Filipai Ko e Talateu
Ko e Talateu
Ko e tohi meia Paula ki he kakai Filipaí naʻe fai ia ki he fuofua siasi naʻe fokotuʻu ʻe Paula ʻi he kelekele ʻo ʻIulopé ʻi he vahefonua Loma ko Masitōniá. Naʻe fai ʻa e tohí ni ʻoku lolotonga nofo pōpula ʻa e ʻapositoló, pea ʻi he vahaʻa naʻá ne faingataʻaʻia ai koeʻuhi ko e fakafepaki naʻe fai ʻe ha kau ngāue faka-Kalisitiane kehe kiate ia, pea naʻe mafasia hono lotó koeʻuhi ko e akonaki hala kuo fai ʻi he siasi ʻi Filipaí. Ka neongo iá, ko e tohi eni ʻoku hā mataʻāʻā ai ʻa e fiefia mo e fakatuʻamelie ʻa Paula ʻa ia ko hono tupuʻangá pē ko ʻene mātuʻaki tui falala kia Sīsū Kalaisí. Ko e ʻuhinga naʻe ʻuluaki fakakaukau ai ʻa Paula ke fai ʻene tohí ni ko ʻene fie fakamālō ki he kau Kalisitiane Filipaí koeʻuhi ko e meʻaʻofa naʻa nau fakamoimoi kiate ia ʻi he tuʻunga naʻá ne fiemaʻu ai ʻa e tokoni ko iá. Naʻá ne toe ngāueʻaki ʻene tohi ko e faingamālie ke ne poupou kiate kinautolu kenau loto toʻa mo e loto falala, neongo hono ngaahi faingataʻaʻiá mo honau ngaahi faingataʻaʻiá. Naʻá ne kole kiate kinautolu ke nau loto fakatōkilalo ʻo hangē ko Sīsuú, ʻo ʻoua naʻa nau ʻfihia ʻi he loto siokita mo ʻafungí. Naʻá ne fakamanatu kiate kinautolu ko ʻenau moʻui ʻi heʻenau taha mo Kalaisi ko e meʻaʻofa ia mei he ʻofa tuʻungaʻa ʻa e ʻOtuá ʻa ia kuo nau aʻu ki ai ko ʻenau tuí, ʻo ʻikai ko ʻenau tauhi ʻa e ngaahi ouau ʻo e Lao Faka-Siú. Naʻe lau ai pē ʻa Paula ʻi heʻene tohí ni ki he fiefia mo e nonga ʻoku foaki ʻe he ʻOtuá maʻa kinautolu kuo nau taha mo Kalaisí. ʻOku ʻilonga ʻi he tohí ni ʻa hono fakamamafaʻi ʻo e fiefia, mo e lotofalala, mo e faaitaha, mo e vilitaki atu ʻi he tui mo e moʻui faka-Kalisitiané. ʻOku hā ai pē foki mei he tohi ʻa e fuʻu ʻofa lahi ʻa Paula ʻi he siasi ʻo Filipai. Ko e Kakano ʻo e Tohi Ko e talateu 1:1-11 Ko e ngaahi meʻa naʻá ne ʻātakai ʻa e moʻui ʻa Paulá 1:12-26 Ko e moʻui ʻia Kalaisi 1:27-2:18 Ko e ngaahi palani kia Timote mo ʻEpafalataito 2:19-30 Ko e ngaahi fakatokanga fekauʻaki mo e ngaahi fili mo e ngaahi fakatuʻutāmaki 3:1-4:9 Ko Paula mo hono ngaahi kaumeʻa ʻi Filipai 4:10-20 Ko e Fakaʻosi 4:21-23
Currently Selected:
Filipai Ko e Talateu: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.