Filipai 1

Ko e Fakafe‘iloaki

1Si‘i kāinga lotu Filipai,

‘A kimoutolu ‘a e kakai kotoa ‘a Kalaisi Sīsuú, fakataha mo homou kau taki kotoa pē, mo homou kau tokoní. Ko au Paula ‘oku tohi atú, pea mo Tīmote, ko e ongo tamaio‘eiki ‘a Kalaisi Sīsū.

2Tauange ke mou ‘inasi he ‘ofa lī‘oa mo e tāpuaki ‘a e ‘Otuá ko ‘etau Tamai mo e ‘Eiki ko Sīsū Kalaisí.

Ko e Hūfia ‘e Paula ‘a e Kāinga Lotu Filipai

3Ko ‘eku manatu ma‘u pē kiate kimoutolú, peá u fakafeta‘i ai ki hoku ‘Otuá. 4Pea ko ‘eku hūfia ma‘u pē kimoutolú, peá u fiefia 5koe‘uhí ko e anga ho‘omou kau fakataha mo au ‘i hono fakamafola ‘o e ongoongo leleí, mei he fuofua ‘aho na‘a mou fanongo ai ‘o a‘u mai ki he ‘ahó ni. 6Ko e toko taha na‘á ne kamata ‘a e ngāue lelei ko iá ‘iate kimoutolú, ‘oku ou tui pau te ne fai ai pē kae‘oua kuó ne fakakakató ‘i he ‘aho ‘e liuaki mai ai ‘a Kalaisi Sīsuú.

7‘Oku taau pē ke u ongo‘i pehē he ko ‘eku fānau pele kimoutolu. Kuo tuku mai ‘e he ‘Otuá ke u taukave‘i mo malanga‘i e ongoongo leleí ‘i he‘eku nofo pilīsone ko ení. Pea kuo mou kau kotoa pē hono tokoni‘i au ‘i he‘eku fai e fatongia ko iá. 8‘Oku ‘afio‘i ‘e he ‘Otuá ‘a e vivili pehē ‘eku tokanga atu kiate kimoutolú ‘aki ‘a e ‘ofa ‘a Kalaisí.

9‘Oku ou hūfia ma‘u pē kimoutolu ke tupu fakautuutu ho‘omou ‘ofá, mo ho‘omou ‘iló, mo ho‘omou fakapotopotó. 10He ‘e toki tonu ai ho‘omou fonongá, pea haohaoa mo ta‘e mele ho‘omou mo‘uí ‘i he ‘aho ‘e liuaki mai ai ‘a Kalaisí. 11‘E toki femo‘uekina ai ho‘omou mo‘uí ‘i ha ngaahi ngāue ‘aonga. Pea ‘e fakalāngilangi‘i mo fakafeta‘ia ai ‘a e ‘Otuá.

Ko Kalaisi ‘a e Mo‘uí

12‘Oku ou loto, kāinga, ke mahino eni kiate kimoutolu, ko e ngaahi me‘a kuo hoko kiate aú, ‘oku kau lelei ia ki hono fakamafola ‘o e ongoongo leleí. 13He ‘oku ‘ikai ke puli he kau sōtia Lomá mo hono toé, ko e ‘uhinga ‘o ‘eku nofo pilīsone ko ení ko ‘eku fai e ngāue ‘a Kalaisí. 14Pea kuo loto-lahi mo loto-to‘a ai ‘a e kaungālotu meimei hono kotoa ‘i hení ‘i he‘enau malanga‘i ‘a e ongoongo leleí.

