MATTHEW 7
7
Aa hwiinít'įįh
(Lk. 6:37,38,41,42)
1Doo nihaa nídahódóot'įįłígíí biniyé t'áadoo aa nídaaht'íní. 2Háálá bee aa nídaaht'íinii t'áá éí bik'ehgo nihaa nídahódóot'įįł, áádóó t'áá ła' bá ída'nooł'ąąd yę́ęgi ánéelt'e'go nihá ínídadí'nóol'ąął.#Mk. 4:24. 3Áko ha'át'íí biniyé nik'is binák'e oolts'idígíí níníł'į́, nidi t'áá ni nástáán ninák'ee sitánígíísh doo baa ákonínízin da? 4Éí doodaii' t'áá ni nástáán ninák'ee sitą́ągo, ha'át'éego nik'is ábididííniił, Haa'íshą' ninák'e oolts'idígíí ná haash'aah? 5T'óó áhodil'íní nílíinii, áłtsé nástáán ninák'ee sitánígíí hanitįįh, áko índa hazhó'ó ííní'į́įgo nik'is binák'e oolts'idígíí bá hadíí'ááł.
6Ha'át'íhída dílzinii t'áadoo łééchąą'í bich'į' adahołtł'iidí, áádóó nihidiichiłí t'áadoo bisóodi bich'į' adahołkaadí. Ákódaaht'į́įgo éí yik'i nidookah áádóó t'áá yiláahjį' nihich'į' dah didoojahgo danihidoo'ał.
Da'íínóhkeed, hádaaht'į́, dáádílkał nídanołts'in
(Lk. 11:9-13)
7Da'íínóhkeed, áko deínóhkeedígíí nihaa dadoolyééł; hádaaht'į́, áko hádaaht'ínígíí bik'ídadoohkah; dáádílkał nídanołts'in, áko nihá ąą ádadoolnííł. 8Háálá t'ááłá'í jinítínígo dajókeedii éí haa dahalyé, hádajit'ínígíí bik'ídajiikááh, índa dáádílkał nídazniłts'inígíí há ąą ádaalne'. 9Nihitahdóó diné ła' biye' łees'áán bíyííkeedgo da' tséésh yeidoo'ááł? 10Éí doodago łóó' bíyííkeedgo da' tł'iishísh yeidoołtééł? 11Áko nihí doo yá'ádanoht'éeh da nidi, aa doolyéełii yá'ádaat'éehii nihada'áłchíní baa dadoohłéełii nihił béédahózingo, éí bilááh át'éego nihiTaa' yá' ąąshdi hólóonii ha'át'íhída yá'ádaat'éehii bídajókeedígíí haa yiiníiłgo át'é. 12Éí bąą diné hach'į' ádaaníił le' danohsinígi át'éego nihígo yee' bich'į' ákódaahníił le',#Lk. 6:31. háálá éí bee haz'áanii áádóó Diyin God yá dahalne'ii yee nida'nitin.
Áhoołts'óózígo yah ahóót'i'
(Lk. 13:24)
13Áhoołts'óózígo yah ahóót'i'í góne' yah ahohkááh, háálá atí'oolníiłjį' hóteelgo yah ahóót'i' áádóó hóteelgo bich'į' honít'i', áko diné lą'í ákóne' yah ahikááh. 14Háálá iináajį' áhoołts'óózígo yah ahóót'i' áádóó áhoołts'óózígo bich'į' honít'i', áko t'áá díkwíí éí yik'ídahakááh.
