INCHŌḴ-OṘÔ 21
21
1Töhëm an nö mak ngam ellōn ngam rācha eltī ngam Mā Tēv; havēngökūö e an i kū-ö lōn ò.
2Töchip ön ngih talöökö ngòh tarik nö i mat ò, kalah lumngan ellōn ò pöri ngam Mā Tēv.
3Tölöök vahīṙen öt michūḵṙen kinṙôka inrē mötlö hinô-òṅ tö ngam Mā Tēv tö tökētu.
4Tökësen mat mahakeūlenre ellōn inrē, tökööl, ëāṅvö ngam tötlöök.
5Öp töpētngen inlēnlö lamöö im tanë-eṅ, in cha pöri yip tö kurāten yih ngam yanāchö.
6Ngam kinë-eṅ kanôlò lökten litāk töminyôny-aṅ tö heuingö an hanusngö tinngöp kinpaha inrē.
7Ngam chanökhuṙen aṅ i tötlöök chūhutī min tö cha, pò cha nö sōḵ nö la-evṙen tö tölöök.
8Tö kuròk ön ngam talöökö tö fāluṙen, tö chip pöri ngam inlahen töhet.
9Ĕhten ön ngam inyöngö sinkeukngö i kui patī tö ngam hinòltöṙah kikānö lamā-alkūö el patī.
10Lōntö tötlöök ngam nômö ngòh tötlöök; i kūö ò öp hol ò nö öt kôtökūö tö miṙēlōn.
11Yē ngòh tö mināich nö sācha, akaha ngaich ngam yāich; yĕn haköptu tö akaha tarik, teūngen anga-aṅ tö mikah.
12Ngëichkö patī ngam tötlöök ngam tölöök; fukngö ngam tötlöök nö i pinlāngen.
13Ngòh tumlupngö elnang re tö ṙô yāich nö peuiny, peuiny min anga-aṅ ngaich öt hāngö ṙô.
14Ngam tö ulāitu raneushö lakngö tanānyö; ngih elngòh ṙāi minyôny-aṅ inrē, lakngö tökalēḵ lanīnö.
15Yĕn kēkaṙen töt michūḵṙen kinṙôka, ṙanāmölōn tī angū-ö tö tölöök, nganāngö tötlöökö la-en pöri.
16Ngòh tarik tö karööna nö ṙā-ang talöökö mikah heūheure min el manūlö yip tö kapah.
17Tökôlò ön min nö tarik ngòh töhāngenlōn tö minyam; ötkôlò ön min tö chehen ngòh töhāngenlōn tö ka-eūt tavī-i inrē.
18Ṙāi tarik ön ngòh tötlöök nö i ngòh tölöök ngòh tötkô-en inrē nö im töchiplö.
19Ĕhten inyöngö el tönyaṅlnyi panam tö inyöngö in ngòh kikānö lamā-alkūö töng takākaṙô inrē.
20Köp tö töpōi ṙāi chehen nö elyöngö ngòh tö akaha, ngeūktö u pöri tö kulō-ov tarik.
21Ngòh famchūrit lanöökö neūkölōn inrē kôtökūö min tö nômö ineū-eu inrē.
22Ngòh tö akaha tarik reunglö nö el panam tökalēḵ ngaich tiṙölngö ngam töngëḵ chūök inyönglen cha.
23Ngòh mahaköp elvāng re litākre inrē köptī tö re nö la-uk kanihngen.
24Mināich, Minë-eny ngam mahakeūlen re tarik tökësen tölā-evṙen tö tökësen inkeūlen.
25Öp lōn ngòh tö ṙāhata tarik fëlngen ò pò minë kël ò nö sōḵ nö la-evṙen.
26Yikhanga ngòh tötlöök tarik irô-òtö sakāmö, kē-ĕti pöri ngòh tölöök öt ma-inngenre.
27Sin-òṅkkūö an ngam tökētu tö ngam tötlöök; höichngen yē ò nö kētö e nö holtö tötlöök lōn re.
28Ngòh samūöchkö holre ötkôlò min, öp ṙô ngòh hamang pöri tarik köp min.
29Hangëkūöre ngòh tötlöök tarik, ngëichkö talöököre pöri öp tö chiplen tarik.
30Hö-ö mikah, hö-ö mikah elmat, hö-ö inlēnö, nö kôḵ nö lā-al ngam Mā Tēv.
31Halēnö an ngam kōra ip sakāmö kinyūngö, aṅ im Mā Tēv pöri ngam minhôiṅyö.
Currently Selected:
INCHŌḴ-OṘÔ 21: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
