INCHŌḴ-OṘÔ 18
18
1Anga-aṅ ngòh maharīkngen re chöh löknyö chööḵnyö re nö harēvngö re i nup tölöök inkaha fālen.
2Öt kuchīkölōn ön ngòh tö kulō-ovö i mikah elmat, höng im vinë-enylōn re pöri.
3Yē ngam öt lanöökö nö yih, yih inrē ngam nūöngö; hol ṙinā-ang ineū-eu inrē yih ngam minṙēngö.
4Tö aṙū-uti an nö mak ngam ṙô ellōn tarik; töpòpnyi an nö mak ngam löknyö mikah.
5Öt tölöök an angū-ö intölten tötlöök tarik, hēk inrē ngam kinëngö kinṙôka tötmichūṙen nö i tölöök tarik.
6Kētö linā-alkūö an ngam minuh tö kulō-ovö, havëkö finôhò inrē ngam elvāng ò.
7Lòkngö vah ò an ngam elvāng tökulō-ovö, tinngöp ò inrē minë minuh ò.
8Nup tö hiṙeūtka ṙô sā tö kuchik nyā-aṅkūö; mënhöt anū-ö lā tuhēt el ngam alaha.
9Ngòh töhā-en nö i la-en re hanöng kisānö ò an ngam tumṙōlhanga.
10Töngëḵ an nö chūök chamônga ngam minë-eny ngam Mā Tēv; falhötre nö el e ngòh tölöök tarik ngaich öt palā-aiṙen.
11Ngam töngëḵ el panam ò kanôlò ngam tökôlò tarik, sātö marô-òlkui kinlōngö inrē nö laklen ò.
12Keū an ngam ellōn ngòh tarik urēhĕkūö pinlāngen, ngam yanāchö pöri kiröönngöre urēhĕkūö ineū-eu.
13Yĕn hĕng tak öp samap ṙô urēhĕkūö ò nö hang, kumlō-ov ò an angū-ö sumrōngkūö inrē.
14Keun invah tarik an min ngam ellōn ò; chīö pöri tökô nö keun miṙivlōn?
15Teūngen ön tö mikah ngih tö pētngen ellōn, chöh mikah inrē öp elnang ngòh tö akaha.
16Nup tī ngòh tarik raneushö vītö chūök ò kēten ò inrē ikūö tökiröng tarik.
17Anga-aṅ öp mu-urĕhnyi ṙô töp fālen re töchipô tö lōn, hanöng saha ngam tahëng nö yih ngaich kalahan.
18Keuheūtngen kinilṙô an ngam kinlah taneūngen vītö talöökö nap tö nët tökalēḵ lamā-alkūö re nö lēn.
19Sā tö ngëḵ an el panam ngam hinòlṙen tö mak alahare, ngam linā-alkūö pöri sā inkālkūö ip tökiröng patī.
20Tööḵngen ön ngòh tarik i ṙòng elvāng re; lökten ṙòng minë minuhre an nö töö-önglōn,
21I minhôiṅyö litāk an ngam kinpaha nômö inrē, ngaich cha-a yip tö hāngenlōn tö e nyā ṙòng e min.
22Anga-aṅ ngòh tö kôtökūö tö pīhöre kôtökūö tö tölöök chehen, ngaich teūngen tö neūkölōn nö ṙā-ang im Mā Tēv.
23Hòṅ aṙētuṙô ngòh yāich tarik. Kësô pöri ngam tökôlò nö sapṙô.
24Hol yip umuh mahanyatkö elmat nö hol, hĕng tak pöri öp hol nö umuh tö tanta mötlö tö mak-alaha.
Currently Selected:
INCHŌḴ-OṘÔ 18: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
