INCHŌḴ-OṘÔ 14
14
1Mānlö patī an ngam mikah, aṅtī tö kël re pöri ngam kumlō-ov nö chiṙusten e.
2Pa-ekūö an tö ngam Mā Tēv ngam lamök i tö chiplö, öt chumkūöṙen pöri tö ò ngam tö chavīṙa talöökö.
3Fanòh uk ò an ngam ṙô ngòh tökulō-ovö, aṅten cha pöri nup minuh tö akaha.
4I chūök tö rö-övö kōiny nuā, rö-övö sāiny; yih pöri nö pōyen ṙòng sāiny lökten i kumlēḵ kōiny nuā.
5Öt minyôny-aṅ ön ngòh tökô-en ameū-aṅ, uhômnyö minyôiny-aṅ pöri ngòh samūöcha.
6Chök alaha ön ngòh tö mināich nö chöh mikah, lööṙen pöri ngam inkaha nö i ngòh tarik tö akaha elmat.
7Ṙā-angre i kūö tökulō-ovö, tön rö-ö man umuh kôtökūö tö ṙô mikah.
8Ngam mikah tö akaha tarik chöhlö el talöökö ò, inchīlö pöri ngam kumlō-ov tökulō-ovö.
9Ahūöngö tötlöök an ngam Tēv, im neūkölōn ò pöri ngam tö chiplö nö ṙāmölōn.
10Akahalōn an ngam ellōn tö miṙivlōn re, öt nôlta inrē aṅ tahëng i ṙanāmölōn e.
11Payāyi öp min patī ngòh tötlöök, kôlòṙen pöri min öp rūkui ngòh töchiplö.
12Talöökö öp umuh tö huveū tölōn öp tarik, kinpaha pöri öp tölngökūö e.
13Pòrô nö ip nīölö ūngö ngam ellōn, miṙivlōn inrē tölngö ngam ṙanāmölōn.
14Tööḵngen ön min ngòh tötlöök tarik tö ṙòng nup talöököre, ngòh tölöök tarik inrē tö ṙòng nup la-en re.
15Ṙātö ellōn re ön ngòh yāich i tökeuheūttöre ngëichkö talöökö re pöri ngam tö akaha.
16Ṙēmen ngòh tö-akaha tarik havööngökūö re inrē tö ngam tötlöök, ngòh tö kulō-ovö pöri kavalngö sinôtöre öt chumkūöṙen inrē.
17Kulō-ovṙen ön ngòh tarik tö ka-eūyö tanānyö, tö möi pöri ngòh tarik tö akahaṙa.
18Teūngen ön ngòh yāich tö kumlō-ovö, sumpīövö pöri ngòh tö akaha tö mikah.
19Sōnngöre tötlöök nö i kūö tölöök, ngam tötlöök i kūö inkūp ngam tölöök.
20Öt hanghuṙen ön ngòh yāich tö holre, pōyen hol pöri ngòh tökôlò.
21Ngòh tö mināich tö holre tököölö fālen, tö ṙāmölōn pöri ngòh tö aheūkölōn tö yāich.
22Röh yip nö vāich vamī-il tötlöök? Höngökūö pöri yip vamī tölöök tö hināngö chöngö kanô-en inrē.
23I taṙòkhöre la-en nup kanôlò, ngam töng ṙô pöri tī-iv tö neūkö.
24Ngam mikah an sapīöv ngòh tö akahaṙa, kumlō-ovö pöri aneūmö tökulō-vö.
25Hayööken nômö an ngam tökô-en ameū-a, ngam tö minyôny-aṅ pöri kamë-anga.
26Kiröng an ngam inyönglen ing tö pa-ekūö tö ngam Mā Tēv, chūöku innyatlö inrē min yip kūön ò.
27Löklö nômö an ngam pinhë-eṅkūö tö ngam Mā Tēv, in e öi kôḵ hakūönngö tinngöp kinpaha.
28I ṙôken tarik ineū-eu an ngam rācha, pinyāingö kūön rācha pöri törö-ö tarik.
29Ngòh töṙēmö tanānyö kiröngö mikah elmat, ngòh tö kurātö tanānyö pöri hapōilö kumlō-ovö.
30Kētö nômö alaha an ngam töṙēm ellōn, chahū-uitī pöri tö tangëḵ ngam tanānyö.
31Ngòh tamṙam yāich tarik maha-āichngen ngam Vamīlen ò, ameū an pöri anga-aṅ ngam tö aṙē-ĕvlōn tö yāich.
32Sūkiyö an ngam tötlöök lökten tötlöök la-en re, kôtökūö pöri ngam tölöök tö innyatlö lökten i mikah ò.
33Köp an ngam mikah nö ellōn tö akaha elmat tarik, hö-ö pöri angū-ö nö akahaiṙen nö ellōn tökulō-ovö.
34Hapōilö pumnāmö tarik an ngam lanöökö, minṙēngö tarik pöri ngam tökööl.
35Ngòh tarik alaha tö lēnötī aheukhuvö tö ngam rācha, fuk in ò pöri ngam lanīnö ò öp tö lā-evṙen tö sumrōngkūö.
Currently Selected:
INCHŌḴ-OṘÔ 14: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
