Kolose 4
4
1Ko kimoutolu ‘oku ‘i ai ho‘omou kau pōpula, pule‘i ‘aki kinautolu ‘a e fai totonú mo e ta‘e filifilimānakó. Vakai na‘a ngalo ‘iate kimoutolu ‘oku ‘i ai homou pule ‘i langí.
2Mou lotu ma‘u pē, mo ‘ā‘ā. Pea fai ai pē mo e loto-fakafeta‘i. 3Hūfia mu‘a mo kimaua, ke tuku mai ‘e he ‘Otuá hama faingamālie ke talaki ‘a e mo‘oni fufū ko ia ko Kalaisí, ‘a ē ‘oku ou nofo pilīsone ai ko ení. 4Hūfia au ke u lava ‘o talaki ki he‘ene mahino tahá.
5Mou fakapotopoto ‘i he anga ho‘omou fetu‘utaki mo e kakai kuo te‘eki ke tuí. ‘Ai ke ‘aonga ma‘u pē ho‘omou feohi mo kinautolú. 6Fakalea ma‘u pē ho‘omou ngaahi malangá ke ongo faka‘apa‘apa kiate kinautolu, mo toe fakamānako foki. Teuteu lelei ho‘omou ngaahi malangá. Pea mou feinga ke poto hono tali ha fehu‘i ‘e fai atu.
Ko e Fetapa Faka‘osi
7Ko Tikiko ena, ko e kaungāngāue falala‘anga mo kaungāfaifatongia he ngāue ‘a e ‘Eikí. Te ne ongoongo atu ‘eku me‘a kotoa pē ‘oku faí. 8Ko hono ‘uhinga pē ia na‘á ku fekau ai ke ne ‘alu atú, ke mou ‘ilo ‘a e anga ‘ema nofó, hei‘ilo ‘e fakalotolahi‘i ai kimoutolu. 9Na‘á ku fekau ke na ō atu mo ‘Onesema, ‘a e kaungāmuimui ‘ofeina mo falala‘anga mei hena pē. Te na ongoongo atu ‘a e me‘a kotoa pē ‘oku hoko ‘i hení.
10‘Oku ‘ofa atu ‘a ‘Alisitako ko hoku kaungānofo pilīsone, pea mo Ma‘ake, ‘a e tokoua ‘o Pānepasá. Na‘e ‘osi tu‘utu‘uni atu ke mou tali lelei ‘a Ma‘ake, ‘o kapau te ne ‘a‘ahi atu kiate kimoutolu.
11‘Oku ‘ofa atu mo Sīsū, ‘a ē ‘oku toe ui ko Siusitasá. Ko e toko tolu ko ení, ko kinautolu pē ‘a e kau Siu tui kia Kalaisi ‘oku kaungāngāue mo au ma‘á e Pule‘anga ‘o e ‘Otuá. Pea ‘oku nau tokoni lahi kiate au.
12‘Oku ‘ofa atu ‘a ‘Epafasi ‘amoutolú. Ko e tamaio‘eiki mo ia ‘a Kalaisi. Pea ‘okú ne hūfia tōtōaki ma‘u pē kimoutolu mo kole ke mou ‘ilo kakato ‘a e me‘a ‘oku finangalo ‘a e ‘Otuá ke mou faí, pea fai ke a‘u. 13Na‘á ku sio tonu he‘ene fa‘a ngāue ‘aufuatō ma‘amoutolu pea mo e kau muimui kia Kalaisi ‘i Leotisia mo Hailapolí.
14‘Oku ‘ofa atu mo e toketā ‘ofeina ko Luké, pea pehē pē mo Tīmasi.
15Tala hoku ‘ofa ki he kau muimui kia Kalaisi ‘i Leotisiá, pea tautautefito kia Nīmifa, mo e kāinga lotu ‘oku nau fa‘a feohi ‘i hono ‘apí.
16Ka hili leva hono lau e tohí ni ‘e ho‘omou kāinga lotú, pea mou fekau mu‘a ke toe lau ia ‘e he kāinga lotu Leotisiá. Pea mou lau ‘e kimoutolu mo e tohi na‘á ku fai kiate kinautolú. 17Pea fakamanatu ange kia ‘ākipo ke ne fai ‘a e ngāue na‘e fakafalala ange ki ai ‘e he ‘Eikí.
18Ko au, ko Paula, na‘á ku hiki eni ‘aki pē ‘eku tohinima ‘a‘akú.
‘Oua ‘e ngalo ‘iate kimoutolu ‘eku nofo pilīsoné.
Tauange ke mou ‘inasi ai pē he ‘ofa lī‘oa ‘a e ‘Otuá.
Currently Selected:
Kolose 4: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
