INCHŌḴ-OṘÔ 13
13
1Ngòh tö akaha nyīö hang inköptöre tö yöngre, öt hang vinëköre pöri ngòh tö mināch.
2Nyā tölöök ön ngòh tarik aṅ i ṙòng ngam elvāng ò, ngam lōn tömichūḵ chanökhuṙen im chanökhuṙen.
3Haköp nômöre an ngam amahtö elvāng re; palā-airen ön ngòh vamā-anykūö re nö pōitī.
4Yāla an ngam nômö tö ṙahata, öt taneūnguṙen pöri, kôlò mineukten pöri ngam nômö töpētngen.
5Surīkhö minyôny-aṅ ngòh tölöök tarik, ngòh tötlöök tarik pöri sumrōngngökūö re miṙē-ĕngre inrē.
6Aṅten ò an ngam lanöökö ngam tö chiplö, sukngö ngam tötlöök pöri ngam tökööl.
7Hĕng tak ngòh mahanyatkö elmat töre nö tö kôlò, nöng öt aṅhav-in; hanyatkö elmat ngam tahëng töre nö öt kôlò, nöng kiröngö aṅ in tö kanôlò.
8Ṙāi nômö tarik ngam kanôlò ò, hö-ö pöri tötkôlò tarik nö talööku nö havahare.
9Ṙāmölōn ngam ëāṅvö tölöök, nyangngö pöri min ngam ëāṅvö tötlöök.
10Vīlö linā-alkūö an ngam inkeūlen ngam töt hòṅ hang, in cha pöri ngam mikah yip tö hòṅ halēnö.
11Ka-eūingen nö keuheūt tö veūtö yanīhi kanôlò, ṙūöhölre sanīöpötī pöri ngòh töng rahëch rahëchyen hamūl.
12Vāhav tī an tö ellōn ngam tö hāṅtö yīhi mineūka, chōn nômö pöri ngam töteung tökūölōn.
13Ngòh tötchumkūöṙen tö ṙô kētö öt inkôlòre, ngòh tö milēḵṙen pöri tö chöngö reushuvö min.
14Löklö nômö an ngam inköphöti aṅ i tö akahaṙa, hinôtö inkūönngö tinngöp kinpaha.
15Teūngen an ngam tölöök mikah tö miṙēlōn, pinlāngen cha pöri ngam tötkô-en talöökö.
16I tökeuheūttöre ngòh tö akaha tarik nö holtö mikah nö lā-evṙen, ngam tö kulō-ovö pöri kitū im kumlō-ovre.
17Fuk i kanihngen tī ön ngòh töt akaha ma-ahānga tö tarik, kumtö lanööken vah pöri ngòh tökô-en samöömngö ṙô.
18Öp yanāchö, miṙē-ĕvö inrē yih nö in ò ngòh samô-òṅ inköphöti, eū-eu pöri ngòh hamang vinëköre.
19Kuchīköti tö ellōn ngam lōn tö hateūngi; sin-òṅkkūö pöri nö i tö kulō-ovö ngam invööngökūö ṙā-ang i tötlöök.
20Akaha ön ngòh kumröönngöre nö hol röön tö akaha tarik, palā-aiṙen pöri min ngòh hamòl tö kulō-ovö.
21Lū-u yin vē tököölö fālen tö öt taneunglen, reushuvö pöri tölöök tö kanôlôṙen.
22Ṙā-akūö yip kūön yip kūönre ön ngòh tölöök tarik tö amin, ṙātu pöri nup kanôlò tötlöök nö lumnööṙö tölöök,
23Pōyen aṅ kūö tö nyā-aṅkūö ngam töt vī-i taṙeū ngam yāich, kūö töt michūḵṙen pöri kinṙôka anū-ö nö fôhòyi.
24Ngòh ṙamā-altī re nö chökṙen tö sumrīktö kūönre, anga-aṅ pöri ngòh tö hāngenlōn tö ò pētngen nö mikahlö lōn ò.
25Kô-ònglōn tī ön ngòh tölöök nö hatööḵngen neūköre, öt tööḵngen pöri ngam aich tötlöök.
Currently Selected:
INCHŌḴ-OṘÔ 13: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
