Filipai 2

Ko e Afeitaulalo ‘a Kalaisí

1Kuo tāpuaki‘i lahi kimoutolu. Kuo fakaivia kimoutolu ‘e Kalaisi. Kuo nonga ho‘omou mo‘uí koe‘uhí ko ‘ene ‘ofá. Kuo mou uouongataha ‘i he Laumālié. 2Pea mou ‘ofa mai ā ‘o fakakakato ‘eku fiefiá ‘aki ha‘amou taha he fakakaukaú, ‘ofá, lotó, mo e laumālié. 3‘Oua te mou mo‘ui sio kita, pe sio lāngilangi. Ka mou anga-fakatōkilalo ma‘u pē. Pea hapai ma‘u pē ‘a e kakai kehé. 4Tokanga ma‘u pē ki he‘enau ngaahi fie ma‘ú, ‘o ‘ikai ko e ngaahi fie ma‘u pē ‘amoutolú. 5‘Ai ke mou loto-taha mo Kalaisi Sīsū,

He neongo ‘ene mātu‘aki tatau mo e ‘Otuá,

6ka na‘e ‘ikai te ne holi ke nofo he‘ene tatau mo e ‘Otuá.

7‘Io, na‘á ne tuku ange ‘ene me‘a kotoa pē,

‘o ne hoko ko e tamaio‘eiki

‘i hono fanau‘i mai ‘e ha fefine,

‘o hangē pē ko kitautolú.

8‘I he‘ene hoko leva ‘o tangatá,

na‘á ne fie mo‘ulaloa ‘o mo‘ui talangofua,

‘o a‘u ai pē ki he‘ene mate kalusefai.

9Pea kuo mātu‘aki hakeaki‘i ai ia ‘e he ‘Otuá,

mo fakahuafa ‘aki ‘a e huafa taupotú.

10Pea ko e huafa ko iá

‘e tō tū‘ulutui ki ai ‘a e toko taha kotoa pē ‘i langi,

mo māmani, mo lolo-fonua.

11Pea ‘e toki fakamo‘oni‘i ai ‘e he kakai kotoa pē

ko e ‘Eikí pē ‘a Sīsū Kalaisi,

pea ‘e lāngilangi‘ia lahi ai

‘a e ‘Otuá ko e Tamaí.

Ko e Ulo Atu ‘i Māmani

12Ko ia ai, kāinga, mou ‘ai mu‘a ke laka ange ho‘omou tali angi mai ‘i he‘etau fepulingaki ko ‘ení ‘i ho‘omou tali angi mai ‘i he‘eku kei nofo ‘i hená. ‘Oua na‘a tuku ho‘omou ngāue malohi ki homou fakamo‘uí. Pea fai he loto-‘apasia mo tailiili. 13He ‘oku ‘ikai ke tuku e ngāue atu ‘a e ‘Otuá ‘i hono tokoni’i kimoutolu ke vekeveke fai hono finangaló. 14‘Oua ‘e fai ngulungulu mo feke‘ike‘i homou ngaahi fatongiá. 15Ka mou nofo ko e fānau ongoongo lelei mo haohaoa ‘a e ‘Otuá ‘i he lotolotonga ‘o e to‘utangata kākā mo mousa‘a ko ‘ení. Feinga ke ulo atu ho‘omou mo‘uí kiate kinautolu, ‘o hangē ko ha ngaahi māmá. 16Pea pīkitai he folofola fakamo‘uí. Pea te u toki polepole ‘iate kimoutolu ‘i he ‘aho ‘e liuaki mai ai ‘a Kalaisí. He ‘e mahino ai na‘e ‘ikai ko ha fakaongosia noa ‘eku tō kakava mo ‘eku tafi pupuha na‘e fai koe‘uhí ko kimoutolú. 17‘Oku tatau ho‘omou tuí mo ho‘omou ngāué mo ha feilaulau ‘oku hapai ma‘á e ‘Eikí. Pea ka faifai ange kuo lilingi hoku totó ‘i he funga ‘o ho‘omou feilaulau ko iá, te u kei kaungālotofiefia mo kimoutolu. 18Pea ‘oku totonu ke mou kaungālotofiefia ai pē foki mo au.

Ko Tīmote mo ‘Epafalotaito

19‘Oku ‘i ai ‘eku faka‘amu ke fekau ‘a Tīmote ke ‘alu atu he vavé ni mai, ‘o kapau ‘e finangalo lelei ki ai ‘a e ‘Eiki ko Sīsuú. Pea ‘ofa ke ne foki mai mo ha ongoongo kiate kimoutolu te u fiefia ai. 20‘Oku ‘ikai ha toe taha heni ‘e tokanga kiate kimoutolu ‘o laka hake ‘ia Tīmote. 21‘Oku tokanga hono toé kiate kinautolu pē, ‘o ‘ikai ko e ngaahi me‘a ‘oku tokanga ki ai ‘a Sīsū Kalaisí. 22Ka kuo mahino kiate kimoutolu ‘a e mahu‘inga ‘o Tīmoté. Ko ‘ema ngāue fakataha ‘i hono fakamafola ‘o e ongoongo leleí, ‘oku hangē pē ko e tokoni ha foha ki he‘ene tamaí. 23Ko ‘eku faka‘amú ke mahino mai pē ‘a e me‘a ‘e hoko kiate aú, peá u fekau leva ke ‘alu atu. 24Pea ‘oku ou falala ki he ‘Eikí ‘e vavé ni pē ‘ene tuku ke u ‘alu atu mo au.

25‘Oku ou tui ‘oku totonu ke fakafoki atu kiate kimoutolu si‘oku kaume‘a ko ‘Epafalotaitó. Ko e kaungāfononga foki ia mo Kalaisi. Ko e kaungāngāue ‘o‘oku. Pea ko e toe sōtia ‘a e ‘Eikí, ‘o hangē pē ko aú. Na‘a mou fekau foki ke ne ha‘u ‘o tauhi au. 26Ka ‘okú ne fu‘u fie foki atu. Pea ‘oku toe hoha‘a hono lotó koe‘uhí ko ho‘omou fanongo na‘e puké. 27Ko hono mo‘oní, na‘e puke lahi, ‘o meimei mate. Ka na‘e manava‘ofa ki ai ‘a e ‘Eikí. Pea ko ‘ene manava‘ofa ai pē foki ia kiate au. He kapau na‘e mate ‘a ‘Epafalotaito, na‘e fu‘u hulu fau ‘eku mamahí. 28Pea ‘i he‘ene peheé, kuo toe ‘āsili ai ‘eku fie fakafoki atu iá. He ‘e fakafiefia kiate kimoutolu ho‘omou toe fe‘iloakí. Pea he‘ikai te u toe hoha‘a au ki ai. 29‘Ofa mai ‘o talitali lelei ia. Pea hapai ma‘u pē ‘a e kau ngāue peheé. 30Na‘á ne mei mate he‘ene fai e ngāue ‘a Kalaisí, koe‘uhí ko ‘ene ta‘e tokanga ki he‘ene mo‘uí he‘ene tokoni‘i au he ‘ū fatongia na‘e ‘ikai te mou lava ‘o fakakakato maí.

Currently Selected:

Filipai 2: TCNT

Highlight

Copy