Filipai 3

Ko Hono Tali Kita ‘e he ‘Otuá

1Ko hono faka‘osí, kāinga, mou fiefia ‘i he ‘Eikí. ‘Oku ‘ikai ko e fakaongosia kiate au ‘eku toe tohi atu he ‘ū me‘a na‘á ku ‘osi tohi atu aí. Ko hono mo‘oní, ‘e kau lelei ia kiate kimoutolu. 2Tokanga‘i e kau anga‘i kulī ko ená, ‘a e fa‘ahinga ‘oku nau holi ke kamu kimoutolú. 3‘Oku ‘ikai ko kinautolu ‘a e kau kamu mo‘oní, ka ko kitautolu ‘oku tau lotu ki he ‘Otuá ‘i he ivi ‘o hono Laumālié, mo tau pōlepole pē ‘ia Sīsū Kalaisí. ‘Oku ‘ikai te tau fakafalala kitautolu ki ha ngaahi ouau fakatu‘asino. 4Ka neongo ia, ka u ka pehē ke u fakafalala ki ha ngaahi ouau fakatu‘asino, te u mo‘oni pē au ia. Pea kapau ‘oku toe ‘i ai mo ha taha ‘okú ne lau ‘oku ‘i ai e me‘a ke ne fakafalala ai ki ha ngaahi me‘a fakatu‘asino, ‘e ‘ikai pē ke kākākunga ia kiate au. 5He na‘e kamu au ‘oku ou kei ‘aho valu pē. Pea ko e ‘Isileli au he matakali Penisimaní. Ko e tupu‘i Hepelū mo‘oni au. Pea ka lau ki he mamahi‘i e Lao, na‘á ku kau au he fa‘ahi ‘a e kau Fālesí. 6Peá u a‘u ai pē ‘o fakatanga‘i e siasí koe‘uhí ko ‘eku fu‘u fie fai mālohi he lotu faka-Siú. Na‘á ku fai ‘e au e me‘a kotoa pē ‘oku tu‘utu‘uni he Lao ke hoa ai ‘ete mo‘uí mo e finangalo ‘o e ‘Otuá.

7Ka ko e ngaahi me‘a kotoa na‘á ku mahu‘inga‘ia aí, kuó u lau kinautolu ko e fakamasiva ki he‘eku mo‘uí, koe‘uhí ko Kalaisi. 8‘Oku ‘ikai pē ha me‘a ia ‘e kākākunga ki he‘eku a‘usia ‘a Kalaisi Sīsū ko hoku ‘Eikí. Kuó u to‘o ‘eku falalá mei he me‘a kehe kotoa pē, ‘o lau ia ko e veve. Ko e me‘a ‘oku ou fie ma‘u ‘e aú, ke u a‘usia ‘a Kalaisi 9mo fakapapau‘i ‘eku kau ‘iate iá. Na‘e ‘ikai pē ke lava ke tali au ‘e he ‘Otuá ‘i he‘eku kei mo‘ui‘aki ‘a e Laó. Na‘e tu‘unga pē hono tali au ‘e he ‘Otuá ko ‘eku tui kia Kalaisí ‘ata‘atā. 10Ko e me‘a pē ‘oku ou fie ma‘ú, ke u a‘usia ‘a Kalaisi pea mo e ivi na‘e fokotu‘u ai ia mei he maté ‘o ne mo‘uí. Ko hoku lotó, ke u a‘usia ‘a e ngaahi fa‘ahinga faingata‘a na‘á ne faingata‘a‘ia aí, pea mo e mate‘anga na‘á ne mate aí, 11hei‘ilo te u toe tu‘u mo au mei he maté ‘o mo‘ui.

Ko e Tutui Atu ki he Palé

12‘Oku ‘ikai te u pehē ‘e au kuó u ‘osi a‘u ki he taumu‘a ko iá. ‘Oku ‘ikai te u pehē ‘oku ou haohaoa. Ka ‘oku ou tutui mo vilitaki atu pē, hei‘ilo te u a‘u ki ai. 13Kāinga, ‘oku ‘ikai te u pehē kuó u ‘osi ma’u ia. Ka ‘oku ou fakangalonagalo‘i e ngaahi me‘a kuo mahili atú, mo kakapa atu ki he ngaahi me‘a kuo tuku mai mei mu‘á. 14‘Oku ou tutui atu ki he tepí, ka u ma‘u e palé. Ko e pale ko iá, ko e ui mai ia ke te hū ā ki Hēvani. Pea ‘oku foaki ‘e he ‘Otuá ‘a e pale ko iá koe‘uhí ko e me‘a kuo fai ‘e Kalaisi Sīsuú. 15‘Ofa ke pehē ‘a e fakakaukau ‘a kitautolu kotoa ‘oku matu‘otu‘a fakalaumālié. Pea ko koe ‘oku ‘ikai ke pehē ho‘o fakakaukaú, ‘e toki fakamahino atu mo ia ‘e he ‘Otuá kiate koe. 16Kehe pē ke tau pipiki he ngaahi me‘a kuo tau ‘osi a‘usiá. 17Kāinga, mou fa‘ifa‘itaki kiate au. Mou ako meiate kinautolu kotoa pē ‘oku nau muimui he ngaahi sīpinga mo‘ui na‘a mau faí. 18Kuo tu‘o lahi ‘eku fa‘a fakatokanga atu kiate kimoutolu, ‘oku ‘i ai e tokolahi kuo nau hangē ko ha kau fakafili kia Kalaisí ‘i he anga ‘o ‘enau tō‘onga mo‘uí. Pea ‘oku ou toe fakatokanga atu pē heni, mo e tangi lo‘i matá. 19Ko e fa‘ahinga ia ‘oku hu‘u ki heli ‘enau mo‘uí, he ‘oku nau ‘otua ‘aki pē honau keté. ‘Oku nau futa‘aki ‘enau ngaahi tō‘onga mo‘ui fakamaá. Ko e ngaahi me‘a fakamāmani pē ‘oku nau tokanga ki aí.

20Ka ko e kakai kitautolu ‘o hēvani. Pea ‘oku tau lolotonga talitali fiefia ki he liuaki mai mei hēvani ‘a hotau Fakamo‘uí, ‘a e ‘Eiki ko Sīsū Kalaisi. 21He ‘okú ne ma‘u mafai ki he me‘a kotoa pē. Pea te ne hanga ‘o liliu hotau sino mate ngofua ko ení ke hangē ia ko hono sino fakahēvaní ‘o’ona.

Currently Selected:

Filipai 3: TCNT

Highlight

Copy