Popular Bible Verses from Filipai 2

Share

‘Oua te mou mo‘ui sio kita, pe sio lāngilangi. Ka mou anga-fakatōkilalo ma‘u pē. Pea hapai ma‘u pē ‘a e kakai kehé. Tokanga ma‘u pē ki he‘enau ngaahi fie ma‘ú, ‘o ‘ikai ko e ngaahi fie ma‘u pē ‘amoutolú.

‘Ai ke mou loto-taha mo Kalaisi Sīsū, He neongo ‘ene mātu‘aki tatau mo e ‘Otuá

ka na‘e ‘ikai te ne holi ke nofo he‘ene tatau mo e ‘Otuá. ‘Io, na‘á ne tuku ange ‘ene me‘a kotoa pē, ‘o ne hoko ko e tamaio‘eiki ‘i hono fanau‘i mai ‘e ha fefine, ‘o hangē pē ko kitautolú. ‘I he‘ene hoko leva ‘o tangatá, na‘á ne fie mo‘ulaloa ‘o mo‘ui talangofua, ‘o a‘u ai pē ki he‘ene mate kalusefai.

He ‘oku ‘ikai ke tuku e ngāue atu ‘a e ‘Otuá ‘i hono tokoni’i kimoutolu ke vekeveke fai hono finangaló.

Pea kuo mātu‘aki hakeaki‘i ai ia ‘e he ‘Otuá, mo fakahuafa ‘aki ‘a e huafa taupotú. Pea ko e huafa ko iá ‘e tō tū‘ulutui ki ai ‘a e toko taha kotoa pē ‘i langi, mo māmani, mo lolo-fonua. Pea ‘e toki fakamo‘oni‘i ai ‘e he kakai kotoa pē ko e ‘Eikí pē ‘a Sīsū Kalaisi, pea ‘e lāngilangi‘ia lahi ai ‘a e ‘Otuá ko e Tamaí.

‘Oua ‘e fai ngulungulu mo feke‘ike‘i homou ngaahi fatongiá. Ka mou nofo ko e fānau ongoongo lelei mo haohaoa ‘a e ‘Otuá ‘i he lotolotonga ‘o e to‘utangata kākā mo mousa‘a ko ‘ení. Feinga ke ulo atu ho‘omou mo‘uí kiate kinautolu, ‘o hangē ko ha ngaahi māmá.

Ko ia ai, kāinga, mou ‘ai mu‘a ke laka ange ho‘omou tali angi mai ‘i he‘etau fepulingaki ko ‘ení ‘i ho‘omou tali angi mai ‘i he‘eku kei nofo ‘i hená. ‘Oua na‘a tuku ho‘omou ngāue malohi ki homou fakamo‘uí. Pea fai he loto-‘apasia mo tailiili.