INCHŌḴ-OṘÔ 12
12
1Ngòh tö hangenlōn tö inköpö chöngö hāngenlōn tö mikah, tökulō-ov pöri ngòh tö sōḵ nö vëka.
2Teūngen ön ngòh tölöök tarik nö in Mā Tēv tö miṙēlōn, öt hakôlöng ṙô pöri ngòh tarik vamī-il tö chōich.
3Hö-ö ön ngòh tarik nö köp tö tī öt lanöökö, öt hētu pöri ngam ṙĕh ngòh tölöök min nö hanlönyken.
4Ngòh tö akaha pīhö kikānö sapīöv ngam pīhö re, ngam kikānö pöri kamëtö sumrōngkūö sā tö chahū-uyö el tangëḵ ò.
5Tölöök nup lōn ngòh tölöök; tömichūḵ chanökhuṙen pöri nup inlēnö tö ngòh tötlöök.
6Hayun mahām nup ṙô ngòh tötlöök, ṙānyö tarik pöri öp elvāng töchiplö.
7Kurīngiyö ön ngòh tötlöök ngaich öt ōtren, sökhak pöri min ngam patī ngòh tölöök.
8Eūka ön ngòh tarik sā öp tölöök in ò mikah, öt hakūökaṙen pöri ngòh tö chōchö ellōn.
9Ĕhten ön ngòh yāich tarik ngòh mahalinṙenre tö ngòh mahanyatkö elmat nö kiröng nö tarik nöng tö nyā-avkūö pöri.
10Ngòh tölöök tarik akahakūö tö nômö töṙeūla, öt milēḵ chanökhutī pöri ngam miṙēlōn ngam tötlöök.
11Ngòh amulkö tumlat pōyen nyā-aṅkūö min, töng öt akaha pöri ngòh tamömkörit töng öt kanôluṙô.
12Taṙöli an ngam töngëḵ chūök chamông im tötlöök, sökhak pöri nö köp ngam ṙĕh ngam tölöök.
13Tingöpö ön ngòh tötlöök tarik tö tanôichngen aṅ i minuh ò, öt kô-òngvah aṅ i munuh ò, öt kô-òngvah pöri ngam tölöök tö kanihngen.
14Ṙeū-eung im ṙòng nup ṙô ngòh tarik nö tööḵngen tö tölöök, havan nö in ò inrē tölöök, havan nö in ò inrē nup la-en kuntī ò.
15I mat ngam tö kulō-ovö öp talöökö ò, hangihtöre pöri tö inlēnö ngòh tö akaha tarik.
16Iṙūö akahaiṙen an ngam inkihten tö ngòh tö kulō-ovö, öt kūöngenre pöri tö akaha tarik tö inchököre.
17Ngòh tö kô-òṙô ameūkö tökô-en, ṙô töminyôny pöri ngam samūöcha.
18Hĕng tak ap umuh tökësô sā sanët tö saphötvökūö, kētö lanööken vah pöri ngam litāk tö akaha.
19Örheūheu nö köp nup minuh tökô-en töng rahëchtaṙen pöri litāk töminyôny-aṅ.
20Yip mahalēnlö tötlöök aṅhav ellōn tö inchīlö, ṙāmölōn pöri cha-a yip mahalēnlö tölöök.
21Öt fukhu tölöök tö tö chōich, tööḵngen pöri ngam tötlöök tö kanihngen.
22Sin-òṅkkūö ngam Mā Tēv nup minuh töminyôny-aṅ, kumchiklōn ò pöri yip tö kô-en inlahen.
23Hanyatngö mikah re ön ngòh tö akaha tarik, ahangnyö kumlō-ov re pöri vē tö kulō-ovö.
24Hayöng an min ngam kël ngòh tö pētngen, kētuṙen pöri min ngam tö ṙāhata nö i tökalēḵ la-en.
25Langanhutī an tö ò ngam pinṙūtölōn ngòh tarik, haṙamlōn ò pöri öp tölöök ṙô.
26Kē-ĕngre an ngam tölöök tarik nö ṙā-ang i tölöök, ngam talöökö ngòh tötlöök pöri hachōḵngen cha nö lō-ongkūö.
27Öt pô-òvö ön min ngòh töṙāhata tarik, teūngen pöri min tö tö pōiṙāi ngòh töpētngen tarik.
28Nômö an ngam kanröönö lanöökö, löö im kinpaha pöri ngam tövaich talöökö.
Currently Selected:
INCHŌḴ-OṘÔ 12: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
