Neyomi 3
3
Kame vayaʼapimogi eʼa Niniva taonifiʼmo maiʼnaya vayaʼe taoniʼapiʼeʼmo aliʼa hano huʼa atalesaya gemae
1 #
Iyi 22:2-3; 24:6-9 Niniva vayaʼmogitapae, huʼna, Ehetapiye, kage gage hugae taonifi vayaʼmogi uʼa muki hosu kavaʼmo huteʼa asole vayaʼmo kamitimo apamagiʼnaya vayane. Asole vayaʼmogimo asole aigofe gemo huge kumaya alige huʼa maiʼneʼa ani taonifiʼmo kili paeʼnae. Lapakaemo ani hosu kavaʼmo alagi oʼatalegae. 2-3#Aiy 37:36; Yop 39:22-25Afiyo, huno, nofiʼmo yaga auʼnageno apalo huno age aige talalamo aiyamoʼmo age aige hosimogi nagu nagu huʼa uge talalamoʼmo hakalu hakalu huge hosileʼmo fai maiʼnaya ati vayaʼmogimo vayaʼmo hapaesayafeʼmo nagu nagu huʼa uge ati vayaʼmogi naipeʼapimoʼmo alino alave alave huge hayoʼapimoʼmo alino alave alave huge nehigeʼa apakaemo lusi kava huʼa muki asole vayaʼmo kamitimo hapaeʼnageʼa faliʼnaya vayaʼmogi apakufamo alu aino haneʼniye. Faliʼnaya vayaʼmogi apakufamo lekana opaisaya agufa kava huno haneʼnigeʼa apakufaletiʼmo vai lamino hapaesiya kavaʼmo huge huʼniye. 4#Aiy 23:15-17; Le 17:1-5Ani Niniva taonimoʼmo kumai a kanomoʼa monimo neʼaliya a kanokana huno haneʼniyaʼmofeʼmo hosu kavaʼmo anonaʼalefeʼmo ani lusi kana yaʼmo aligae. Ani taonimoʼmo alagepa apaulagamo neʼagaya a kanomoʼmo haga ge huge hapaisiya agufa kavaʼmo huge nehiya a kanogana huno haneʼniye. Agaemo lusa kavaʼmo huge analisa kavaʼmo huge huteno alu nofi vayaʼe alu nofi vayaʼeʼmo apayateʼmo aliteno heno apavayu hulino vayaʼaiteʼmo kalavusi aliʼyaʼmo alisayafeʼmo maketi huno monimo aliʼniye. 5#Ney 2:13; Iyi 16:37Ala kava neʼmo muki lokiyaʼamo haneʼniya vekamoʼmo ina gemo hunoʼaeʼmo, Niniva taonie, huno, Nagaemo kame vekatapimo maiʼnove. Kagaemo kumai a kanomogeʼna kukena yakamo asagiʼna atalesugeka kagufalagaʼageʼmo maisanageʼa alu nofi vayaʼmogiʼe alu nofi vayaʼmogiʼeʼmo kagesageno kavagage hugiye. 6#Mal 2:3Nagaemo aliʼna afepiʼmo kateteʼna oʼaniʼya yaʼmo aliʼna kagufaleʼmo aiʼna atagu faiʼna malesugeka vayaʼai apaulagaleʼmo alagi hosu a kanomo maigane. Apakaemo aulu kahaeʼa kageteʼa apakameʼyamo kamigae. 7#Le 18:10; Aiy 51:19Apakaemo kagaemo kagesaya afinaʼmo mukiʼamogimo halate alime ugae. Ageyo, huʼa, Niniva taonimo noʼatufaʼageʼmo haneʼniyanageno mago vekamoʼmo agaefeʼmo hau huno oʼategaiye. Haiyategatiʼmo mago vekamoʼmo ha maesiya agufa alagepa gemo hisiya vekamo egaiye.
