MATTHEW 8
8
Jesus éí diné łóód ats'íís yiyáanii naałdzidii bee bąąh dah haz'ą́ągo néidiisá
(Mk. 1:40-45; Lk. 5:12-16)
1Dził bąąhdę́ę́' hadáádzoodzáago, diné ayóó ánéelą́ą́' hakéé' nooyééł, 2áko jó'akon, diné ła' łóód ats'íís yiyáanii naałdzidii bee bąąh dah haz'ą́ą́ léi' haa níyá, áádóó hach'į' nahasáago ání, Bóhólníihii, íinínízin ládą́ą́' nááshididííłááł.#Lev. 13:1-46. 3Áko Jesus k'ídeesníi'go hodeelchid#8:3 Diné ła' łóód ats'íís yiyáanii t'óó yideelchidgo bee haz'ą́ k'ehgo hwí ałdó' hąąh dahaz'ą́ągo baa nitsáháskééz. kóníigo, Íinisin lą́ą; łóód nąąh óodįįh. T'áá áko łóód ats'íís yiyáanii naałdzidii yę́ę hąąh ásdįįd. 4Áádóó Jesus áhodííniid, T'ááká diné ła'da bił hóólne' lágo, nidi nílááh dah diináahgo náá'iiłniihii bíni'dii átsé niníł'į́, áádóó nááhidoonihii t'áá Mózes yee nihoní'ánígi át'éego nááhidííłnih,#Lev. 14:1-32. áko éí bee nilóód náádzí'ígíí diné bił béédahózin doo.
Jesus éí siláo neeznádiingo yinanit'a'í nilíinii bá naal'a'í néidiisá
(Lk. 7:1-10)
5Áádóó Kapérniyamgi jiníyáago siláo neeznádiin yilt'éego binanit'a'í nilį́į́ léi' hach'į' niníyáago náhookąąh, 6áko áháłní, Bóhólníihii, diné shá naal'a'ígíí doo bitah nahwii'náágóó t'áá íiyisí ti'hooníihgo hooghandi sitį́. 7Áko Jesus áhodííniid, Ákǫ́ǫ́ deesháałgo nááhodideeshłááł. 8Nidi siláo binanit'a'í hanáánáádzíi'go ání, Bóhólníihii, shighan góne' shił yah adíínáałgi doo bą́ą́h anishłį́į da, nidi t'óó saad bee handziih, áko shá naal'a'í náádidoodááł. 9Háálá shí ałdó' shinanit'a'í hólǫ́, áádóó siláo binanit'a'í nishłį́, áko ła', Ákǫ́ǫ́ díínááł, bidishniihgo dah diighááh, náánáła', Hágo, bidishniihgo shaa yighááh, áádóó shinaalte', Kónínééh, bidishniihgo t'áá áko éí yi'iił'įįh. 10Áko Jesus éí yidiizts'ą́ą'go t'óó bił ahóóyóí, áádóó bikéé' nidaakaígíí áyidííniid, T'áá aaníí ánihidishní, Oodlą́ ayóó át'éii Ízrel dine'é bitahgi nidi, t'ah doo kót'éii bik'ínísháah da. 11Áádóó ánihidishní, Ha'a'aahdę́ę́' índa e'e'aahdę́ę́' diné lą'í nidahidookah, áádóó yá'ąąshii bee bóhólníihgo bił haz'ą́ądi Éíbraham áádóó Áízak índa Jéíkab yił da'dooyį́į́ł biniyé yił dah dínóobįįł,#Lk. 13:29. 12nidi yá'ąąshii bee bóhólníihgo bił haz'áanii hwíí' dadooleeł yę́ę tł'óó'dóó yówehjį' chahałheełjį' ahodi'yooltł'ił; áadi diné daachxa áádóó biwoo' ahídeidiłk'ash doo.#Mt. 22:13; 25:30; Lk. 13:28. 13Áko Jesus éí siláo binanit'a'í áyidííniid, Nílááh yínááł; t'áá iinídlánígi át'éego ná ádoolnííł. T'áá áko hanaal'a'í náádiidzá.
Jesus éí diné t'óó ahayóí hadaałt'é áńdayiidlaa
(Mk. 1:29-34; Lk. 4:38-41)
14Áádóó Peter bighan góne' Jesus yah ajííyáago, Peter be'asdzą́ą́ bimá bitah honeezgaigo sitį́įgo jiiłtsą́, 15áko bíla' bizhdeelchidgo, tah honiigááh yę́ę bits'áldoh, áko nídii'na'go há chooz'įįd. 16T'áá éí bee i'íí'ání, níłch'i bi'iiníziinii bii' dahólóonii lą'í hach'į' yił neheeskai, áko t'ááłáhídi hadziidziihgo níłch'i bida'iiníziinii haz'niiskaad, índa diné bitah dahoneezgai t'áá ałtso hadaałt'é áńdajiidlaa. 17Kót'éego baa nijiyáhígíí, Aizéíyah, Diyin God yá halne'ii, yaa hoolne'ígíí bohodoolnííł biniyé baa nijiyá, T'áá hó, doo nihitah dahółdzilii ák'ijį' kójiilaa, índa nihitah dahoneezgaii bá dziizį',#Is. 53:4. dííniid.
