Filipai 4

Ko ha Ngaahi Ekinaki

1Kāinga, ‘oku ou ‘ofa lahi atu kiate kimoutolu. Pea ‘oku ou mate he fie fe‘iloaki mo kimoutolú. Mou ‘ofa ‘o tu‘u ma‘u ‘i he ‘Eikí. He ko kimoutolú, ko e pōlepole‘anga mo e fiefia‘anga ‘eku mo‘uí.

Ko e Fakalotolahi‘i ‘e Paula e Kaungāfononga ‘o e Eikí

2‘E ‘Iuotia mo Siniteke, mo ‘ofa mu‘a ‘o loto-taha. He ‘okú mo kau he kakai ‘a e ‘Eikí. 3Mo koe foki, hoku hoa ngāué, ‘oku ou kole atu ke ke tokoni‘i ‘a e ongo fefine ko ená. He na‘á na kaungāngāue fakataha mo au mo Kelemeni mo hono toé ‘i hono fakamafola e ongoongo leleí. Kuo ‘osi tohi kātoa honau hingoá he tohi ‘o e mo‘uí. 4Fiefia ma‘u pē homou lotó koe‘uhí ko e ‘Eikí! Ka u toe ‘ai atu, Fiefia ma‘u pē homou lotó. 5Kātaki‘i ma‘u pē ‘a e ngaahi anga ‘o e kakai kehé. Kuo vavé ni ‘a e liuaki mai ‘a e ‘Eikí. 6‘Oua te mou loto-mo‘ua ki ha me‘a. Hūfia ho‘omou me‘a kotoa pē. Fai loto-hounga mo loto-fakafeta‘i ho‘omou ngaahi kole ki he ‘Otuá. 7Kuo mou kau he kakai ‘a Kalaisi Sīsuú. Pea ‘e tāpuaki‘i kimoutolu ‘aki ‘a e nonga. Ko e nonga ia ‘oku ‘ikai ha taha te ne lava ‘o tatae. Pea ‘e toka ma‘u ‘a e nonga ko iá ‘i homou ‘atamaí mo homou lotó. 8Ko hono faka‘osí, kāinga, hanga ma‘u pē ho’omou fakakaukaú ki ha ngaahi me‘a ‘oku mo‘oni, ki ha ngaahi me‘a ‘oku ma‘a, mo faka’ei’eiki, mo mā‘oni‘oni, mo faka’ofo‘ofa, mo taau. ‘Ilonga ha ngaahi me’a ‘oku ‘aonga mo’oni; ‘Ilonga ha ngaahi me’a ‘oku taau mo e fakamālō ‘a e kakai mou tokangá ki he ngaahi me‘a ko iá. 9Kuo mahino lelei kiate kimoutolu ‘a e ngaahi fakahinohino na‘á ku fai atú. Pea pehē pē ki he ngaahi me‘a kehe na‘á ku lea‘akí, mo e tō‘onga mo‘ui na‘á ku faí. Mou muimui ai. Pea ‘e kau leva mo kimoutolu ‘a e ‘Otuá. Ko e ‘Otua fai fakanonga ia.

Ko e Fakamālō ‘a Paula ki he Me‘a‘ofa na‘e Foaki ki aí

10‘Oku hounga ‘aupito ki he‘eku mo‘uí ‘a e faifai pea mou toe tokanga mai kiate aú. Ko hono mo‘oní, na‘a mou tokanga mai. Ka na‘e ‘ikai hamou faingamālie ke fakahaa‘i mai. 11‘Oku ‘ikai ko ‘eku hanu eni koe‘uhi ko ha’aku masiva. He kuó u ‘osi lava ‘o fiemālie ‘i ha me‘a pē ‘oku ou ma‘u. 12Kuó u ‘osi a‘usia ‘e au e tu‘umālié mo e tu‘utāmakí. Pea kuó u ‘osi lava‘i ‘a e fa‘ahinga nofo kehekehe; ‘Oku ou maheni he mākoná mo e fiekaiá. ‘Oku ou maheni he ma‘u me‘á mo e fusimo‘omó. 13‘Oku fakaivia au ‘e Kalaisi ke u lava ‘o fehangahangai mo ha fa‘ahinga me‘a pē.

14Ka ‘oku ou fakamālō atu ki ho‘omou fie tokoni‘i au ‘i he ngaahi faingata‘a lalahi na‘e hoko kiate aú. 15‘Oku mou kei manatu‘i lelei foki, kāinga Filipai, ‘a e anga ‘o ‘eku kamata fakamafola ‘a e ongoongo leleí ‘i Masitōniá. Na‘á ku hiki mei Masitōniá, ko kimoutolu pē ‘a e siasi na‘e kei fie fetokoni‘aki mo aú. 16Pea a‘u ki he‘eku nofo ‘i Tesalonaiká, na‘e ‘ikai ke tu‘o taha pē ho‘omou tokoni‘i aú. 17‘Oku ‘ikai ko ‘eku feinga eni ke ma‘u ha me‘a meiate kimoutolu. ‘Oku ou faka‘amú ke mou a‘usia ‘a e ngaahi tāpuaki ‘okú te ma‘u mai he‘ete foaki atú.

18Kuo ‘osi fetongi mai ‘eku ngaahi foaki ‘a‘akú. Pea kuo ‘omi mo e tupú. Kuó u faingamālie ‘aupito he ngaahi me‘a‘ofa na‘a mou fekau ‘a ‘Epafalotaito ke ha‘u mo iá. Ko e ngaahi ‘ofa ia ‘oku hange ha feilaulau namu-kakalá. ‘Oku hoa ia mo e finangalo ‘o e ‘Otuá. 19Tauange mo e ‘Otuá ke ne tāpuni atu ho‘omou ngaahi fe‘amokakí mei he mahutafea ‘o Kalaisi Sīsuú. 20Fakafeta‘i ki he ‘Otuá ko ‘etau Tamai ke ta‘e ngata pea ta‘e ngata.

Ko e Pōpoaki Faka‘osi

21‘Ofa atu ki he fa‘ahinga kotoa kuo kau he kakai ‘a e ‘Otuá koe‘uhí ko Kalaisi Sīsuú.

Ko e kāinga lotu kotoa ‘i hení, ‘oku nau kau fakataha mo au he pōpoaki ‘ofa atu kiate kimoutolú.

22‘Oku ‘ofa atu kiate kimoutolu ‘a e kakai kotoa ‘a e ‘Eiki ko Sīsū Kalaisí, pea tautautefito kiate kinautolu he loto‘ā ‘o Sisá. 23Tauange ke mou ‘inasi ai pē he ‘alo‘ofa ‘a e ‘Eiki ko Sīsū Kalaisí.

Currently Selected:

Filipai 4: TCNT

Highlight

Copy