MATTHEW 6
6
Jesus éí hojooba' ádaat'éii bíká aná'ájahgi yína'niłtin
1T'óó diné yee danihiníł'į́į doo biniyé diné binááł jooba' bee ádaahníłígíí bits'ąą ádaa ádahołyą́;#Mt. 23:5. ákódaaht'į́įgo nihiTaa' yá'ąąshdi hólóonii nihaidooléełii ádin doo.
2Éí bąą hojooba' ádaat'éii bíká ánánílwo'go diné t'óó áhodil'íinii ádaat'ínígi át'éego dilní t'áadoo ádílą́ąjį' diniłts'a'í. Éí kin bii' áłah nída'adleehgóó índa kintaa aztiingóó diné t'óó baa dahaniih doo biniyé ádaat'į́. T'áá aaníígóó ánihidishní, Éí hach'į' nidadoolyéełii t'áá íídą́ą́' hwee dahazlį́į́'. 3Nidi níla' nish'náájí bee hojooba' ádaat'éii bíká anánílwo'go níla' nishtł'ajíígíí éí t'áadoo bił bééhóziní íínísin. 4Áko áká anánílwo'go t'áadoo yi'niihí baa naniná, áko niTaa' t'áadoo yi'niihí ááníiłii yoo'íinii, éí na'doolééł.
Jesus sodizin yína'niłtin
(Lk. 11:2-4)
5Áádóó diné t'óó ádahodil'į́įgo sodadilzinígi át'éego t'áadoo sodílziní, háálá éí diné danihiníł'į́į doo, danízingo kin bii' áłah nída'adleehgóó índa kintahgi naańda'aztiingóó naazį́įgo sodadilzingo bił dahoneełni.#Lk. 18:10-14. T'áá aaníí ánihidishní, Éí hach'į' nidadoolyéełii t'áá íídą́ą́' hwee dahazlį́į́'. 6Nidi sodílzingo doo naagháhí góne' yah anáńdáahgo ádáńdílkałgo niTaa' doo yit'į́į́góó hólóonii bich'į' sodílzin, áko niTaa' t'áadoo yi'niihí ááníiłii yoo'íinii, éí na'doolééł.
7Áádóó sodadołzingo, doo Jew dine'é danilíinii ádaat'ínígi át'éego saad t'áadoo biniyéhí daígíí t'áadoo háádahołt'éhí, háálá ákót'éego saad lą'í bee haasdzíi'go shá dazdidoots'į́į́ł danízin. 8Éí bąągo t'áadoo éigi ádanoht'éhí, háálá bídin danohłį́įgo chodaoł'ínígíí nihiTaa' bídeínóhkeed dooígíí t'áá íídą́ą́' bił bééhózin. 9Kót'éego sodadołzin:
NihiTaa' yá'ąąshdi honílóonii,
nízhi' diyingo óolzin le',
10Bee nóhólníihii náásgóó k'ee'ąą yilzhish le'.
Áádóó bee íinínízinii t'áá yá'ąąshdi ááníłígi át'éego
nahasdzáán bikáa'gi ááníił le'.
11Ch'iyáán t'áá ákwíí jį́ niha'iyíłtsódígíí díí jį́ nihaa náádiní'aah.
12Áádóó t'áá nihich'į' bąąhági ádaaníiłii bá yóó'adahidiit'aahígi át'éego nich'į' nida'ayiilzíhígíí nihá yóó'ahidí'aah.
13Áádóó nihí hodínóotahjį' nihi'óółnííh lágo,
nidi bąąhági át'éii bits'ą́ąjį' yisdánihiyínííł.
[Háálá ahóyéel'áágóó ni t'éí nóhólnííh áádóó t'áadoo bee nóodziilí da, índa ayóó ánít'é.
T'áá ákót'ée doo.]
14Háálá diné nihich'į' doo ákǫ́ǫ́ ádáát'įįdii bá yóó'adahidoh'aahgo nihiTaa' yá'ąąshdi hólóonii bich'į' doo ákǫ́ǫ́ ádaot'įįdii ałdó' nihá yóó'iidii'aah doo, 15nidi diné nihich'į' doo ákǫ́ǫ́ ádáát'įįdii doo bá yóó'adahidoh'aahgóogo, nihiTaa' bich'į' doo ákǫ́ǫ́ ádaot'įįdii ałdó' doo nihá yóó'iididoo'áał da.#Mk. 11:25,26.
Jesus hodílzingo doo adą́ągi yína'niłtin
16Hodílzingo doo adą́ baa naahkaigo diné t'óó ádahodil'į́įgo yínííł yił nidaakaígi át'éego t'áadoo ákódanoht'éhí, éí binii'jį' haa'í lá doo ádayooł'įįł da, hodílzingo doo adą́ yaa naakaígíí éí t'óó diné yee danihiníł'į́ danízingo ádaat'į́. T'áá aaníí ánihidishní, Éí bich'į' nidadoolyéełii t'áá íídą́ą́' bee dahólǫ́. 17Nidi hodílzingo doo adą́ baa nanináago nitsii' náníłtłah áádóó ninii' tánínánígis, 18áko hodílzingo doo adą́ baa nanináhígíí diné doo ná dayoo'į́į da doo, niTaa' doo yit'į́į́góó hólóonii t'éiyá ná yoo'į́į doo, áádóó niTaa' t'áadoo yi'niihí ááníiłii yoo'íinii, éí na'doolééł.
