INCHŌḴ-OṘÔ 10
10
Inchōḵ-oṙô Sòlòmön
1Inchōḵoṙô Sòlòmön, Ṙāmölōn tī ön tö yöngre kikōnyö, ngòh tö akaha nyīö kikōnyö, miṙivngölōn yöngre pöri tö kikānö ngòh tö kulō-ovö nyīö kikōnyö.
2Öt kanôluṙô nup kanôlò aṅ i tötlöök nö teūngen, ṙā-ainy pöri lanöökö ṙā-ang kinpaha.
3Öt hökiṙen an ngam tölöök nö kapahare tö ngam Mā Tēv, harahkūölōn ngam tötlöök pöri anga-aṅ.
4Öt kôlò tī an ngam töṙāhata kël, kôlòti pöri ngam kël töpētngen.
5Tö akaha ön ngòh nyīö kikōnyö mahamūl hē el sikehngö, kētö sumrōngkūö pöri ngòh nyīö kikōnyö mahaṙòh hē inmūlö ṙòng e.
6I kui tölöök nup inkôlò, hayunngö chanökhuṙen pöri ngam elvāng tötlöök.
7Inkôlò an ngam kanöpölōn tö tölöök, chahū-ui pöri min minënyö tötlöök.
8Hangihtöre an ngam ellōn tö akaha tö në chöngö, yīhi pinlāngen pöri ngòh mahakeūlôre tökulō-ovö.
9Ngòh lamök i hinëngö lök i kanöpöre, ngòh mahachōichngö talöököre pöri kôti min.
10Vīten kanihngen ön ngòh nyamichkö matre, vītö lanāmö pöri ngòh töt piyū-u ṙô nö vë-a.
11Löklö nômö an ngam elvāng tölöök, hanyatngö chanökhuṙen pöri ngam elvāng tötlöök.
12Harunnyö linā-alkūö ngam sunrīkhö; hanyatngö fālen pöri hanāngenlōn.
13Kôti mikah nö i minuh ò ngam tö akaha el mat, chōn pöri i uk ò ngam tö hāṅten tö mikah.
14Hamūlngö mikah yin vē tö akaha tarik, haröhtö öt kanôlò pöri ngam töng ṙô elvāng tö kulō-ovö.
15Ngam töngëḵ elpanam an kanôlò ngòh tarik tökôlò; ngam pinyāingö cha ötkanôlò ngam yāich.
16Chuh im nômö an ngam raneushö tölöök, im tökööl ngam taneūngen tötlöök.
17El kanröönö nômö an ngam mahangihtöre tö inköphöti, lō-ongkūö pöri ngam tösōḵ nö vëka.
18Tö minyôny-aṅ minuh an ngam mahanyatngö sunrīkhö, tökulō-ov inrē ngam tö ṙô tö sinūöcha.
19Öt hāṅten tanôichngen, yĕn maṙôngö ṙô, tö akaha pöri ngòh mahaköp minuh re.
20Tölöök an nö rupīö ngam litāk ngòh tölöök; tö kūöṅnen ṙāi ngam ellōn tötlöök.
21Maṙôngö ha-aṅlö an ngam minuh tölöök, kapah pöri ngòh tö hāṅten tö mikah.
22Vītö kanôlò an ngam inkôlò aṅ im Mā Tēv, öt ṙūöten miṙīvlōn anga-aṅ inrē nö in e.
23Sā minyam an ngam tö vāich la-en nö i ngòh tö kulō-ovö, kumchiklōn tarik pöri tö akaha elmat ngam tölöök inlaha.
24Öp pinhë-eṅkūö öp tötlöök teung hökui ò min, kētu pöri min öp lōn ngòh tölöök.
25Yĕn changāchi öp chanôchö, öt ōtre ngaich ngam tötlöök, örheūheu pöri nö köp ngam tölöök.
26Sā tö hikīölhu vāin nö i kanap, lul inrē nö i mat, ngatī ngòh töṙāhata nö in cha yip tamīnngen ò.
27Marô-òtö tī an tö nômö ngam pinhë-eṅkūö töm Mā Tēv, cheūta pöri min nup samyeūheu tötlöök.
28I ṙanāmölōn manāngen öp maheūṅkkö tölöök, öt teung tö yīhi pöri öp maheūṅkkö tötlöök.
29Töngëḵ an ngam Mā Tēv nö chūök ò öp tö chiplen talöökö, tinṙōlngö pöri nö i tötlöök la-en.
30Öt hētu min nö halönyka ngòh tölöök, öt iyöng panam pöri min ngam tötlöök.
31Kumtö mikah an ngam elvāng tölöök, ṙāti pöri min ngam litāk tö chōich,
32Akahakūö an ngam minuh tölöök tö tö hō-ovö, ngam elvāng tötlöök pöri töp töchōich.
Currently Selected:
INCHŌḴ-OṘÔ 10: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
