Popular Bible Verses from Kolose 3

Share

Mou fekātaki‘aki, mo fefakamolemole‘aki ‘o ka hoko ha vātamaki ‘iate kimoutolu, ‘o hangē pē ko e fakamolemole‘i kimoutolu ‘e Kalaisí.

‘Ai ke tāfataha ho‘omou fakakaukaú ki he ngaahi me‘a ‘i aí, ‘o ‘ikai ko e ngaahi me‘a ‘oku ‘i māmaní.

Ko e hā pē ha‘amou ngāue ‘e fai, tōtōivi ai. Pea lau ia ko ho‘omou fai fatongia ma‘á e ‘Eikí, ‘o ‘ikai ko e tangata.

Ko e kakai kimoutolu ‘a e ‘Otuá. He na‘e ‘ofa mai ‘a e ‘Otuá kiate kimoutolu, peá ne fili kimoutolu. Pea ‘i he‘ene peheé, mou mo‘ui‘aki mu‘a ‘a e anga-manava‘ofa, mo e anga-lelei, mo e anga-vaivai mo fakatōkilalo, mo e fa‘a kātaki.

Tuku ke fonu mahuohua ‘i ho‘omou mo‘uí ‘a e ongoongo-lelei kia Kalaisí. Mou fena‘ina‘i‘aki mo fefakahinohino‘aki ki he ngata‘anga homou potó. Hiva mo loto-fakafeta‘i ki he ‘Otuá ‘aki ha ngaahi saame, mo e himi, mo e hiva fakalaumālie. Ko e hā pē ha‘amou lea pe fatongia ‘e fai, mou fai pē ke lāngilangi‘ia ai e ‘Eiki ko Sīsuú. Pea fai ai pē mo ha‘amou fakafeta‘i ‘iate ia ki he ‘Otua ko e Tamai.

Pea ko e me‘a tēpuú, ke mou mo‘ui‘aki e ‘ofá. He ko e ‘ofá ‘oku fetāiaki ai ‘a e me‘a kotoa pē.

Ko eni kuo ‘osi kaungāfokotu‘u hake kimoutolu mo Kalaisi ke mou mo‘ui. Pea mou loto‘aki ā mu‘a ‘a e ngaahi me‘a ‘i langí, ‘i he potu ‘oku nofo taloni ai ‘a Kalaisi he tafa‘aki to‘omata‘u ‘o e ‘Otuá.

Tuku ke pule ‘i homou lotó ‘a e melino ‘oku foaki mai ‘e Kalaisí. He ko e melino ia na‘e ui kimoutolu ‘e he ‘Otuá ke mou hoko ai ‘o sino taha pē. Pea mou fakafeta‘i ma‘u pē.

Ko ia, mou tāmate‘i leva ‘a e ngaahi holi ‘a homou kakanó, ‘a e fe‘auakí, mo e tō‘onga ta‘e tāú, ‘a e holi-koví mo e havalá, pea mo e mānumanú. He ko e mānumanú, ko e tauhi tamapua ia.

He na‘a mou mate kimoutolu, pea ko ho’omou mo‘uí kuo fufuu‘i fakataha mo Kalaisi ‘i he ‘Otuá.

Tuku ā ho‘omou fai me‘a peheé. Tuku ā ‘a e loto-‘itá, mo e loto-tāufehi‘á, mo e loto-fakafāsifasí, mo e fasitu‘ú, mo e talanoa koví.

Tuku ā ‘a e loí. He kuo mou ‘osi lī‘aki homou anga motu‘á kae ‘ai homou anga fo‘oú. ‘Oku ‘alu pē e ‘ahó mo e vāofi ange homou angá mo e anga homou Fakatupú, pea ‘e fai atu pē ‘o mou ‘ilo‘i kakato ai ia.

Ngaahi husepāniti, mou ‘ofa ‘i homou ngaahi uaifí. ‘Oua te mou fakapuhopuha‘a kiate kinautolu.

Fānau, talangofua ki ho‘omou mātu‘á he me‘a kotoa pē. He ‘oku hoa ia mo e finangalo ‘o e ‘Otuá.

Ngaahi uaifi, mou fakaongoongo ki homou ngaahi husepānití. He ‘oku hoa ia mo e muimui kia Kalaisí.