8 #
Aiy 19:5-6
Niniva taonie, huʼna, Kagaemo kagesa afikaeʼmo lokiyakamoʼmo Isipi kotega Timisi taonimo hogote taonimo alopa Naiyo ani agiʼnaleʼmo haneʼniya taonimo lokiyaʼamo aeka age seʼnapiye. Ani alopa aniʼmoʼa taonileʼmo faino vego huno ateʼnigeno yafa kegiʼyaʼagana huno haneʼniye. 9Itiyopiya vayaʼe Isipi vayaʼeʼmo Timisi taonifi vayaʼmogi lusi kava huʼa magoʼe magoʼe huʼa aliʼa lokiya vaiʼa apateʼnae. Lipiya kotega vayaʼe Pati kotega vayaʼeʼmo kame kavateʼmo alino afaluʼamogani yaʼmo huʼniye. 10#Aiy 20:4; Hos 13:16Huʼniyaʼmonanafa kame vayaʼapimogimo eʼa Timisi taonifi vayaʼmo kamemo huʼa ago aeʼa apaka seteʼa kalavusi huʼa apateteʼa apavaleliʼa uʼnae. Apakaemo aise mafaʼne anagaʼapimo apamagiʼnageʼa muki kataguneteʼmo faliʼnae. Apakaemo Timisi taonifi ala vayaʼmo seli nofitetiʼmo kiʼa apateteʼa apakaiʼapifiʼmo aliʼa fako huʼa afa aliʼyaʼapimo alisayafeʼmo apavaleliʼa uʼnae. 11#1 Sam 13:6Niniva vayane, huʼna, Lapakaeʼeʼmo naipamo leʼna lapateʼnova kavaʼmo kapufatiʼmo aniʼmo neteʼa negi nagi nehaya agufa vayaʼmo hamalegae. Lapaipa lapakesamoʼmo hosisigetapa kame vayatapilegatiʼmo ataletapa lapaune hegayaʼmonanafa afaʼa fala kita oʼmaigae. 12#Le 7:13Kame vayatapimogimo lokiya taonitapimo alisayafeʼmo apayamufa aliʼyaʼmo afaʼa oʼaligae. Haʼao, lokiya taonimo fiki yosamo alagamo ago afu leʼniya agufa kavaʼmo huno hanegaiye. Kame vayaʼmogimo fiki yosaleʼmo aliʼa uti uti aiʼnageno neʼyaʼageʼmo apavayafiʼmo asagauno neʼaiya agufa kava huʼa vase huʼa taonitapimo aligae. 13#Yel 51:30Ani afinaʼmo ati vayatapimogimo aʼne anagakana huʼa maigae. Lapakaemo alagepa hutapa kaʼmo oʼakaniʼnayanageʼa taonitapifiʼmo egae. Atamoʼmo lapakae taonimo yafa kegiʼya kipate lokiya kitamo legaiye.
14Kame vayaʼmogi eʼa lapakae taonileʼmo faiʼa vego hugayanagi alo hiyo. Aniʼmo he filita eyo. Kame hisaya notapimo alita lokiya vaitapa ateyo. Uta haesa mopamo alita aeta lata paisageno hapa atisigetapa noʼmo nekiya mopamo alo nehaya kesifiʼmo maleyo. Lapakaemo alinitutapa taonile kegiʼyaleʼmo maletapa lokiya vaita ateyo. 15#Hat 10:13-15Ategayaʼmonanafa ani kavaʼmoʼa afaʼa lapa oʼmaegaiye. Kame vayatapimogimo eʼa lapakaeʼe taonitapiʼeʼmo kaesagetapa falige naipeletiʼmo lapaige hugae. Akenu anagaʼmogimo neʼyaʼmo neʼa hano nehaya kava huʼa kame vayatapimogiʼmo lahapaeʼa hano huʼa lapatalegae.
Akeyaʼvilagamo lapakaemo asole akenu anagakana hutapa asole vayaʼmo afole aiʼnae. 16Vayatapimogi asole kagemi yaʼapiʼe vayaʼmo afole aiteʼa kokuʼnate kanefiʼmogi napamo ago aeʼa apaka seʼa maiʼnae. Maiʼnayaʼmonanafa akenu anagaʼmogi neʼyaʼmo neʼa hano huteʼa haleliʼa neʼvaya agufa kava huʼa lapataleʼa ago ugae. 17#Le 9:7Lapakaeteʼmo yagaiʼnaya vayaʼe gamani vayaʼeʼmo asole akenu anagakana huʼa maiʼnae. Akenu anagaʼmo yasi huʼniya afinaʼmo yafa kegiʼyafiʼmo maiʼnagenoʼaeʼmo yegemo haine neʼegeʼapaeʼmo haleliʼa neʼvae. Haiya haopalegamo haleliʼa neʼvafi huno mago vekamoʼmo noʼapake.
18 #
1 Kin 22:17
Asiliya vayaʼmogi kini vekae, huʼna, yagaiʼa apateʼnaya vayakamo apau kaleʼnae. Vayatama vayakamo mumusopafiʼmo maiʼa haga leʼnae. Vayakamo avelegamo uʼeʼa nehayanageno apavaleno alino anupa huno apatesiya vekamo oʼmaiʼniye. 19#Yel 30:13-15; Mka 1:9; Avi 2:15Niniva taoniyo, huʼna, Kamagiʼnaya kagufamo hosuʼniyanageno kaha maesiya vekamo oʼmaiʼniye. Kamuʼmo kahatesiya yaʼmo ohaneʼniye. Muki vayaʼmogimo kagaemo hosu yaʼmo aliʼnana kavafeʼmo faigoko gekamo afiteʼapaeʼmo apamogaga aiteʼa apayaʼmo amagiʼnae. Haiya vayaʼaina lusi kava huka hanageke yaʼmo apamige apamige huka oʼmaiʼnane. Haʼao, kagaemo muki vayaʼaina kana yaʼmo apamiʼnane.
Currently Selected:
Neyomi 3: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
