INLAHEN 11

Vë-eny Nang Ngam Māṅ I Yeruselem Ang Pītör

1Ngaich yik tanīnöṙô, tö yik hol cha inrē aṅ Yūtā, nö hang yik Tahëng mihëṅṙö nö hōḵo ṙô ngam Tēv. 2Hē Pītör pöri nö yih nö i Yerūsalem, ngaich yik tö tunyīnyi nö lā-alkūö ò nö ngö ṙô, 3Yih man i tarik töt tunyīnyi; nyā-aṅvkūö inrē, öm in cha. 4Kētöre Pītör nö halöknyörit ṙôre nö ve-eny nang cha; nö ngö ṙô,

5Vame-eṅkūötēv chin ip panam Yòppa. Ngaich meuk chū-ö i heūvö, öp tö hĕng yamônti, nö sā tö pōitak intĕh, töhôtu nö ṙā-ang el halīöngö i nup töfën nang e; ngaich löö in chu angū-ö. 6Ngaich haköpmatre chū-ö öich ngëicha; ngaich meuk nup töṙeūla chehen, nup chehechōn inrē lamātulöng. 7Ngaich hang ök ṙô chu-ö, tö ngö ṙô tö chu, Pītör; choholre man; fël nya-aṅkūö re. 8Ngö ṙô pöri chu-ö, Hö-ö; Mā öt hĕng heuh chin nya-aṅvkūö tö töhuich. 9Ngaich ök ṙô im innët heuh, nö löktö el halīöngö, nö ngö, Nup tölöök tö tī ngam Tēv, un töhuich tö ṙô meh. 10Lūöi heuh angū-ö; ngaich keuheūtlöre anū-ö hēk nö tūöklöngö nö el halīöngö. 11Hē e, lūöi tak tarik samökhaka nö i kūö ök patī, chūök ih, tö tīntuvö nö in chu, nö ṙā-ang Kaisarī. 12Ngaich ngam Töhet Fanöinylö nö hōten chu kiröönngöre in cha; sōtu öich sahōḵovö Ngaich tafūöl tak vē nö holröön chu inrē. Yòhlö īhö ngaich el pati ap tarik. 13Ngaich anga-aṅ nö ve-eny nang ih töre nö meuk ök ma-ahanga nö sökhaka nö el patī ò, ngaich ngö ṙô, Tīngö chamuh Yòppa, nö kē-ĕrkūö Sīmōn, öp tö Pītör invëka. 14Anga-aṅ ap vame-eny nang meh min tö nup ṙô, nup löklen meh min hayöökaṙen, me-eṅ, ṙòkhöre inrē yip aṅ patī meh. 15Ṙònghöichṙô chū-ö ngaich teungtöre ngam Töhet Fanöinylö nö i kui cha, sā Ò nö i kui hī ik raneh. 16Ngaich fēḵĕlre chū-ö tö ṙô ngam Mā, nö ngö ṙô, Kô ap Yôhan nö vōk nö aṅtī tö mak; vōkö pöri min yī-ö tö ngam Töhet Fanöinylö. 17Yē ngam Tēv nö kē-ĕkūö cha tö ngam inlōnti, nö sā tīre nö in hī, hē ranehten hī ṙātö ellōnre im Mā Yēsū Kristū; achīö öich chū-ö tö kô tahngö ngam Tēv?

18Ngaich hē cha nö hāngö u, ṙangôre cha-a nö ngö ṙô, Ngaich Ang chĕi ngam Tēv nö kē-ĕkūö vē Tahëng mihëṅṙö tö invöötö ellōm im nômö.

Ngam Māṅ Entiòk

19Ngaich yik töparāti hēngen tö ötinkôlò Satēpān, nö kiröönngöre nö tölngö Pòinikē. Saiprös, Anti-òk inrē; öt inrēngörevö chūök ṙô cha-a tö ngam ṙô, höng i yik Yahūti. 20Rēvre pöri yik umuh tö cha tarik, aṅ Saiprös, Kurēnī inrē, mikahten yik tahëng mihëṅṙö cha-a; hē cha nö yih nö i Anti-òk, ahangken cha tö ngam Mā Yēsū. 21In cha ngam Mā, ngaich maṙôngö yik ṙamātö ellōnre nö havöötökūöre nö im Mā Tēv.

22Ngaich hāngö ngam inlahen cha tök māṅ mī-i Yerūsalem; ngaich tīnngen Parnöpas cha-a, nö tölngö Antī-òk. 23Chalôhë anga-aṅ, ngaich meuk ngam inlōnti aṅ im Tēv, ngaich ṙāmölōn; ngaich ṙuhöl alaha cha anga-aṅ nö ṙòkhöre; pòn hōtu cha-a nö haköpngöre nö im Mā, holtö ellōnre. 24Pò ò nö tölöök nö tarik; tö īnu tö ngam Töhet Fanöinylö, mikah inrē.

25Ngaich maṙôngö yik tarik töṙūötuṙen nö im Mā Tēv. Ngaich chuh Tārsös anga-aṅ nö chöhö Sôl, 26Ngaich hē ò nö kôtökūö tö ò, ngaich kēten ò nö i Anti-òk. Ngaich hĕng samyeūheu cha-a nö hamūlöre tök māṅ; ngaich pōyen haköpti tö tarik. Ngaich i Anti-òk yik mahaköp nö urĕh nö Kristīön invëka.

27Ik hē e, yik pròfĕt nö yihtöre nö i Anti-òk, nö ṙā-ang Yerūsalem. 28Ngaich hĕng tak tö cha, Akapös minënyö ök; ngaich hameukhöti, nö lökten im Töhet Fanöinylö, tök yöng inyāichö tökeuheūtngöre chūök nö im panam. Ök yamih hē Klòtīös, Kaisöör. 29Ngaich yik mahaköp, nö kö i kanô-òṅre, nö hòṅ tīnngö mineūken yik holre mī-iyöng Yūtā. 30Ngaich teūngen cha-a, söömngö u ngaich nö i yik mā, nö eltī nā Parnapas, nāṅ Sôl.

Currently Selected:

INLAHEN 11: CANIBSI

Highlight

Copy