THUPILTE 12
12
Dihtatna leh gitlouna akibahlouna
1Koipou thuhilna ngaina in theina angaina hi,
hinanleh phawhhilna zada pouma mi mo ahi.
2Mi hoi in Mangpa akipat deisahna a mua,
hinanleh gitlouna ngaituo mi khu,
Aman amawpai ding hi.
3Gitlouna in mi asudet thei sih ding a,
hinanleh dihtatna thahui akisuon sih ding hi.
4Zi hoi khu apasal a dingin Manglukhu ahi a,
hinanleh zumhuoina bawlnu khu,
apasal a dingin gu leh taang natna ahi.
5Midihtat lunggel khu adih a,
hinanleh migilou thuhilna pen solna ngen ahi hi.
6Migiloute thu pen sisansuo dinga,
dapbuhna thu ahi a,
hinanleh midihte kam in amauh ahunkhie hi.
7Migiloute paikhieh in a um ua,
a um nawn sih uhi,
hinanleh midihtatte inn pen adingden ding hi.
8Mi apilna dungzuiin phat in a um dinga,
hinanleh lungsim semi pen akimuda ding hi.
9Ama kingaithupi a tanghou neilou sangin,
simmaw a um a suoh nei ahoizaw hi.
10Midihtat in aganta hinna angaikhoh a,
migiloute khotuona neempen zong agilou nalai hi.
11Ama gam hou khinkhian mi in ann neh ahau dinga,
mi mantheilou nuazui mite pen theisiemna bei ahi.
12Migilouten migiloute sepsuosa adeigaw ua,
hinanleh midihtatte thagui in ga asuong hi.
13Migilou pen ama thugen gilou mama ah a awh a,
hinanleh midih pen lungkham buoina,
pat apawtdoh ding hi.
14Mi’n akhut nasep apat neh amu bangin,
akam siemna ga silhoi in atai ding hi.
15Mimote agamtatna pouma uah dih akisa ua,
hinanleh kithuhilna ngaikhemi khu mipil ahi.
16Mi mo in alungthahna akilangsah pai a,
hinanleh mi lunggel siem mi in,
kizumsuona athusim sih hi.
17Koipou thudih gen miin dihtatna thu agen a,
theipi dihtahlou in zuou agen hi.
18Namsau a sut banga thugen mi a um a,
hinanleh mipil lei khu damna ahi.
19Thutah genna kamte kumtawn in a umden dinga,
hinanleh zuou genna lei in,
hun tomnou khat adai giap hi.
20Silgilou sep tumte lungsim ah lepchiena thu a um a,
lemna umsah tumte lungsim ah lungnopna a um hi.
21Midihtatte a dingin sietna atung sih dinga,
migiloute pen lungkham buoina in adim ding hi.
22Kam zuouthei khu Mangpa a dingin kidahhuoi ahi a;
dihtah a bawlte pen akipahpi hi.
23Lunggel siem mi in theina aphuol khin khian a,
mi mote lungtang in motna aphuongdoh hi.
24Mi thanuom khut in vai ahawm dinga,
mithasete pen mite nasem in apang ding uhi.
25Mihing lunggimna in kingaisietna atun a,
hinanleh thuhoi in akipah sah hi.
26Midihtatin pilvangtahin alawm ding atel a,
migiloute gamtatin amauh apielmang sah hi.
27Mithasie in asabehna a amatsate,
nangawn a em ngap sih a,
hinanleh mithanuomte silnei khu amanpha hi.
28Dihtatna lampi ah hinna a um a,
tua lampi ah shina a um sih hi.
Currently Selected:
THUPILTE 12: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
