼmo lama gemo huʼniye, hutapa lapakesamo oʼafiʼnaesine. 6#Loa 28:49-52; Yel 21:3-4Nagaemo Mamiloni nofi vayaʼmo aliʼna he tiʼna apategauve. Apakaemo hosu vayaʼmogeʼa apaya mukiki huʼa kamemo nehaya vayaʼmo maiʼnae. Apakaemo eʼa kamemo huʼa aeʼa apaka seteʼa alu vayaʼmogimo mopaʼapimo aligae. 7#Yel 39:5-9Apakaemo muki vayaʼmo koli yaʼmo aliʼa neʼapamigeʼapaeʼmo atete nehae. Ani hosu vayaʼmogimo alu vayaʼai geʼapimo oʼafiʼa apakaiʼapigeʼmo hapauʼniya kavaʼmo himamuʼapiletiʼmo nehae. 8#Loa 28:49; Avi 4:19Mago afela pusimoʼmo nagu nagu huno neʼviya kava huʼa hosiʼapileʼmo fai maiteʼa malage huʼa nagu nagu huʼa neʼvae. Afela kala anagaʼmogimo apaka teʼnigeʼapaeʼmo nehapaya kava huʼa umenitata huʼa nehapae. Hosiʼapileʼmo fai maiʼnaya ati vayaʼmo muga afagitegatiʼmo nagu nagu huʼa neʼae. Hakiki anagaʼmogimo kafamo aesayafeʼmo hapakumo aliʼa famukiliʼa emiʼeʼa malage huʼa aeliʼa neʼvaya agufa kavaʼmo hugae. 9#2 Kin 24:14Ani ati vayaʼmogimo kumayaʼmo alige vayaʼmo hapaege hisayafeʼmo neʼae. Yasimo alinino eno ani kahaepamo alino halelino neʼviya kava huʼa tauseni tauseniʼa ati vayaʼmo eʼa kalavusi huʼa apateteʼa apavaleliʼa ugae. 10#Yel 52:4-7Apakaemo yagaiʼnaya kini vayaʼaifeʼmo koliʼapimo osuge yagaiʼa neʼapataya vayaʼaifeʼmo koliʼapimo osuge nehuʼapaeʼmo lafi kegiʼyaʼapiʼenagi lokiya noʼapiʼenagi huʼa heta halagape vaiteta aeta apaka segaune, huʼa nehae. Lafi kegiʼyaʼapimo malagamo mopamo kafiʼa aliniʼeʼa maleme maleme haiʼnageno lafi kegiʼyaʼapimo alino ha leʼnigeʼapaeʼmo uʼa lamiʼa taoniʼapigi muki yaʼapigi huʼa neʼaliye. 11#Nen 4:30; Ham 1:16Ati vayaʼamogimo kamemo huʼa aeʼa apaka seʼnagenoʼaeʼmo kini vekamoʼmo magoʼe huno hosu kavafeʼmo agesamo afiteno magoʼe huno hosu kavaʼmo nehiye. Agaemo aigofe gotiʼamo himamuʼaletiʼmo aeʼna apaka seʼnove, huno agesamo neʼafiye, huno ha paiʼniye.
Hamakaʼa halate Ala kava nefeʼmo ha paiʼniya gemae
12 #
Sam 90:2; Aiy 10:5-7 Hamakaʼa hunoʼaeʼmo, O Ala kava nene, huʼna, kaote Gotiʼnimogae, kagaemo muki afinaʼmo neʼmaina Gotigamo maiʼnane. Lagaemo ofaligune. O Ala kava nene, huʼna, kagaemo agoti huka apateteka kayoʼmo apamisanafeʼmo gemo ago hu maleʼnane. Kagaemo lokiya yafakana huka maiʼneka alika api aika apatesanafeʼmo gemo hu maleʼnane. 13#Yop 15:15; 1 Pi 1:15-16Kaote kaulagaʼe vekamo maiʼneka hosu kavaʼmo neʼagekaeʼmo amuse osuge alagi okahauge nehiyaʼmofeʼmo hosu kavaʼmo nehaya vayaʼmo apakegeka oʼapategane. Na kava higekaeʼmo kutulu yaʼmo neʼnaya vayaʼmo apakegeka neʼapatane. Hosu vayaʼmogimo mago vayaʼmo aiseʼamo aeʼa apaka seʼa alagepa kavaʼmo huʼa maiʼnaya vayaʼmo nehapayaʼmonanafa na kava higekaeʼmo ge osuka maiʼnane. 14Na kava higeka vayaʼmo solovala anipiʼmo maiʼnaya noyamegana huka alo huka apateʼnane. Na kava higeka mopafiʼmo aise kafa anagaʼmo umenitata nehaya kafa anagaʼaiteʼmo vayaʼmogi yagaiʼa noʼapataya kafa anagakana huka vayaʼmo alo huka apateʼnane.
15 #
Yel 16:16
Mamiloni nofi vayaʼmogimo nofiteʼmo nekayamo ae maleʼneʼa noyamemo aliʼa vayu huliʼa neʼaya kava huʼa kamemo huʼa neʼapatafae. Ani kava huʼa umenifatiʼmo noyamemo neʼapatafaya kava huʼa vayaʼmo neʼapatafae. Vayaʼmogi umenifiʼmo noyame vayu huliʼa eʼa neʼapatafaya kava huʼa asole vayaʼmo apatafauʼnae. Apatafauteʼapaeʼmo apamogaga neʼaiye. 16#Loa 8:17; Ham 2:5-8Neʼapatafayaʼmofeʼmo umeniʼapilefeʼmo mono huteʼa ofalinimo neʼamiye. Apakaemo alopa umeniʼapilefeʼmo mono huteʼa alagepa atumo neʼaiya laʼnefamo atafiʼmo nekae. Umeniʼapiletiʼmo asole yaʼmo aliteʼa alagepa neʼyaʼmo neʼnae. 17Umenifatiʼmo noyamemo aliʼa neʼapatalaya kava huʼa hapau huʼa oʼapateʼa magoʼe magoʼe huʼa alu nofi vaya alu nofi vayaʼmo hapaesafiye, huno ge huno afi geʼniye.
Currently Selected:
Hamakaki 1: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