Tsin naazkaadii áádóó dabineest'ą'
(Lk. 6:43,44)
15T'óó ádahodil'į́įgo dahalne'ii bits'ąą ádaa ádahołyą́, jó éí dibégi át'éego doo báhádzidgóó nihaa nídaakah, nidi dabiyi'di t'éí mą'iitsoh t'óó báhádzidgo dichin daazlį́į'go da'aldeełii nidahalin. 16Nidi éí tsin bineest'ą' bee bééhózinígi át'éego ádaaníłígíí bee nihił béédahózin doo. Da' ch'il deeníníísh bąąhdóó ch'il na'atł'o'ii wóbé, éí doodaii', da' hoshísh bąąhdóó fig wolyéhígíí wóbé? 17Jó, tsin yá'ádaat'éehii t'áá ałtso bąąhdóó aneest'ą' yá'át'éehii nídahoodleeł, nidi tsin nichxǫ́'ígíí bąąhdóó aneest'ą' nichxǫ́'ígíí náhoodleeł. 18Tsin yá'át'éehii bąąhdóó aneest'ą' nichxǫ́'ígíí doo hóle' át'ée da, áádóó tsin nichxǫ́'ígíí bąąhdóó aneest'ą' yá'át'éehii doo hóle' át'ée da. 19Tsin t'áá ałtso bineest'ą' doo yá'át'ééhgóó bąąh nídahadleehígíí k'ídahalne'go kǫ' biyi' góne' adahaltł'iid.#Mt. 3:10; Lk. 3:9. 20Áko tsin bineest'ą' bee bééhózinígi át'éego t'óó ádahodil'į́įgo dahalne'ii ádaaníłígíí bee nihił béédahózin doo.#Mt. 12:33.
Ts'ídá doo nihéédahasin da
(Lk. 13:25-27)
21T'ááłá'í jinítínígo, Bóhólníihii, Bóhólníihii, dashijinínígíí doo t'áá ádzíłtso yá'ąąshii bee bóhólníihgo bił haz'áanii biih dahizhdookah da, nidi t'áá háiida shiTaa' yá'ąąshdi hólóonii íinízinii bik'eh ájít'éhígíí t'éiyá. 22Éí bijį́įdi lą'í ádashididooniił, Bóhólníihii, Bóhólníihii, da' nízhi'ísh bee doo Diyin God bá nidahosiilne' da, da' nízhi'ísh bee doo níłch'i bida'iiníziinii ayi'dę́ę́' hadahineelkaad da, áádóó da' doósh ádahooníiłii ayóó ádaat'éii lą'í nízhi' bee baa nidasiikai da? 23Ákondi ádabidideeshniił, Ts'ídá doo nihééhasin da; bąąhági át'éii baa deínóhkáahii, shits'ánóhkááh.#Ps. 6:8.
Kin bitł'ááh nástł'in naaki t'áá ał'ąą át'éii
(Lk. 6:47-49)
24Áko t'ááłá'í jinítínígo díí shizaad dazdiits'a'go bida'jił'ínígíí éí diné léi' hóyą́ągo tsé'éłkáa'gi bikin niiní'ánígíí nidahojílin, 25áko nahóółtą́ índa tó dááląąd, áádóó ayóó át'éego éí kin bich'į' deeyol, nidi t'áadoo ahiih náázhoozh da, háálá tsé'éłkáa'gi niit'ą́. 26Áádóó t'ááłá'í jinítínígo díí shizaad dazdiits'a'go doo bida'jił'ínígíí, éí diné léi' doo hóyą́ą́góó séítahgi bikin niiní'ánígíí nidahojílin. 27Áko nahóółtą́ índa tó dááląąd, áádóó ayóó át'éego éí kin bich'į' deeyolgo ahiih náázhoozh. Dooládó' ahiih ná'ííłdáaz da!
28Ákohgo Jesus díí saad ałtso bee hadzoodzíi'go diné yíl'áhígíí hana'nitin bik'ee t'óó bił adahóóyóí, 29háálá naat'áanii ídlį́įgo na'nitinígíigi át'éego naz'neeztą́ą́', bee haz'áanii yínda'niłtinii nahalingo éí dooda.#7:28,29 Jesus t'áá bí bił bééhózinígíí yee naz'neeztą́ą́'. Doo ła' yikék'ehgo da. Mk. 1:22; Lk. 4:32.
Currently Selected:
MATTHEW 7: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).