INCHŌḴ-OṘÔ 20
20
1Mahayëḵngen ön ngih vāin, tinṙōllen ngih tökalēḵ ka-eūt; öp tö hachō-oiṙen tö e inrē öt akaha.
2Sā sinṙöpö tö lāyön öp pinhë-eṅkūö tö lanīnö rācha; chūhu nômö ön ngòh maharunnyö tanānyö ò.
3Ineū-eu ngòh tarik an ngam ṙinūöhöng re tö linā-alkūö lā-alkūö re pöri vē tö kulō-ovö.
4Ngòh tö ṙāhata öt kuköhlö tumlat hē el ilūöi; chöh anga-aṅ hē el kanöinyông, ngaich öt taneūnguṙen.
5Sā tö aṙū mak öp chööḵnyö nö ellōn ngòh tarik, tūöklö e pöri ngòh tarik tö akaha elmat.
6Ahangköre ngòh tarik nö hamang chöngö, chīö pöri tökô nö kôtökūö tö tarik tökô-en
7Lök i mikahre ön ngòh tölöök tarik tökôlò yip kūön ò unôichrit ò.
8Hĕng tak öp rācha amūichhak nö el kantēra inkaha fālen pitōngngö tötlöök nö aṅtī tö matre.
9Chiāp tökô nö ngö ṙô, Ngaich chin vī ellōn re nö het; het chin ngaich öt īnu tö tökööl?
10Ṙōlkangen kinlah lumngan ṙōlkangen kinlah nyanūmö inrē hĕngren nyöre nö sin-òṅkkūö ngam Mā Tēv.
11Pòrô ngòh nyīö ngaich i nup la-en ò nö mikahtökūö tö re, yĕn töhet öp la-en ò töhet chip inrē.
12Ngam elnang hamang ngam mat inrē mameuk, vahī ngam Mā Tēv nyöre anū-ö.
13Un hāngenlōn tö inṙôhò, hòṅ meh min ötlöök im öt kanôlò; milaklö matre man, ngaich pōyen nyā-aṅkūö min me-eṅ.
14Ötlöök an, ötlöök an, Ṙô ngam mahavah; hē ò pöri nö kiröönngöre, eū-eure anga-aṅ ngaich.
15Humlum ap umuh, pōyen inrē töpōiṙāi ihong; töpōiṙāi pöri nö yanöṅtö nup minuh mikah.
16Kē öp tökiröng inyut ngam tarik yē ò nö ṙënngô öp aṅ tahëng, haköp ngam kinlēḵngô ò inrē yē ò nö ṙënngô aṅ tahëng panam.
17Pachāka nyā-aṅkūö nö in ngòh tarik töteūngen tö e lökten i inchīlö, unôich pöri öp elvāng ò nö tööḵlö tö kiṙūöh.
18Haköpi nup töhalēnlöng tö inlēnö, kiyūngö ngih kinyūngö lökten ip töhuveū inchōkūö.
19Anga-aṅ ngòh kumröönngöre samöömkö ṙô hameuktö tö hayunka; lökten un hĕngtak hanôl töp tö ṙô tö kumlō-ov.
20Yĕn hĕngtak ramūtngövah kikōnyö yöngre hēk kikānö yöngre, hanyāngi min öp ëāṅvö ò nö el tö sangūlö.
21Öp amin tö kurāten kinë-eṅ ik raneh ötkôlò min ip manā-aṅ.
22Un ngö ṙô, Tī tö tötlöök chin min havāhal; hökkö ngam Mā Tēv, holṙen meh min anga-aṅ.
23Töṙōlkangen kinlah lumngan sin-òṅkkūö ngam Mā Tēv öt löök inrē minyôny-aṅ kinlah lumngan.
24Hachōtu vanāngö ngòh tarik tö ngam Mā Tēv; sitih kanô-òṅ ang ngòh tarik nö akah talöökö ò?
25Tinngöp ngòh tarik an yĕn ka-eūyö ṙô nö ngö, Töhet an, nöng unôich inrē tö ngam tö chūöku kinlēḵngôre nö fē-ĕlre.
26Pitōngngö tötlöök ön ngòh tö akaha rācha, haröltö kui cha inrē tö kalröön inröl.
27Ëāṅvö ngam Mā Tēv an ngam ma-alaha ngam tarik, chök nup lamā tuhēt ngam alaha ò.
28Haköp ngam rācha an ngam hinang chöngö kanô-en ṙapka inrē ngam kantēra ò tö lanöökö.
29Ineū-eu yip ṙāl tarik an ngam kumlēḵ cha vanāyö tö köiny tarik pöri ngam pakūkui cha.
30Hetngö tī tö tötlöök nup kinsōlö tö kônyitī tö vah; hëtö tī nup finôhò töp lā tuhēt alaha.
Currently Selected:
INCHŌḴ-OṘÔ 20: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