Yá'ąąshdi naalye'é da'ílíinii
(Lk. 12:33,34)
19Nahasdzáán bikáa'gi ch'osh ałchozhii hólǫ́ǫgi, áádóó t'áadoo le'é nídahidiniichxíihgi,#Jas. 5:2,3. índa ani'įįhii kin yighá da'anilgo da'ni'įįhgi, nihinaalye'é da'ílíinii t'áadoo ádá hasht'e' nidahidoh'níłí, 20nidi yá'ąąshdi ch'osh ałchozhii ádindi, áádóó t'áadoo le'é doo nídahidiniichxíihgi, índa ani'įįhii doo kin yighá da'anilgo da'ni'įįhdi, nihinaalye'é ádá hasht'e' nidahidoh'nííł. 21Háálá nihinaalye'é siláadi t'áá ákwii ałdó' nihijéí hólǫ́ǫ doo.
Ats'íís yá adiníłdíinii
(Lk. 11:34-36)
22Bee hool'iní bee adinídínígi át'éego anáá' bee ats'íís bá adinídíín. Éí bąą nináá' yá'át'éehgo nits'íís t'áá át'é bił hool'in doo, 23nidi nináá' doo yá'át'ééhgóó nits'íís t'áá át'é bił chahałheeł doo. Áko éí bąągo niyi'di adinídíín dooleeł yę́ę éí t'áá át'é chahałheeł nilį́įgo dooládó' chahałheeł da doo!
Diyin God áádóó at'į́
(Lk. 12:22-31; 16:13)
24Diné ła'da doo t'áá łahjį' naat'áanii naaki bá nijól'a' át'ée da, háálá ła' bik'eezhdiniih doo, ła' éí ayóó'ájó'níi doo, éí doodaléi' ła' doo nahdi jó'níi da doo, ła' éí jijoołáa doo. Diyin God índa at'į́ doo t'áá łahjį' bá nijól'a' át'ée da.
25Éí bąą ánihidishní, Ha'át'íí lá deeshį́į́ł lá? doodaii', Ha'át'íí lá deeshdlį́į́ł lá? doodaii', Ha'át'íí lá bee hadideeshnííł lá? t'áadoo danohsingo bee dahinohnáa dooleełígíí bíká ádił nídahodoł chiłí. Jiinánígíí éísh ch'iyáán doo biláahgo ílį́į da, áádóó hats'íísísh éé' doo biláahgo ílį́į da? 26Tsídii wódahgo nidaat'a'ígíí danół'į́: éí doo k'ééda'didléeh da, doo nidi nída'agish da, índa doo nooh nída'ałchíih da, ákondi nihiTaa' yá'ąąshdi hólóonii ba'ałtso'. Da' nihíísh doo éí biláahgo da'nohłį́į da? 27Áádóó nihí ła' ádił náhodołchiłgo hinohnánígíí t'įįhdígoósh bilááh ádoohłíiłgo bínooł'ą́? 28Áko ha'át'íísh biniyé nihi'éé' bíká ádił nídahodołchił? Nihokáá'góó ch'ilátah hózhóón nidanise'ígíí baa nitsídaahkees, éí doo nidaalnish da, índa doo da'adiz da, 29nidi ánihidishní, Azhą́ Sálaman ayóó ájít'éé nít'éé' nidi,#1Kgs. 10:4-7; 2Chr. 9:3-6. doo ła' díí hadadít'éhígi át'éego hazhdít'ée da nít'éé'. 30Éí lá bąą Diyin God nihokáá'góó ch'ilígíí díí jį́ nidanise'go, áádóó yiską́ągo konk'eh góne' ahidoolkałígíí nidi nizhónígo haidósingo, t'įįhdígo da'iinohdláanii, da' ákoósh éidíígíí biláahgo doo hadadinoht'éego ánihósin da? 31Éí bąą, Ha'át'íí lá dadiidį́į́ł lá? doodaii', Ha'át'íí lá dadiidlį́į́ł lá? doodaii', Ha'át'íí lá bee hadadiniit'ée dooleeł lá? t'áadoo dadohníigo ádił nídahodołchiłí. 32Háálá doo Jew dine'é danilíinii éidí t'áá ałtso hádaat'į́; jó nidi, nihiTaa' yá'ąąshdi hólóonii díidí t'áá ałtso bídin danohłį́įgo chodaoł'ínígíí nihá bił bééhózin. 33Nidi Diyin God bee bóhólníihgo bił haz'áanii áádóó yee ts'ídá t'áá ákogi át'éii alą́ąjį' hádaaht'į́, áko éidí t'áá ałtso nihá bíidoolyééł.
34Éí bąą yiską́ągo áhoot'ée dooleełígíí t'áadoo bíká ádił nídahodołchiłí, háálá yiską́ągo bíká ádił nídahodichiłii dahólǫ́ǫ doo. Ła'a jį́ bii' ach'į' nahwii' ná nihwiileehígíí bíni'dii t'áá ákódígo ach'į' nahwii'ná hólǫ́.
Currently Selected:
MATTHEW 6: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
