Kolose 2

1‘Oku ou loto ke mahino kiate kimoutolu ‘eku fekuki ‘oku fai ma‘amoutolu mo e kāinga lotu Leotisiá, pea mo kinautolu kotoa foki kuo te‘eki ke mau mahení. 2Ko ‘eku fekuki ko iá, koe’uhi ke fakalototo‘a‘i ai kinautolu pea toe fetohotohoi ange ‘enau fe‘ofá’akí. He ‘e toki lava ai ke fakakakato ‘enau ‘ilopaú, ‘a ē ‘oku fou mai he mahinó. Te nau toki a‘usia ai ‘a e mo‘oni fufū ‘a e ‘Otuá, ko Kalaisi. 3He kuo fufuu‘i ‘ia Kalaisi ‘a e koloa kotoa pē ‘o e potó mo e ‘iló.

4Ko e ‘uhinga ‘o ‘eku lau peheé, ke ‘oua ‘e takihee‘i kimoutolu ‘e ha kau ngutu-mālie. 5He neongo ‘oku ‘ikai te u ‘i hena tonu, ka ‘oku ou manatu atu ma‘u pē kiate kimoutolu. Pea ‘oku fiefia hoku lotó ‘i he mahino mai ‘oku maau ho‘omou nofó pea mālohi ho‘omou tui kia Kalaisí.

6Ko ena kuo mou ‘osi tali ‘a Kalaisi Sīsū ke hoko ko homou ‘Eiki. Mou muimui ai pē kiate ia. 7Tuku ke aka loloto ho‘omou mo‘uí ‘ia Kalisi. Tuku ke ne hoko ko e makatu‘unga ho‘omou mo‘uí. ‘Ai ho‘omou tuí ke pau, ‘o hangē pē ko homou ako‘i na‘e faí. Pea mou fakafeta‘i ma‘u pē ki he ‘Otuá.

8Vakai na‘a takihee‘i kimoutolu ‘aki ha ngaahi ‘uhinga nge‘esi. ‘E ngali mālie nai kiate kimoutolu ha ngaahi ‘uhinga pehē. Ka ko e ngaahi ‘uhinga fakaetangata pē ia ‘oku fa‘u ‘o fakatatau ki he ngaahi mafai ‘oku pule ‘i māmani mo e vavaá, ‘o ‘ikai ko Kalaisi. 9He ‘oku fā‘ofale kakato ‘a e ‘Otuá ‘ia Kalaisi. 10Pea kuo mou hoko ki he mo‘ui kakató, he ko e kakai kimoutolu ‘a Kalaisi. Pea ‘oku mahulu hake ‘a Kalaisi ‘i he ivi mo e mafai kotoa pē. 11Kuo ‘osi to‘o ange foki ‘e Kalaisi ‘a e ngaahi holí mo e havalá mei homou lotó, ‘o hangē pē ko hono to‘o ange e kakano ‘o e sinó ‘i he kamú. 12Pea ko ho‘omou papitaisó, ko homou tanu fakataha ia mo Kalaisi, mo homou toe fokotu‘u hake foki ke mou mo‘uí, koe‘uhi ko ho‘omou tui ki he māfimafi ‘o e ‘Otuá, ‘a ē na‘á ne fokotu‘u hake ‘a Kalaisi ke mo‘uí. 13Ko e kakai kimoutolu na‘e mate, he ko e kakai kimoutolu na‘e angahala. Pea na‘e ‘ikai ko e kakai kimoutolu ‘a e ‘Otuá. Ka na‘e ‘ai ‘e he ‘Otuá ke tau mo‘ui fakataha pē mo Kalaisi, ‘aki ‘ene fakamolemole‘i ‘etau ngaahi angahalá.

14He ko hotau tohi mo‘ua ‘i he‘etau talangata‘a ki he Lao ‘a Mōsesé, kuo fakapekia ‘e he ‘Otuá. Na‘á ne ‘ave ia ‘o tukifa‘o ki he kolosí. 15Na‘e ikuna ‘e Kalaisi he kolosí ‘a e mafai mo e pule kotoa pē. Na‘á ne ‘ai ai ke sio atu ‘a māmani kātoa ‘oku taki pōpula atu kinautolu, kae ma‘alali ia. 16Vakai na‘a taputapui atu ‘e ha taha ho‘omou kaí, pe ko ho‘omou inú. Vakai na‘a fekau ‘e ha taha ke mou kātoanga Māhina Fo‘ou, pe toe kātoanga hā, pe tauhi Sāpate. 17He ko e ngaahi ‘ata pē ia ‘o e me‘a na‘e ‘amanaki ke hoko maí. Ko hono kānokató ko Kalaisi ia.

18Vakai na‘a fakata‘e‘aonga‘i ho‘omou tuí ‘e ha ni‘ihi ‘oku nau ngali anga-fakatōkilalo, mo ngali anga-vaivai, pea ‘oku nau lotu ki he kau ‘āngeló. Ko e fa‘ahinga ia ‘oku nau futa‘aki ‘enau ngaahi visone, tokua. Ka ko e launoa lahi ia. He ko ‘enau fakakaukaú ‘oku kei fonu he holí mo e havala fakaekakanó. 19‘Oku ‘ikai ko ha kakai kinautolu ‘oku kei pipiki ‘ia Kalaisi, ‘i he ‘ulu ‘o e sinó kotoa. Ko Kalaisi pē ‘oku ma‘u ivi ai e sinó, pea fema‘uma‘utaki ai hono ngaahi hokotangá, mo hono ngaahi uouá, ‘i he tupu hake ‘a e sinó ‘o fakatatau ki he finangalo ‘o e ‘Otuá.

Ko e Ma‘u Mo‘ui Fo‘ou ‘ia Kalaisi

20Na‘a mou mate fakataha pē mo Kalaisi. Pea ‘oku ‘ikai leva ke mou kei mo‘ulaloa ki he ngaahi mafai ‘oku pule ‘i māmani mo e vavaá. Ka ko e hā ‘oku mou kei hangē ai ko ha kakai ‘o e maama ko ení? Ko e hā ‘oku mou kei fakaongo ai pē ki he ‘ū tu‘utu‘uni peheni, 21“Tapu ē,” pea “Tapu ho‘o kai ē!” pea “Tapu e ala ki hē!” 22Ko e taputapui ia ‘o ha ngaahi me‘a ‘oku ‘osi pē hono ngāue‘akí pea ta‘e ‘aonga leva. Ko e ‘ū tapu ia na‘e toki fa‘u pē ‘e he kakai, ‘o ‘ikai ko e ‘Otuá. 23‘Oku ngali poto nai ho‘omou fakaongo ki he fa‘ahinga taputapui peheé? He ‘oku sio mai ai e kakaí ‘oku ngali hulu atu ‘ete ‘ofa he ‘Otuá, mo ‘ete pule‘i kitá. Ka ‘oku ‘ikai ke momo‘i lava‘i ai e ngaahi holi ‘a hotau kakanó.

Currently Selected:

Kolose 2: TCNT

Highlight

Copy