INCHŌḴ-OṘÔ 11
11
1Sin-òṅkkūö ngam Mā Tēv an ngam tö minyôiny kinlah lumngan, kumchiklōn ò pöri ngam tölöök kinlah lumngan.
2Yih ngam inkeūlen, ngaich yih ngam miṙē-ĕv, im tö yāchö ellōn pöri ngam mikah.
3Inchōkūö cha an ngam hinëngö töchiplen, ngam tö kuròk tö michūḵ chanökhuṙen pöri fëlngen cha.
4Öt kanôlu ṙô në kanôlò ip sakāmö lanīnö, ngam lanöökö pöri ṙā-ang im kinpaha.
5Haköpö ò an el talöökö re ngam lanöökö tötfāluṙen, fukngö pöri ngam tötlöök i öt lanöököre.
6Ṙānyen cha an ngam lanöökö töchiplö, ngam tö michūḵ chanökhuṙen pöri kē-ĕ nö hakövö töp töyal lōn cha.
7Yē ngam tötlöök nö kapah, payāyi öp maheūṅkkö ò, öt teungtö yīhi ngaich öp maheūṅkkö ngam tötlöök.
8Ṙānyu an ngam tölöök ṙā-ang i kanihngen, ngaich ël e ngam tötlöök nö ṙëngen.
9Aṅtī tö elvāng re an ngam tötlöök tarik nö fëlngö holre, lökten i ngam mikah pöri ngam tölöök nö ṙānyuvö.
10Yē e nö lööken nö palā-aiṙen, pōitô ngaich ngam ṙanāmölōn.
11Lökten i inkôlò aṅ i chaniplen ngam el panam nö hapōilöngö, tiṙöli pöri angū-ö tökūö elvāng tötlöök.
12Töt akaha ön ngòh mahakūönngö holre, ngòh tarik pöri tö akaha elmat öt ṙô-òvö nö höngngöh.
13Hameuktö töhayunka an ngam kumröönkö re nö söömngöṙô, anga-aṅ pöri ngam nyanatlö nö i ellōn haköp tö hayunka.
14I chūök töt inchō-ovkūö, fukngö tarik; öt palā-aiṙen pöri i töpōyen mahalēn,
15Anga-aṅ ngòh ṙënngô aṅ tahëng chök min nö in e, köp pöri ngòh tö sōḵ nö ṙënngô.
16Kēḵ ineū-eure ngòh tö aṙē-ĕvlōn kikānö, kēḵ kanôlòre inrē ngòh tö chökhuṙen tarik.
17Ngòh tarik tö aheūkölōn hakôlò re, hachököre pöri ngòh tarik töt milēḵ chanökhutī.
18Ngòh tötlöök tarik hayih raneushö tö michūḵṙen, ngòh tameūchtö lanöökö pöri kētö kô-en raneushö.
19Aṅ an min ngòh tö köp nö i lanöökö, kapah pöri min ngòh tamömrit öt lanöökö.
20Sin-òṅkkūö ngam Mā Tēv yin vē tarik tö chōchö ellōn, kumchiklōn ò pöri cha-a yip töt chōchö el talöökö.
21Köpngöre, öthō ön ngòh tötlöök tarik nö öt sācha, ṙānyu pöri min cha-a yip tölöök.
22Sā humlum kinlong i minuh ha-un ön ngòh tövai kikānö töt akaha.
23Manāngen tö lanöökö öp lōn ngòh tölöök, i lanīnö ngam maheūṅkūö ngam tötlöök.
24Hĕng tak tarik tö chulöṙen tī nö kē-ĕti, ngaich sön nö sīöplöre kanôlò, ma-iṅ tīre öp tahëng nö kē-ĕti ngaich nöng sön nö hāṅten.
25Ṙūölöng kanôlò ön min ngòh tarik tö chulöṙen tī, ngòh ṙamös inrē min nö ṙösö.
26Rūtngövah ò vē tarik ngòh mam-iṅ sāiṅy, i kui ò pöri öp inkôlò öp mī-inyihkö e.
27Anga-aṅ ngòh töpētngen nö chöh tölöök chöh miṙēlōn, yih pöri ngam tötlöök nö in ò ngam chamöhö e.
28Nyangngö ön min ngòh mahyönglen re nö i kanôlò, sā tö ayal rōichōn pöri ngòh tölöök min nö kôlòṙen.
29Amin tö kuföt ön min ngòh mahakihten aṅ patī re, tarik alaha ngòh tö akah inrē min ngòh tö kulō-ovö.
30Chōn an ngam ṙòng ngòh tölöök, kēngö nômö pöri ngam töt aṅhav-in tö chöngö.
31Yē ngòh tölöök nö haṙënhanga nö ing tumlat, mötlötī ngòh tötlöök tököölö fālen inrē.
Currently Selected:
INCHŌḴ-OṘÔ 11: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
