INCHŌḴ-OṘÔ 17
17
1Ĕhten ön ngih tönyô nyā-akūö nö holtö chanëven tö ngih patī tö tööḵlö tö tökiröng nyā-akūö nö holtö linā-alkūö.
2Ngòh tö akaha inlahen töhakövö hayöng kūön re min öp tö lā-evṙen tö sinrōngkūö, amīnu inrē nö holkūö yip mak-alahare.
3Chūök inṙöich rupīö tanīönyö, tö hūkūö tameūyö inrē i humlum, kalah ellōn inrē ngam Mā Tēv.
4Hangihtöre ön ngòh tötlöökö la-en nö i minuh tötlöök; ngòh töminyôny aṅ inrē hangihtöre nö i litāk vamī tötlēn.
5Ngòh mumnônngen yāich hayëḵngen ap vamī-i ò; anga-aṅ ngòh tö ṙamölōn tö öt kanôlò öt kiröönngöre min nö öt sācha.
6Sapīöv tököiny yin vē nyīö yōm, ineū-eu yip kūön inrē yip yöng cha.
7Tölöök ṙô öt tölöök nö i tö kulō-ovö; höichngen minyôny-aṅ ṙô nö i kūö rācha.
8Sā tömilūönö ihong an ngam ṙāi minyôny nö i mat ò öp kamëtö e; kôlòṙen anga-aṅ ip töng kū-ö ò nö kānngöre.
9Chamöh hanāngenlōn an ngòh ma-aṙē-ĕl fālen, anga-aṅ pöri ngam mahavannyö tö ngaichngen harēvngö holre.
10Chuh lā taṙeū öp vinëkö nö ellōn ngòh tarik tö akaha elmat mötlö tö tö hēngòng kinsōlö i ngòh tökulō-ovö.
11Höng chöh inhôngen ön ngòh töt löök tarik, ngaich tīntu min öp töt milēḵ chanökhutī ma-ahānga nö lā-al ò.
12Yĕh hökngen öp tarik nö höngkūö öp tö ulāyi kūön kan për, höichngen anga-aṅ tö tökulō-ov nö i kumlō-ovre.
13Yē ngòh tarik nö haṙënngö tölöök tö tötlöök, öt kē-ĕng re min tötlöök nö ṙā-ang patī ò.
14Ngam ranehlö linā-alkūö sā tö löpnyukūö mak; lökten kē-ĕngre urēhĕkūö öp linā-alkūö.
15Ang-aṅ ngòh ṙamā-al tötlöök anga-aṅ inrē ngòh töt mahakôlò tölöök hĕngren achā-a nö sin-òṅkkūö ngam Mā Tēv.
16Kūö yòh ang ngòh tökulō-ovö nö aṅhav eltī tö ṙāi nö havah mikah, yē ò nö öt kuilōnuvö?
17Örheūhen ön ngòh hol nö hāngenlōn; fötnyu inrē mak-alaha nö i linā-alkūö.
18Kilēḵngôre ön ngòh tarik töt akahaṙa, ane inrē kētöre nö ṙënngô nö i kūö holre.
19Ngòh tö hāngenlōn tö tanôichngen hāngenlōn tö linā-alkūö; ngòh ṙamūhölkui inkūp re chöh pinlāngen.
20Öt kôlòṙen ön ngòh tarik tökurôkö ellōn, fukngö inrē ngòh tö chōchö rōi litāk nö i öt kanôlò.
21Miṙīvlōn yöngre ön ngòh nyīö tökulō-ovö, öt ṙanāmulōn ön ngòh yöng ngòh tö kulō-ovö inrē.
22Tölöök an nö lanë-en ngam ṙanāmö ellōn, nyôngötī pöri tö tangëḵ ngam miṙīvlōn.
23Hō-o ṙāi minyôny-aṅ ön ngòh tötlöök tarik nö ṙeū-eung im elngòh nö hachōchngö talöökö kinṙôka tötmichūḵṙen.
24Ngòh tö akaha elmat tarik hachip kūö re nö im mikah, ip tölngö ngih tumlat pöri nup mat ngòh tökulō-ovö.
25Miṙīvngölōn yöngre ön ngòh nyīö tökulō-ovö miṙīvlōn ò inrē ngam kamyôḵnyen ò.
26Ötlöök an angū-ö ngam kinë-eṅ ṙāi fālen nö i tölöök tarik; vaich an angū-ö finôhò mā tarik.
27Tö akaha ön ngòh mam-iṅ ṙô re, tö akaha elmat inrē nö tarik ngòh tö ufōvö ellōn.
28Pòrô ngòh tö kulō-ovö töng öt ṙô-òvö, ngaich tö akaha tö lōn; hē ò nö mumtökūö re, sā tö ṙēmen anga-aṅ.
Currently Selected:
INCHŌḴ-OṘÔ 17: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
