Kolose 3

1Ko eni kuo ‘osi kaungāfokotu‘u hake kimoutolu mo Kalaisi ke mou mo‘ui. Pea mou loto‘aki ā mu‘a ‘a e ngaahi me‘a ‘i langí, ‘i he potu ‘oku nofo taloni ai ‘a Kalaisi he tafa‘aki to‘omata‘u ‘o e ‘Otuá. 2‘Ai ke tāfataha ho‘omou fakakaukaú ki he ngaahi me‘a ‘i aí, ‘o ‘ikai ko e ngaahi me‘a ‘oku ‘i māmaní. 3He na‘a mou mate kimoutolu, pea ko ho’omou mo‘uí kuo fufuu‘i fakataha mo Kalaisi ‘i he ‘Otuá. 4He ko homou mo‘uí, ko Kalaisi. Pea ka toe hoko mai ia, te mou kaungāhoko mai mo ia, mo kaungālāngilangi‘ia mo ia.

5Ko ia, mou tāmate‘i leva ‘a e ngaahi holi ‘a homou kakanó, ‘a e fe‘auakí, mo e tō‘onga ta‘e tāú, ‘a e holi-koví mo e havalá, pea mo e mānumanú. He ko e mānumanú, ko e tauhi tamapua ia. 6‘Oku houhau ‘a e ‘Otuá he kakai ‘oku nau talangata‘a kiate ia ka nau fai me‘a peheé. 7Ko e ngaahi tō‘onga ia na‘a mou fai ‘i mu‘a ‘i ho‘omou kei nofo fakataha mo e kakai ‘oku nau mo‘ui‘aki ‘a e fa‘ahinga mo‘ui ko iá.

8Tuku ā ho‘omou fai me‘a peheé. Tuku ā ‘a e loto-‘itá, mo e loto-tāufehi‘á, mo e loto-fakafāsifasí, mo e fasitu‘ú, mo e talanoa koví. 9-10Tuku ā ‘a e loí. He kuo mou ‘osi lī‘aki homou anga motu‘á kae ‘ai homou anga fo‘oú. ‘Oku ‘alu pē e ‘ahó mo e vāofi ange homou angá mo e anga homou Fakatupú, pea ‘e fai atu pē ‘o mou ‘ilo‘i kakato ai ia. 11‘Oku tatau ai pē pe ko e Kalisi koe, pe ko e Siu, pea tatau ai pē pe na‘e kamu koe pe ‘ikai. ‘Oku tatau ai pē pe ko e pāpeliane koe, pe ko e kaivao, pe ko e pōpula, pe tau‘atāina. He ko Kalaisi pē ‘oku mahu‘ingá. Pea ‘okú ne fā‘ofale ‘i hotau lotó tāutaha.

12Ko e kakai kimoutolu ‘a e ‘Otuá. He na‘e ‘ofa mai ‘a e ‘Otuá kiate kimoutolu, peá ne fili kimoutolu. Pea ‘i he‘ene peheé, mou mo‘ui‘aki mu‘a ‘a e anga-manava‘ofa, mo e anga-lelei, mo e anga-vaivai mo fakatōkilalo, mo e fa‘a kātaki. 13Mou fekātaki‘aki, mo fefakamolemole‘aki ‘o ka hoko ha vātamaki ‘iate kimoutolu, ‘o hangē pē ko e fakamolemole‘i kimoutolu ‘e Kalaisí. 14Pea ko e me‘a tēpuú, ke mou mo‘ui‘aki e ‘ofá. He ko e ‘ofá ‘oku fetāiaki ai ‘a e me‘a kotoa pē.

15Tuku ke pule ‘i homou lotó ‘a e melino ‘oku foaki mai ‘e Kalaisí. He ko e melino ia na‘e ui kimoutolu ‘e he ‘Otuá ke mou hoko ai ‘o sino taha pē. Pea mou fakafeta‘i ma‘u pē. 16Tuku ke fonu mahuohua ‘i ho‘omou mo‘uí ‘a e ongoongo-lelei kia Kalaisí. Mou fena‘ina‘i‘aki mo fefakahinohino‘aki ki he ngata‘anga homou potó. Hiva mo loto-fakafeta‘i ki he ‘Otuá ‘aki ha ngaahi saame, mo e himi, mo e hiva fakalaumālie.

17Ko e hā pē ha‘amou lea pe fatongia ‘e fai, mou fai pē ke lāngilangi‘ia ai e ‘Eiki ko Sīsuú. Pea fai ai pē mo ha‘amou fakafeta‘i ‘iate ia ki he ‘Otua ko e Tamai.

Ko e tauhi Vaha‘a ‘i he Mo‘ui Fo‘oú

18Ngaahi uaifi, mou fakaongoongo ki homou ngaahi husepānití. He ‘oku hoa ia mo e muimui kia Kalaisí. 19Ngaahi husepāniti, mou ‘ofa ‘i homou ngaahi uaifí. ‘Oua te mou fakapuhopuha‘a kiate kinautolu. 20Fānau, talangofua ki ho‘omou mātu‘á he me‘a kotoa pē. He ‘oku hoa ia mo e finangalo ‘o e ‘Otuá. 21Ngaahi tamai, ‘oua te mou fakatupu’ita ki ho‘omou fānaú, na‘a nau fo‘i ai. 22Kau pōpula, mou talangofua ma‘u pē ki homou kau pule ‘i māmaní. Fai ma‘u pē ho‘omou ngāué ke fakafiemālie kiate kinautolu. ‘Oua ‘e fakalai kiate kinautolu ‘o fai fakamamata pē, kae fai fakamātoato koe‘uhi ko ho‘omou ‘apasia ki he ‘Otuá. 23Ko e hā pē ha‘amou ngāue ‘e fai, tōtōivi ai. Pea lau ia ko ho‘omou fai fatongia ma‘á e ‘Eikí, ‘o ‘ikai ko e tangata. 24He ko hono mo‘oní, ko Kalaisi pē ‘oku mou fai fatongia ki aí. Pea kuo ‘osi mahino kiate kimoutolu ‘a e pau ke ne fakapale‘i kimoutolú. 25Ka ‘oku ‘ikai ke filifilimānako ‘a Kalaisi! He kuo pau ke ne tautea ‘a e kakai ‘oku faikoví, ‘o hangē ko ia ‘oku tuha mo kinautolú.

Currently Selected:

Kolose 3: TCNT

Highlight

Copy