INCHŌḴ-OṘÔ 23
23
1Yē meh ūichngöre nyā holkūö mahayöng, ṙēmen ngëichngöre töp i kūö meh,
2Ṙatnyö likeun re man aṅtī tö surītö yē meh tarik töpōivat nyā-avkūö.
3Um kuilōnuvö tö nup tö kuchik in ò, tön nyā-aṅkūö nup nö inchīlö.
4Um harëtnyö elmat re öm hòṅ teūngen tö kanôlò; akaha sòk lākö e.
5Yē meh ngëichkö e, ngāichen angū-ö; pò e nöng lūk nöng kitūöngöre, sā matēṙö nö kiteū kū-ö tö el halīöngö.
6Un nyā nyā-aṅkūö tarik tö milip; un kuilōn tö tökuchik in ò;
7Tön sā öp tö hĕng tak an kamhuk nö ellōn re. Nyā man ka-eūt inrē! Ngö ṙô anga-aṅ tö meh; öt in meh pöri öp ellōn ò.
8Kuvavlö nup nyahātöre man min nyā-aṅkūö; mëichngö tölöök ṙô re inrē.
9Un hāngö ṙô ṙô-òv tö tökulō-ov, tön mināich an min tö mikah nup ṙô meh.
10Un kē-ĕyö öp hötṙeh minkahngökūö panam hēk un yôkhöt el taṙeū kūönyōich;
11Tön tökalēḵ ap Ṙamānyen cha; lā-al meh ap min nö vë-elkui cha.
12Kētö ellōn re i inköphöti elnang meh inrē i ṙô mikah.
13Um ma-īṅtīre tö inköptö chöngö i nyīö; öthō ap min nö kapah, yē meh fōhan tö chōn.
14Yē meh fōhan tö chōn hayööken nômö ò min me-eṅ ṙā-ang el Anūlö.
15Kūön chu, yē öp ellōn meh nö akaha, ṙāmölōn min inrē öp ellōn chu.
16Ṙāmölōn min ngih nômö chu yē minë minuh meh nö chīpö ṙô nö ṙô-òv.
17Um kunyāha ellōn i tököölö fālen, i ṙūöhen pöri i pinhë-eṅkūö töm Mā Tēv i rô-òtö sakāmö.
18Öthō nö öt mū-unôchu umuh, öt rökiṙen ap min inrē maheūṅkkö meh.
19Kūön chu, hang; hôm akaha, hachōkūö ellōn re inrē el ngam talöökö.
20Un hol kam-eūt, hēk un i tö pōivat nyamā-avkūö;
21Pò mihiyōi-aṅ tö pōivat inrē min nö yih im öt kanôlò, höng takācha inyut ön min ngòh tarik inrē tö tī ngam inṙòhlö.
22Hang ṙô ngam yöng re kikōnyö ngam mahakūönten meh, un öt chumkūöṙen inrē töm yöng meh kikānö yē ò nö köiny.
23Havah tökô-en, un inyīhiyö inrē; havah mikah, mikah elmat, inköphöti inrē.
24Pōyen ṙanāmölōn ön min ngòh yöng tölöök; ngòh mahakūöntö tö-akaha nyīö kikōnyö ṙāmölōn min nö in ò.
25Hökngen ngam kikōnyö yöng, kikānö yöng inrē nö ṙāmölōn, hökngen ò, ngam kamyônyen meh nö ṙāmölōn.
26Kūön chu, kēḵ töp ellōn re in chu, hökngen minë mat meh inrē nö ngëichngö në talöökö chu.
27Tö aṙū-uti anūlö ön ngòh mi-inyihköre kikānö; tö kamlah kanihngen.
28Sā mū-ulāya an nö hulalhaka nö höng ṙūölö ṙôngö tötkô-en inrē nö i tarik.
29Chīö tö īnu tö öt inkôlò? Chīap tö īnu tö miṙīvlōn? Chiap tö vahënyu? Chīap tö nyahavö nö tö turëṙö elmat?
30Cha-a yip tö marô-òten nö i vāin, cha-a yip kumröönngöre nö katĕh vāin.
31Un hatīönka ngam vāin yĕn turë, yē e nö pök el kōp chaleūkköti inrē nö lā taṙeū.
32Unôichngöre angū-ö sā pēch nö kap chökhukūö inrē nö sā pēch.
33Parīönya elmat min me-eṅ ngaich, ṙô tö töchōich min ap ellōn meh inrē.
34Ngaich me-eṅ min sā muhulalhak ellōn ngam mai, sā öp muhulalhaka nö el kui kanāmö.
35Fōho chu yin, ṙô meh min hö-ö pöri chu-ö chök; fōho chu yin, öt akahaiṙen pöri chū-ö tö e, Ĕhē öich min aṅhen? Hòṅ chu chöh tahëng ka-eūtre.
Currently Selected:
INCHŌḴ-OṘÔ 23: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
