INCHŌḴ-OṘÔ 15
15
1Havööngö kūö lanīnö an ngam törēm sanap ṙô, haruhlö tanānyö pöri ngam tökesṙô.
2Ṙūönyö mikah an ngam litāk tö-akaha, vōknyö kumlō-ov pöri ngam elvāng tökulō-ov.
3Keuheūtngöre chūök mat an ngam Mā Tēv, aṅtö tötlöök tölöök inrē.
4Chōn nômö an ngam töṙēm litāk, likölngö ellōn pöri öp töchōich in e.
5Öt chumkūöṙen ngòh tökulō-ov tö inköptöre tö yöngre, tö-akaha pöri ngòh mahangihtöre tö inlēnöre.
6Pōyen nup kanôlò el patī ngòh tölöök, fuk kui pöri tö kanihngen nup yamih nö im tötlöök.
7Pirātngö mikah nun në minuh tö-akaha; öt ngatī lōn tökulō-ovö.
8Sin-òkkūö ngam Mā Tēv në tökētu tötlöök, kumchiklōn ò pöri ngam invë-a tö töchiplö.
9Sin-òkkūö ngam Mā Tēv an ngam talöökö tötlöök, hāngenlōn pöri anga-aṅ tö famchū lanöökö.
10Kalēḵ öp inköp chöngö nö in ò öp ṙamā-ang el talöököre; kapah an min ngam tösōḵ nö vëka.
11Chūök Kupah Apatön inrē i kūö ngam Mā Tēv nö luvë-ak kūö, hönlöre nup ellōn tarik.
12Öt hāngen ön ngòh tömināich nö vëka; öt hòṅ chuh i tö-akaha an.
13Ṙāmölōn tī an tö arëkūö ngam ellōn töṙāmölōn, lakūki pöri ngam ellōn tökūö miṙivlōn.
14Chöh mikah ap ellōn ò öp tö-akaha elmat, ha-aṅhalre pöri öp elvāng tökulō-ov tö kumlō-ov,
15Ṙòkhöre nup sakāmö ngòh töhakihtuṙen nö tötlöök, ngòh tökuchīkö ellōn pöri iṙūöhökūö nö nyā-aṅvkūö.
16Ĕhten ön ngih törahëchyen holtö pinhë-eṅkūö tö ngam Mā Tēv tö ngam töpōyen kanôlò nö holtö kanihngen.
17Ĕhten an ngam rōi chōn i nyinā-aṅ tö hatööm yĕn chūöku tö hanāngenlōn tö ngòh tösumngöönyu alaha kōiny nuā nö holtö sunrīkhö.
18Harunlö linā-alkūö ön ngòh tötainy tarik, ngòh töṙēmö tanānyö pöri tahngö linā-alkūö.
19Sīöplö ël tö töchökhu ngam talöökö töṙahata, ngam kanröönö töchiplö pöri nö töṙā-a ël tökiröng talöökö.
20Ṙāmölōn tī an tö yöng re ngòh nyīö kikōnyö tö-akaha, ngòh tökulō-ov pöri tarik öt chumkūöṙen tö yöngre kikānö.
21Ṙanāmölōn ön ngih kumlō-ov nö in ò ngòh töt akahaṙa, chīpö röön pöri tarik tö akaha elmat nö kiröönngöre.
22Öt halēnlöng vaich ngaich töhalēnö, ṙōlö ṙô pöri mahalēn teunglen anū-ö.
23Ṙāmölōn tī öp töchip sanapṙô tö tarik, öp ṙô ip hē, yöng lanöökö e angū-ö!
24Kū-ötö lātulöng ap talöökö öp tö-akaha tarik im nômö, pò ò nö hòṅ hakūnngö Chūök Kupah lātaṙeū.
25Ṙòngngö patī mahakeūlenre an ngam Mā Tēv, haköp kūöngö panam tafīösi pöri.
26Sin-òkkūö ngam Mā Tēv nuk lōn tö tötlöök, ṙanāmölōn ò nup töhet ṙô.
27Ngòh töyal tö tötlöök taneūngen, vī kanihngen nö i patī re, aṅ pöri min ngòh tö sōḵ tö ṙāi minyôiny-aṅ.
28Ngëichngö ellōn re ön ngòh tölöök tö öp sanap ṙô, hōngnyö tötlöök öp elvāng ngòh tötlöök.
29Marôvat an ngam Mā Tēv tö ngam tötlöök, hang invë-a pöri anga-aṅ tö ngam tölöök.
30Ṙāmölōn tī an tö ellōn ngam hanātö minë mat, öp tölöök inhānga inrē tumfömlö minë tangëḵ.
31Anga-aṅ ngòh mahangihtö elnang re tö tölöök inlēnö köp min nö i tö-akaha.
32Anga-aṅ ngòh tösōḵ tö inköphöti mahayëḵngenre, anga-aṅ pöri ngòh mahangihtöre tö inlēnö teūngen tö mikah elmat.
33Ngam pinhë-eṅkūö tö ngam Mā Tēv inköphöti im mikah, urĕh inrē ngam yanāchö tö ineū-eu.
Currently Selected:
INCHŌḴ-OṘÔ 15: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