Jesus yikéé' dayíkáah dadooleeł nít'ée'ii
(Lk. 9:57-62)
18Nít'éé' Jesus binaagi diné t'óó ahayóí yíl'áago yiyiiłtsą́ągo, Wónaanígóó diikah, dííniid. 19Nít'éé' bee haz'áanii yínda'niłtinii ła' níyáago áhodííniid, Na'nitiní, t'áá nanináágóó nikéé' naasháa doo. 20Áko Jesus áháłní, Mą'ii dootł'izhí be'a'áán dahólǫ́, áádóó tsídii wódahgo nidaat'a'ígíí bit'oh dahólǫ́, nidi Diné Silį́į'ii éí t'áadoo nizhnót'áałgi da. 21Áádóó ídahooł'aahii náánáła' ábidííniid, Bóhólníihii, áłtsé shizhé'é łeeh deeshtééłgóó#8:21 Shizhé'é łeeh deeshtééł, jiníigo éí, Shizhé'é daaztsą́ąjį' baa áháshyą́ą doo, jiníigo óolyé. nídeeshdáałgo bee sha'di'ní'aah. 22Nidi Jesus áhodííniid, Shikéé' yínááł, áádóó bíni'dii daneeznáanii t'áá bí łeeh da'ahii'nííł.
Jesus tó náádadiidáahii índa níyol hasht'eidííłt'e'
(Mk. 4:35-41; Lk. 8:22-25)
23Áádóó tsinaa'eeł biih jííyáago hódahooł'aahii hakéé' iih yíjéé'. 24Áádóó jó'akon, táłkáa'gi ayóó át'éego deeyolgo, tó náádadiidáhígíí tsinaa'eeł biih yilk'ooł, nidi Jesus éí ajiłhosh. 25Áko hódahooł'aahii hach'į' niikaigo ch'éédahasidgo ádaaní, Táłtł'ááh yiildaas, Bóhólníihii, yisdánihínííł. 26Nít'éé' áháłní, Ha'át'éegoshą' nídasoołdzííd, t'įįhdígo da'iinohdláanii? Áko yiizį'go níyol índa tó yideezteh, áko t'áá íiyisí hodiiyeel. 27Áko hódahooł'aahii t'óó bił adahayóigo kódaaní, Díí lá ha'át'íí diné shį́į́ át'į́įgo, níyol áádóó tó nidi bik'eh dahół'į́?
Gérgasa dine'é nidilt'éego níłch'i bida'iiníziinii bii' hólóonii hanoolkaad
(Mk. 5:1-20; Lk. 8:26-39)
28Wónaaníjį' Gérgasa#8:28 Diyin God bizaad t'áá ałk'idą́ą́' bee ak'eda'ashchínígíí ła' kót'éego dabikáá', Gádara dine'é; ła', Gérasa dine'é. dine'é bikéyahjį' ha'naa nida'dzis'éelgo, dajishcháá'dę́ę́' diné nidilt'éego níłch'i bida'iiníziinii tsi'nabiił'aashgo hadááh ahi'neelchą́ą́', éí t'áá íiyisí báhádzidgo bąą diné ła' doo áajigo ch'óoya' át'ée da. 29Nít'éé' jó'akon, éí kóníigo hadoolghaazh, Haashą' nihíléehgo ánít'į́,#8:29 Haashą' nihíléehgo ánít'į́, daanínígíí éí hashké danízingo yaa halne'. Jesus, Diyin God biYe' nílíinii? Atínihidi'doolníłígíí t'ah doo baa hoolzhíish da nidiísh atínihidíílíiłgo biniyé yíníyá? 30Áko éí áádóó t'áá nízaadi bisóodi lą'í nida'ałchozh. 31Áko níłch'i bida'iiníziinii nídahookąąhgo ádaaní, Hanihiníłkaad ládą́ą́', níléí bisóodi naakaígíí biih danihidííł'aał. 32Áko ábizhdííniid, Nihílááh lą́ą. Áko níłch'i bida'iiníziinii éí diné yiyi'dę́ę́' hahaazhjée'go bisóodi yiih heezhjéé', áko jó'akon, bisóodi t'áá ałtso bidah ch'ééjée'go be'ek'id yiih heezhjéé', áko tó bííghą́ą́'. 33Áko bisóodi baa ádahojilyánígíí dashdiijée'go kin haal'áágóó aníjííjée'go, éí áhóót'įįdígíí t'áá ałtso índa diné níłch'i bida'iiníziinii bii' hólónę́ę bii' hanoolkaadígíí baa dahojoolne'. 34Áko kin haal'áádóó diné t'áá ałtso ch'íheezhjée'go Jesus bidááh náznísą́. Áko dajiiłtsą́ągo nídajookąąhgo ádajiní, Nihikéyahdóó nówehjį' haninááh.
Currently Selected:
MATTHEW 8: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).