Kolose 1

Ko e Fakafe‘iloaki

1-2Si‘i kāinga lotu Kolose,

‘A kimoutolu ‘a e kau muimui mo‘oni kia Kalaisi Sīsū. Ko au Paula ‘oku tohi atú, ko e ‘apōsitolo ‘a Kalaisi Sīsū ‘i he finangalo ki ai ‘a e ‘Otuá, pea mo Tīmote, ko e kaungāmuimui.

Tauange ke mou ‘inasi ai pē he ‘ofa lī‘oa mo e tāpuaki ‘a e ‘Otua ko ‘etau Tamaí.

Ko e Lotu Fakafeta‘i

3Ko ‘ema hūfia ma‘u pē kimoutolú peá ma fakafeta‘i ma‘u pē ki he ‘Otua ko e Tamai ‘a hotau ‘Eiki ko Sīsū Kalaisí. 4He kuó ma fanongo talanoa he anga ho‘omou tui kia Kalaisi Sīsuú, mo ho‘omou ngaahi ‘ofa ‘oku fai ma‘á e kakai kotoa ‘a e ‘Otuá. 5Ko e ‘uhinga foki ‘oku lava ai ke pehē ho‘omou mo‘uí, ko ho‘omou ‘ilo‘i kuo ‘osi tokonaki ma‘amoutolu ‘i hēvani ‘a e me‘a ‘oku mou fakatu‘amelie ki aí. Ko e fakatu‘amelie ia na‘a mou fanongo ai ‘i he ‘aho na‘a mou ‘uluaki tui ai ki he Ongoongo Leleí.

6‘Oku kei mafola atu ‘a e Ongoongo Leleí ‘i māmani, pea ‘oku ola lahi, ‘o hangē pē ko ‘ene mafola mo ola lahi ‘iate kimoutolu, ‘o talu pē ia mei he ‘aho na‘a mou ‘uluaki fanongo ai he ‘ofa tu‘unga‘a ‘a e ‘Otuá.

Na‘e mahino lelei kiate kimoutolu ‘a e Ongoongo Lelei ko iá 7‘i hono talaki atu ‘e si‘oma kaume‘a ko ‘Epafasí. Ko homa kaungātamaio‘eiki ia he ngāue ‘a Kalaisí. Pea ko e tōtōivi lahi kuó ne fai ma‘amoutolú. 8Ko ‘Epafasi pē na‘á ne fakamatala mai kiate kimaua ‘a e fu‘u ‘ofa kuo fakafonu‘aki kimoutolu ‘e he Laumālie ‘o e ‘Otuá.

9Pea talu ‘ema fanongo aí mo ‘ema hūfia ma‘u pē kimoutolu. ‘Okú ma kole ki he ‘Otuá ke ne fakahā atu ‘a e me‘a kotoa ‘okú ne finangalo ke mou faí, mo ‘oatu ‘a e poto mo e maama kotoa pē ‘oku ala faka‘inasi ‘aki kimoutolu ‘e hono Laumālié. 10‘E hoa ai ho‘omou mo‘uí mo e finangalo ‘o e ‘Eikí. Te mou fai ai ha ngaahi ngāue ‘e fakatupu hōifua kiate ia. Pea ‘e tupu fakautuutu ai ho‘omou maheni mo iá. 11‘Ofa ke fakaivia kimoutolu ‘aki hono māfimafí, koe‘uhí ke mou fa‘a kātaki mo loto-fiefia ‘i ha me‘a pē ‘e hoko kiate kimoutolu. 12‘Oku ou kole ke mou fakafeta‘i ki he ‘Otuá koe‘uhí ko ‘ene tuku ke mou ma‘u ‘inasi he me‘a na‘á ne tala‘ofa‘aki mai ma‘a hono kakaí, ‘a e kakai ‘oku nofo he māmá. 13He na‘e fakahaofi kitautolu ‘e he ‘Otuá mei he mafai e fakapo‘uli ‘o fakahū ki he pule‘anga ‘o hono ‘Alo Pelé, 14pea kuo tau ma’u ai ‘a e huhu’i, ‘i hono fakamolemole ‘o ‘etau ngaahi angahalá.

Ko Kalaisi mo ‘Ene Ngāué

15Ko Kalaisí, ko e ‘ata totonu ia

‘o e ‘Otua ta‘e hā maí.

Ko e ‘Alo pē ‘e tahá ia.

‘Oku hulu atu ia

he me‘a fakatupu kotoa pē.

