INCHŌḴ-OṘÔ 16
16
1Aṅ i tarik ngam tö halēni ellōn, aṅ im Mā Tēv pöri ngam sanapṙô litāk.
2Ṙòkhöre nup talöökö ngòh tarik nö het nö i mat ò, kalah lumngan ma-alaha pöri ngam Mā Tēv.
3Im Mā Tēv tī man tö la-enre, ngaich köp min nup halēnlö meh.
4Chööḵnyu tī an ngam Mā Tēv nö vī tökeuheūttöre, ngam tötlöök inrē ip sakāmö kanihngen.
5Sin-òṅkkūö ngam Mā Tēv an ngam töt akahaṙa; köpölōn, öt kiröönngöre an min nö öt sācha.
6Halāmö tökööl tö hinang chöngö kanô-en inrē, hakūönngö tölöök inrē ngam pinhë-eṅkūö ngam tarik tö ngam Mā Tēv.
7Yē nup talöökö ngam tarik nö ṙāmölōn tī tö ngam Mā Tēv, vīten ngam tökunyaha-elmat tö re anga-aṅ nö lām nö in Ò.
8Ĕhten öp tö rahëichyen nö holtö lanöökö tö tö pōyen masūl nö holtö michūḵṙen.
9Halēn talöökö re an ngam ellōn tarik, hachōḵ vanāngö ò pöri ngam Mā Tēv.
10I minuh rācha nup tö vīhötvö chöngö, öt köölö fālen öp elvāng ò i kinṙôka.
11Aṅ im Mā Tēv öp tölöök kinlah lumngan; la-en ò nup el inyul tökalaha lumngan.
12Ngam la-en tötlöök sin-òṅkkūö nö i rācha, pò ngam kantēra nö ṙātu lökten i lanöökö.
13Kumchiklōn rācha nup minuh tölöök, hāngenlōn inrē anga-aṅ tö ò öp tö chīpö ṙô.
14Inhangkö kinpaha an ngam lanīnö rācha, ṙaptö e inrē ngòh tö akaha tarik.
15Nômö ap umuh i hanātökūö ngam rācha, sā taṙul öp neūkölōn ò inrē tökumtö kūö sūng kumṙah.
16Ĕhten an ngam kinë-eṅ mikah tö kinë-eṅ humlum; ngam intöllö kinë-eṅ mikah elmat ĕhten tö rupīö.
17Kānngöre an ngam tökiröng talöökö tö chiplö tö ngam tötlöök; ngòh lamak talöököre haköp nômöre.
18Urēhĕkūö pinlāngen an ngam inkeūlen nö kiröönngöre, urēhĕkūö fanukngö inrē ngam inkeūlen ellōn.
19Ĕhten an ngam yanāchö ellōn i yāich tö ngam minchööḵö pôḵ hol mahakeūlen re.
20Ngòh mahangihtöre tö ngam ṙô kôlòṙen min, ṙāmölōn inrē anga-aṅ ngòh mahayönglen re nö im Mā Tēv.
21Tarik tö chanöhöv ellōn invëka ngam ellōn tö akaha, tölöök ṙô inrē ṙūölö mileūchen linīpö.
22Löklö nômö an ngam mikah in ò ngam tö aṅhav-in tö e, chinökṙen pöri ngam kumlō-ovö nö i tö kulō-ov.
23Öp ellōn tö akaha vīten ngam ṙô ò nö tö chip kinṙôka, ṙūöten tö mileūchen linīpö inrē nö i minuh ò.
24Nup tölöök ṙô sā chūök hönī, pachāka nö ellōn lanööken alaha inrē.
25Talöökö ap umuh tölöök tölōn tarik, kinpaha pöri öp tölngö ngam talöökö.
26Lā-evṙen öp chūök neūkö ngam tarik nö in ò; i ṙūöhö ṙô ngam elvāng tö ò.
27Vīken tötlöök ön ngòh tarik töt kanôluṙô, sā tö ngehngökūö tameūyö öp ṙô ò inrē.
28Pirātngö linā-alkūö ngòh tölöök tarik, hiṙeūtkôre inrē nö haköhngen milālöre hol re.
29Haṙöingö holre ön ngòh tö tainy tarik hachōḵngen ò inrē nö el öp talöökö tötlöök.
30Ngòh mamumtö kūö re kamënyö nup tötlöök.
31Ineū-eu nun në pakūkui nö sapīöv; taneūngen an im nômö tölöök.
32Anga-aṅ ngòh tö ṙēmö tanānyö ĕhten tö tökalēḵ, anga-aṅ inrē ngòh mahayöng ellōn re ĕhten tö ò öp kamë el panam.
33Kavaltu an ngam kinlah taneūngen nö i ṙòng takeun, aṅ im Mā Tēv pöri nup chöngö.
Currently Selected:
INCHŌḴ-OṘÔ 16: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