15Mo‘oni pē ‘oku malanga‘i ‘a Kalaisi ‘e he ni‘ihi ko e fakalotokovi mo e fakavahavaha‘a. Ka ‘oku ‘i ai e ni‘ihi ia ‘oku nau malanga‘i loto-ma‘a pē. 16Ko e fa‘ahinga ia ‘oku ‘ofa mo‘oni ‘ia Kalaisí. Pea ‘oku mahino kiate kinautolu ko ‘eku ‘i hení ke taukave‘i ‘a e ongoongo lelei ‘o kau kiate iá. 17‘Oku ‘ikai ke ‘ofa mo‘oni ‘ia Kalaisi ‘a e kau fakalotokovi mo fakavahavaha‘á. Ko ‘enau taumu‘á pē ke fakamamahi‘i au ‘i he‘eku nofo pilīsone ko ení. 18Ka ‘oku ou tatau‘ia ai pē au pe ‘oku malanga‘i fakamamata pē ‘a Kalaisi, pe fakamātoato. Kehe pē ke malanga‘i ‘a Kalaisi. Ko ia pē ‘oku fiefia ai hoku loto ‘o‘okú. 19Pea he‘ikai tuku ‘eku fiefiá. He ‘oku ou fakapapau‘i ‘e fakahaofi au ‘i ho‘omou fa‘a hūfia aú pea mo e tokoni mai ‘a e laumālie ‘o Sīsū Kalaisí. 20Ko ‘eku faka‘amú, mo ‘eku ‘amanakí, ke ‘oua pē te u lī‘aki hoku fatongia ‘oku faí. ‘Oku ou loto ke fakalāngilangi‘i loto-to‘a ‘a Kalaisi, ‘o tatau ai pē pe te u mate pe mo‘ui ai.

21He ka u ka mo‘ui atu, te u mo‘ui ai pē ma‘a Kalaisi. Pea ka u ka mate, ko e toe lahi ange ai pē ia hoku fakakoloá. 22Hei‘ilo pe ko e fē te u fili ki aí. Te u ala mo‘ui atu ‘o fai ha ngāue ‘aonga. 23Ka ‘oku fefūsiaki hoku lotó. ‘Oku ou fie ‘alu ‘o nofo fakataha mo Kalaisi. He ‘e sai ange ‘ānoa ia kiate au. 24-25Ka ‘oku mahino kiate au te u kei ‘aonga atu pē kiate kimoutolu. Pea ‘oku ou tui ai te u fie mo‘ui atu pē, hei‘ilo te u lava ‘o tokoni‘i kimoutolu ke tupu fakautuutu, mo fiefia ai pē, ho‘omou mo‘ui fakalaumālié. 26Pea ka toki lava ha‘aku toe ‘a‘ahi atu, pea ‘e toe liuliunga ho‘omou fakalāngilangi‘i ‘a Kalaisi koe‘uhí ko au!

27Ka ko e me‘a tēpuú, ke hoa ho‘omou mo‘uí mo e ongoongo lelei ‘o kau kia Kalaisí. Pea ‘e tatau ai pē pe te u toe ‘a‘ahi atu pe ‘ikai, ‘e kei ongoongo mai ai pē ho‘omou kei fetohotohoi mo kaungāngāue fakataha, mo kaungā fakakukafi ke tui mai ha ni‘ihi ki he ongoongo leleí. 28Ko ho‘omou fehangahangai ma‘u pē mo homou ngaahi filí pea mou loto-to‘a. He ‘e hoko ia ko ha fakamo‘oni kiate kinautolu ‘o e pau ke nau ‘auha ka mou ikuna, koe‘uhi ko e māfimafi ‘o e ‘Otuá. 29He na‘e ‘ikai ngata pē i hono fakakoloa‘aki kimoutolu ‘e he ‘Otuá ‘a e faingamālie ke mou tui kia Kalaisí, ka na‘á ne toe ‘oatu mo homou faingamālie ke kātaki‘i ha ngaahi mamahi ma‘ána. 30Na‘a mou ‘osi mamata tonu ‘iate au ‘oku ou fepaki mo ha ngaahi faingata‘a. Pea kuo mou fanongo he ngaahi faingata‘a ‘oku ou lolotonga mo‘ua aí. Pea kuo pau eni ke mou mo‘ua mo kimoutolu ‘i ha ngaahi faingata‘a pehē.

Currently Selected:

Filipai 1: TCNT

Highlight

Copy