INCHŌḴ-OṘÔ 19
19
1Ĕhten ön ngòh yāich tarik ngòh lamök i mikah re, tö ngòh tarik ngòh töchōchô, tökulō-ovö inrē.
2Öt tölöök an nö in ngòh tarik nöng öt akahaṙa, anga-aṅ inrē ngòh tö kurātöröön vāchö talöökö.
3Yē öp kumlō-ov ngòh tarik nö kētö öp talöökö ò nö im öt kanôlò, tainy ngaich öp ellōn ò nö lā-alkūö ngam Mā Tēv.
4Pōyen hol ön ngih kanôlò tö tufömngöre, ṙā-ai pöri ngòh yāich tarik tö hol re.
5Öt kiröönngöre ön min ngòh samūöchköholre nö öt sācha, anga-aṅ inrē ngòh tö minyôny-aṅ öthō inrē nö öt kô-òngvah.
6Maṙôngö yip chamöh neūkölōn öp tarik tö chulöṙentī nö kē-ĕtī, ṙòkhöre inrē nö hol ngòh tarik kamëtö raneushö.
7Ṙòkhöre yip mak-alaha ngòh yāich nö surīkhen ò; höichngen yip hol ò nö ṙāngen ò nö marôvat nö kiröönngöre? Fachūken cha anga-aṅ tö ṙô re, hö-ö pöri nö īnu tö cha.
8Ngòh kamë mikah hāngenlōn töre; kôlòṙen min anga-aṅ ngòh mahaköp mikah elmat.
9Öt kiröönngöre ön min ngòh samūöchkö holre nö öt sācha, anga-aṅ inrē ngòh tö minyôny-aṅ palā-aiṙen min.
10Ötkô ön ngòh tö kulō-ovö nö i yöng i tanë-eṅ, höichngen ngòh kaitī nö hayöng kūön rācha.
11Vītö tarik an ngam mikah nö ṙēmö tanānyö, ineū-eu ò an inrē angū-ö ngam töt nginëchkö fālen.
12Sā sinṙöpö tö lāyön öp lanīnö ngòh rācha, sā tacham pöri i kui kiyôp öp miṙēlōn ò.
13Pinlāngen yöng re ön ngòh tökulō-ov nyīö kikōnyö, sā tö aṙöka kumṙah inrē ngam linā-alkūö tö kikānö tö pīhövö.
14Löktökūö yöng në patī: kanôlò inrē nö amin, aṅ im Mā Tēv pöri ngòh tö akaha tö pīhövö kikānö.
15Lapātö tī an ngam ṙanāhata tö inṙôhò, aheuk min inrē nö kapaha re ngòh tö ṙāhata tarik.
16Aṅhatī ön tö nômöre ngòh mahaköp chöngö; kapah pöri min ngam tösōḵ tö ngam ṙô.
17Mahaṙūönghökūö ngam Mā Tēv an ngam tö aheūkölōn tö yāich, ngaich anga-aṅ min nö havantö öp tī ò nö in ò.
18Mikahlölōn ngam kūön re kikōnyö isaha öp nyanātö meh nö umuh; un ip finëlngö ò öp ellōn meh.
19Kētö sācha öp min tarik tö kiröngö lanīnö; pò meh yē meh ṙānyen ò, höng hēkhökūöre me-eṅ min ngatī.
20Hangihtöre tö inlēnö hō-o inköptöre inrē, hòṅ meh teūngen tö mikah lā unôich.
21Pōyen nup tö halēnlöngö ellōn tarik, ngam chööḵnyö ngam Mā Tēv pöri min tököp.
22Öp hinang chöngö öp tö hòṅ in ngòh tarik, ĕhten inrē ngòh yāich tarik tö ngòh tö minyôny-aṅ.
23Chuh im nômö tī an ngam pinhë-eṅkūö tö ngam Mā Tēv; tööḵngen inrē ngam tö aṅhav-in tö e; ötlökö an min tö kanihngen.
24Chiṙīmtö tīre ön ngòh tö ṙāhata nö el pingāṅl, öt rēhĕn inrē nö havanlö e nö elvāng re.
25Foh ngam tö mināich ngaich haköpö e min ngam yāich tö akaha; vëkö ngam tarik tö akaha elmat, ngaich teūngen min anga-aṅ tö mikah.
26Ngòh tö chökhuṙen tö yöng re tö kikōnyö luḵngö ngam yöng re inrē kikānö, kikōnyö an anga-aṅ nö kūön kamëtö sinrōngkūö miṙē-ĕv inrē.
27Kūön chu, ṙā-angre i hināngö inköphöti në töng lanô-òṅkūö ṙā-ang i nup ṙô mikah.
28Mahayëḵngen kinṙôka töt michūṙen ngam töt kanôluṙô vamë-eny matre, ngam elvāng tötlöök inrē, mīktö öt lanöökö.
29Löö tö mināich an ngam öt inkôlò, ngam finôhò inrē i uk ngam tö kulō-ovö.
Currently Selected:
INCHŌḴ-OṘÔ 19: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
