INLAHEN 12
12
Kalēḵlöre Röön Ngam lnkihten
1Hē e, ök rācha Heròt nö öthakôlò yik rēvre aṅ ngam māṅ. 2Fëlngen Yāköp ngaich anga-aṅ, ök mëm Yôhan, nö aṅtī tö sanët. 3Ngaich hē ò nö meuk yik Yahūti nö ṙāmölōn tö e, ngaich ṙūötenre anga-aṅ nö kē-ĕ Pītör inrē. Hē sakāmö ök Töt aföhlöng Ròtī. 4Ngaich hē ò nö kēḵ an, kalonghöt ò ngaich anga-aṅ nö el kinlōngö; ngaich kēten ò nö fëntak amahti tö tösökhaka. 5Hòn keuheūtngen ngam Paska, anga-aṅ nö kēḵnyen ò nö i yik tarik. Lökten Pītör nöngngöh nö el kinlōngö, ve-elkui ò pöri yik aṅ ngam māṅ, nö im Tēv, nö i tölngöre.
Ṙānyuvö Ang Pītör Nö El-inkövö
6Ngaich hē Heròt nö hòṅ kēḵnyen ò; im hatööm ang Pītör nö haṙòh nö lā ṙat nak tösökhaka, nö nëtö inlök; ngaich aṅtö kūö inkūp ök kinlōngö nak tahëng. 7Ngaich nönglūk ök hĕng tak ma-ahānga aṅ im Tēv, nö sökhaka nö ranghen ò; yāngö ël ök chūök inrē. Ngaich fohkö ṙòngkafīöt Pītör anga-aṅ; ngaich kilanglen ò, nö ngö ṙô; Choholre ka-eūyen. Ngaich sukngöre nuk inlök, nö ṙā-ang kël ò. 8Ngaich ngö ṙô ngam ma-ahānga tö ò, Hamöplöṙatre man; nyëkngö minë kunröpöre inrē. Ngaich ngatī anga-aṅ. Ngaich ngö ṙô anga-aṅ tö ò, Kahumlöre man töm hilā; ngaich tömrit chu. 9Kunyī-inyre anga-aṅ ngaich nö tömrit ò; öt akahalōn tö e nö tökô-en, ngam tī ngam ma-ahānga; höng heūv pöri angā-aṅ tö lōnre. 10Ngaich hē cha nö chööḵngö ngam raneh amahaṅti, ngam innëtö inrē; yihtöre cha-a ngaich nö ik vët inkūp, öt tö kū-ötö panam, ök töng kamahngenre nö löpnyökūö cha. Kunyī-inyre cha-a ngaich; ngaich hēngö chahöḵöng tö talöökö. Ilööṙen ngaich ngam ma-ahānga nö ṙāngen ò.
11Ngaich hē Pītör nö akahaiṙen; ngaich ngö ṙô anga-aṅ, Möl chin akahalōn takô, tö ngam Mā Tēv nö tīntö ma-ahāngare, nö ṙānyen chu, ṙā-ang eltī Heròt i maheūṅkkö yip taṙòkhöre tarik Yahūti inrē.
12Ngaich hē ò nö akahaiṙen, yihtöre ngaich anga-aṅ nö i patī Mariā, ök yöng Yôhan, ök tö Mākös ngö invëka; i chūök yik tömaṙôngö mahamūlöre nö ve-ekūötēv. 13Ngaich hē ò nö kuröngkökūö inkūp nö ik lökhöt; ngaich hĕng tak ök mahalanṙen kikānö yamihtöre nö hang ṙô tī ò. Rōtā ök mine-eny ò. 14Ngaich hē ò nö akaha elnang tö ṙô Pītör, ngaich öt löpnyökūö ök inkūp anga-aṅ, tökūö ṙanāmölōnre; falhötre pöri, ngaich vënyen Pītör nö sökhaka nö i kūö inkūp. 15Ngaich ngö ṙô cha-a tö ò Kulō-ov man. Iṙuhöṙô pöri anga-aṅ tö ò nö kô; ngö ṙô ngaich cha-a, Lohten ap nö ma-alaha ò.
16Iṙuhötī pöri Pītör nö kurönga. Ngaich hē cha nö löpnyökūö ò, ngaich meūkan cha-a; ngaich uṙeh alaha. 17Aṅtī tö eltīre pöri anga-aṅ nö tahngö ṙô cha; ve-eny nang cha ngaich tö tī ngam Tēv nö kēḵnyen ò nö ṙā-ang el kinlōngö. Ngaich ngö ṙô anga-aṅ tö cha, Ve-eny nang Yāköp tö u, yip hol hī inrē. Kiröönngöre ngaich anga-aṅ, nö chuh tahëng panam.
18Peuheū-eulre ngam peuheū, ngaich ök yöng tinṙōlen i yik kumyung, tökūö öt mikahlōn cha tö inlahen Pītör. 19Ngaich hē Heròt nö chöhan, ngaich öt kôtökūö tö ò; ngaich kahòkken yik amahaṅti anga-aṅ, ngaich hōten cha nö kumpaha. Ngaich anga-aṅ nö chuh Kaisarī, nö ṙā-ang Yūtā; ngaich iyöng in e.
Kinpāha Heròt
20Ngaich anga-aṅ nö pōyen kumnyahlōn nö i yik aṅ Tūrös, Sītōn inrē. Ngaich ṙòkhöre cha-a nö yihtöre nö in ò, nö holten Plāstör, ök yōm urôhò ök rācha; ngaich havëkö inlāmö cha-a; pò ap panam cha nöng aṅ i panam ök rācha nya-aṅkūö.
21Ngaich ik hē sakāmö ang Heròt nö hayutlöre tö inyutre nö rācha; ūichlöre ngaich nö el kantēra, ngaich ve-ekūö yik tömaṙôngö. 22Ngaich yik tömaṙôngö nö hūḵa, nö ngö ṙô, Ṙô tēv an; öt ṙô tarik. 23Iṙūö fëlan ngaich ök ma-ahānga ngam Mā Tēv; kāḵayö ngaich anga-aṅ tö kamlökö; ngaich kapah. 24Sīöplöre pöri ngam ṙô ngam Mā Tēv; ngaich ṙūölöre ṙôken yik tarik.
25Ngaich nāṅ Parnöpas, nāṅ Sôl nö havantöre, nö ṙā-ang i Yerūsalem, tö kinheūṅtenre tök la-enre; ngô-òṅ Yôhan cha-a nö holre, ök tö Mākös ngö invëka.
Currently Selected:
INLAHEN 12: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