16He ko e fakatupu ‘o e me‘a kotoa pē,

na‘e makatu‘unga ‘iate ia,

‘a e me‘a kotoa ‘i langi,

mo e me‘a kotoa ‘i māmani,

‘a e ngaahi me‘a hā mai,

mo e ngaahi me‘a ta‘e hā mai,

‘a e ngaahi ivi,

mo e ngaahi mālohi,

pea mo e ngaahi pule, mo e hau, mo e ma‘u mafai.

Na‘e fakatupu e me‘a kotoa pē ‘iate ia.

Na‘e fakatupu e me‘a kotoa pē ma‘ána.

17Na‘e te‘eki ai ke fakatupu e me‘a kotoa peé,

kuo ‘osi ‘i ai pē ia.

Pea ‘oku tu‘unga ‘iate ia

‘a e fema‘uma‘utaki ‘a e me‘a kotoa pē.

18Ko e ‘ulu ia ‘o hono sinó,

ko e siasí ia.

Ko e ‘Uluakí ia.

Ko ia na‘e fuofua fokotu‘u mei he maté,

kae mahulu hake ai pē ia

he me‘a kotokotoa.

19Ne afeitaulalo ‘a e ‘Otuá tonu

‘o ne fā‘ofale kakato ‘i hono ‘Aló.

20Ko hono finangalo ki hono ‘Aló,

ke fai fakamelino,

ke lilingi hono ta‘ata‘á he Kolosí,

kae toe vālelei ai mo ia

‘a e me‘a kotoa ‘i māmani,

mo e me‘a kotoa ‘i langi.

21Na‘a mou mama‘o mei he ‘Otuá ‘i mu‘a. Ko hono ngaahi fili kimoutolu koe‘uhi ko e kovi ho‘omou tō‘onga mo‘uí, mo ho‘omou ngaahi fakakaukaú. 22Ka na‘e hoko mai hono ‘Aló ko e tangata, peá ne pekia, ‘o mou vālelei ai mo ia. Pea kuó ne finangalo lelei eni ke lau kimoutolu ko e kakai kuo ‘osi mā‘oni‘oni mo haohaoa mo ta‘e mele ‘i he‘ene vakaí.

23Ka kuo pau foki ke kei aka loloto mo tu‘u ma‘u ai pē ho‘omou tuí, ‘o ‘oua ‘e uesia ‘a e fakatu‘amelie na‘a mou a‘usia ‘i hono talaki atu ‘a e Ongoongo Leleí. Ko e Ongoongo Lelei ia na‘e talaki ki he kakai kotoa pē ‘i māmani. Ko e Ongoongo Lelei ia na‘e fili ai au ke u fai fatongiá, ‘a au Paula.

Ko e Fai Fatongia ‘a Paula Ma‘á e Siasí

24Pea ‘oku fakafiefia pē kiate au ‘eku faingata‘a‘ia ko eni ma‘amoutolú. He ko ‘eku fakaa‘u ia ‘a e kātaki mamahi ‘a Kalaisi ma‘a hono sino ko e siasí.

25He na‘e finangalo ‘a e ‘Otuá ke u fai fatongia ma‘a hono siasí, ka u talaki kakato atu ‘ene Ongoongo Leleí. 26Na‘e laui kuonga mo hono fufū e ongoongo ko iá mei he kakai kotoa pē. Ka ko eni kuo fakahaa‘i ki he kakai ‘a e ‘Otuá. 27He ko e finangalo ‘o e ‘Otuá kiate kimoutolu ‘a e kakai mulí, ke mou a‘usia ‘a e mo‘oni loloto mo fakaofo ko ia na‘e fufuú. Pea ko eni ia ‘a e mo‘oni loloto mo fakaofo ko iá, ko e fā‘ofale ‘a Kalaisi ‘i homou lotó. Pea ko ia pē ‘oku tu‘unga ai ho‘omou ‘amanaki ‘inasi he lāngilangi ‘o e ‘Otuá.

28Pea ‘okú ma talaki leva ‘a Kalaisi ki he kakai kotoa pē, peá ma tūkuingata ‘aki ‘a e ‘osi‘osingamālie ‘o e me‘i poto mo e taukei ‘oku ‘iate kimauá ke fakatokanga ange kiate kinautolu mo ako‘i, koe‘uhí ke tupu ‘o matu‘otu‘a ‘i he mo‘ui fakalaumālié ‘a e kau muimui kotoa kia Kalaisi. 29‘Oku ou tōtōivi he ngāue ko iá ‘aki ‘a e fu‘u ivi ‘oku ‘omi ma‘áku ‘e Kalaisí.

Currently Selected:

Kolose 1: TCNT

Highlight

Copy