INCHŌḴ-OṘÔ 22
22
1Hòṅ atöllöng tölöök minë-eny nö mötlö tö töpōyen kanôlò, mötlö an inrē ngam neūkölōn tö rupīö hēk humlum.
2Meukkūö höö tökôlò yāich inrē; ngam Mā Tēv an vamī-i cha nö ṙòkhöre.
3Meuk kanihngen ngòh tö akaha tarik ngaich hayunngöre; iṙūöhöröön pöri töt akaha, ngaich kihten tökūö e.
4Raneushö inyāichngö pinhë-eṅkūö inrē tö ngam Mā Tēv nuk kanôlò, ineū-eu, nômö inrē.
5El talöökö ngòh töchōich nuk tö lòklöre kūö tinngöp inrē, anga-aṅ ngòh lamāköre köp min nö marôvat tö u.
6Haköptö ngam nyīö el talöökö ò nö kiröönngöre, ngaich yē ò nö köiny öthō min anga-aṅ nö ṙāngen e.
7Hayöng yāich ngòh tökôlò, ngòh mahaṙūöng inrē töhakövö tö ngam tö haṙūönghukūö.
8Angā-aṅ ngòh tameūchtö inkaha fālen tö michūḵṙen uvòhlö kanihngen min, ötteunglen min inrē öp fanòh aṅ i tanānyö ò.
9Ngòh tö aṅhav elmat tö mineukṙen kôlò min, pò ò nö holkūö tö yāich tö nyā-akūö re.
10Ahōnyö ngam tö mināich, ngaich kiröönngöre min ngam linā-alkūö, ṙātöre min inrē linā-alkūö ötlinëkô inrē.
11Ngòh töhāngenlōn tö töhet ellōn, öp tö vāyö ṙô inrē nö ṙô-òv, hol ngam rācha min anga-aṅ.
12Aṅtö mikah nun minë mat ngam Mā Tēv, kavalngö nup ṙô tötkô-en pöri anga-aṅ.
13Ngö ṙô an ngam töṙāhata, Lāyön ap amuh el kahôyö? Kapah chin min el talöökö!
14Anūlö tö aṙū öp elvāng ngòh tö tayōla kikānö; fuk ël e min anga-aṅ öp chūök tanānyö ngam Mā Tēv.
15Nyëklöre ap kumlō-ov nö ellōn ngòh nyīö, ahōnyen e pöri nö ṙā-ang in ò ngam fanòh inköp mikah.
16Ngòh tamṙam yāich nö ṙūölö kanôlò re, hēk kē-ĕti nö i tökôlò yih min nö im hanāten.
Tö lūöi anāi ṙô Mikah
17Asītö elnang re, hang ṙô tö akaha inrē, kētö ellōn re inrē im mikah chu;
18Tön kumchikṙen an min yē meh haköpö u ellōn re, yē u nö ṙòkhöre nö lēn nö i minuh meh.
19Hòṅ ngam inyönglen meh nö im Mā Tēv, mikahtölōn meh chin ngaich tö u töngamuh, in meh takô.
20Öl öich ngaich kūichtö nup tö lūöi anāi ṙô inlēnö mikah inrē,
21Inmeukhömat meh tö töchip tökô-en inrē, hòṅ meh kētö tökô-en inrē, hòṅ meh kētö tökô-en sanap ṙô in cha yip tamīnngen meh?
22Un ulāingen yāich, tön yāich ana, hēk kirāchtö kui tökihngen i kūö inkūp;
23Pò ngam Mā Tēv min nö vë-elkui cha ngaich öt hakôlò nômö cha, yip töt mahakôlò cha.
24Un hanôl ngòh tötainy tarik, unrēhĕn kiröönngöre holröön tö līn tarik,
25Hòṅ meh öt haköp nup talöökö ò ngaich vönngö me-eṅ el tinngöp.
26Uh man in cha yip kamëtö kinlēḵngô, yip ṙënngô nö i hötṙeh.
27Yē meh öt aṅhav-in tö kahëtöre, kūöyòh öng ngam chamam meh nö kē-ĕyö nö el katòh meh?
28Un kē-ĕyö öp hötṙeh minkahngökūö panam ök tī yik yöng yīö.
29Meuk tarik öm tö milichngen tī nö i vahīṙen? I kūö rācha ap min nö sökhaka; Öthō ap min nö sökhaka nö i kūö tönyatngö tarik.
Currently Selected:
INCHŌḴ-OṘÔ 22: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
