THUPILTE 11
11
1Buhna dihlou Mangpa adingin,
kidahhuoi ahi a,
hinanleh tena dih khu akipahna ahi.
2Kisahtheina a um chiengin zum na zong,
a um a hinanleh kingaingiemte,
kungah pilna a um hi.
3Midihte adihna un amauh apui ding a,
mi gin umloute pen azuoutatna un,
amauh sietna atun ding hi.
4Thangpai niin hausatna aphatuom sih a,
dihtatna in shina akipat mi hunkhe zel hi.
5Gensietbei mi dihtatna in ama adingin,
lampi tang a bawl pieh a,
migilou pen ama gitlouna ah apua ding hi.
6Midihte adihtatna un amauh ahunkhe dinga,
mi gin umloute pen,
amauh ngaisutna gilou ah a awh ding uhi.
7Migilou ashi chiengin akinepna amangsieng dinga,
midihloute kinepna pen amang ding hi.
8Midihtat khu alunggimmna apat in hutdoh in a um dinga,
ama taangin migilou ahing pei hi.
9Milepchie in akam in a innveng asusie a,
theina ziehin midih hunkhieh in a um ding hi.
10Midihtatte ading a sil apei hoi laiin khopi mite akipah a,
migiloute ashi chiengun lungdamna kikou thawm a kiza hi.
11Midihte guolzawlna vangin khopi pahtawi in a um a,
hinanleh migiloute kam ham in khopi aguollel hi.
12Pilna neilou mi in a innveng asimmaw a,
hinanleh theisiemna nei mi pen a sip khinkhian hi.
13Mi kamtam in thuguh ki imte agenkhie a,
mi ginum in thuguh a im hi.
14Kithuhilna umlouna ah mi mipite apua zel a,
thuhilthei mi tamna ah bitna aum hi.
15Mikhuol ading a mawpo dinga kipe mi pen,
athuohgim ngeingei dinga,
hinanleh mawpuohna hawte abit ding hi.
16Mihepisiem numei in pahtatna alaw a,
hinanleh thagumhat suongmiten,
hausatna anga uhi.
17Khotuona nei mite ama hinna mama adingin
silhoi abawl a,
hinanleh mitatsete pen,
ama tahsa tung ngei ah lunggimna atungsah hi.
18Migilou in thaman dihloutah in asanga,
dihtatna haichi tupa’n kipahman,
dihtah amu ding hi.
19Dihtatna in hinna lampi a mi a pui bangin,
koipou gitlouna del in ama shina ding anua del hi.
20Lungtang dihlou pomite pen,
Mangpa a dingin kidahhuoi ahi ua,
hinanleh a umdan ua dihtatte khu,
akipahna ahi.
21Migiloute pen gawtlou in asuohta sih ding ua,
hinanleh midihtatte hahlesuonte pen,
hutkhiet in a um ding uhi, chi thei in.
22Ngaituo siemna neilou numei melhoi khu,
vohpi na kua a sana gui kibasah bang ahi.
23Midihtatte lunggul khu silhoi ngen ahi a,
hinanleh migiloute lam et khu thangpaina ahi.
24Kiphal taha hawmzah mi in anei tam deudeu a,
mi chippongte pen a zawng sem sem hi.
25Sil phal mi hinna suhhausat ahi dinga,
midangte bawlhoi mi khu,
bawlhoi sem in a um ding hi.
26Koipou bu leh bal it mi khu miten ahamsiet ding ua,
hinanleh azua nuompa lutung ah guolzawlna atung ding hi.
27Koipou thanuomtah a silhoi sui teitei ten,
deisahna amu ua,
hinanleh silhoilou suiten silhoilou ma amu ding uhi.
28Ama hausatna muong mi khu apua dinga,
hinanleh midihtat khu sing bawhpha bangin alun ding hi.
29Koipou ama innsung buoi sah mi khu,
akihawmkhai dinga mi hatte leh,
mi pilte nasemin apang ding hi.
30Midihtatte ga khu hinna singkung ahia,
tualeh koipou hagau man khu mipil ahi.
31 #
1 Pet. 4.18
Midihtatte leitunga akithuh kia pai a ahileh,
migilou leh mikhielte nasa sem in akithuh kia pai ding hi.
Currently Selected:
THUPILTE 11: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
