INLAHEN 13

Katöllöngö Pārnāpās Nāṅ Sôl, Ngaich Tīnīyö

1Pròfĕt yik umuh, mahaköphöti inrē, ik māṅ i Anti-òk, hēḵ Parnapas Sumōn ök tö Nikēr invëka, Lukīös ök aṅ Kurēnī, Mana-ēn inrē ök hol inruklö ök kun rācha Heròt, Sôl inrē. 2Ngaich hē cha nö ve-ekūötēv, ahik inrē; ngaich ngö ṙô ngam Töhet Fanöinylö, haköhngen nāṅ Parnapas, nāṅ Sôl, nö ip la-en invëkö cha tö Chu. 3Keuheuthëṙen cha-a nö ahik, ve-ekūötēv inrē; ṙēptö tīre ngaich nö i kui cha, ngaich tīnngen cha.

I Kūprös

4Tīni cha-a tö ngam Töhet Fanöinylö, ngaich chuh Seleuki; ngaich ṙā-ang umuh cha-a nö hatēhĕngre nö chuh Saiprös (kuprös). 5Ngaich hē cha nö i Salamis, ngaich ahangkö ngam ṙô ngam Tēv cha-a, nö el chūök vine-eṅkūötēv yik Yahūti. In cha inrē ang Yôhan nö hamòlṙen.

6Ngaich hē cha nö keuheūt nö chuh i nup panam; yihtöre cha-a ngaich nö i Pafòs. Ngaich hĕng tak ök kanôtökūö cha, tömilūönö, samūöichköre nö pròfĕt, Yahūti ökuh; Paryēsū minënyö. 7Ök mi-ik mahayöng; Sĕrkīös Pôlös, ök tö-akaha nö tarik. Havëten nā Parnapas, nāṅ Sôl, anga-aṅ nö in ò; ngaich hòṅ hang ṙô ngam Tēv. 8Ngaich pöri Ēlimas ök tömilūönö, (pòn töngatī manah ngam mine-eny ò) nö tahngen cha; hòṅ havööngökūö ök mahayöng, nö ṙā-ang im mikah. 9Ngaich pöri ang Sôl, ök tö Pôl ngö invëka inrē, nö īnu tö ngam Töhet Fanöinylö, ngaich haköpmatre nö in ò; ngaich ngö ṙô, 10Ō me-eṅ tö īnu tö nup taṙòkhöre inchīlö, huneū-en inrē; me-eṅ kūön ngam sī-ö; tökunyahaṅ el mat tö nup taṙòkhöre tölöök; öt hòṅ ṙāngenre ömeh öm havööngökūö tarik nö ṙā-ang im tö chip talöökö ngam Mā Tēv? 11Yĕh meuk man; i kui meh an ngam eltī ngam Mā Tēv; ngaich öt meuk ngam tavūöi me-eṅ min, rĕh rô-angen. Ngaich iṙūö suktöre kui anga-aṅ, tö pinṙeūmö, sinngūlö inrē; ngaich ṙēpkö holre anga-aṅ nö hòṅ sarōkö kël. 12Ngaich hē ök mahayöng nö meūkö e, ṙātö ellōnre ngaich anga-aṅ; pòn pingangkūö tö ngam inköphöti aṅ im Mā Tēv.

I Antīòk I Pīsitī

13Ngaich Pôl tö nak hol ò inrē, nö hatēhĕngre nö ṙā-ang Pafòs; ngaich yih nö i Pörka, i Pampuli. Ṙāngen cha ngaich Yôhan, ngaich havantöre nö i Yerūsalem. 14Iṙūöhöröön cha-a nö ṙā-ang Pörka, ngaich yih nö i Anti-òk, i Pisitī. Ngaich chuh el chūök vine-eṅkūötēv cha-a, hē el töhet sakāmö, ngaich Ūichngöre. 15Keuheūt hë vine-eṅkūö ngam chöngö, nup līpöre yik pròfĕt inrē; ngaich ngö ṙô yik mākūö chūök vine-eṅkūötēv, Kahōlö; yē nāṅ ṙahônyu tö ṙinuöhöl alaha vē tarik, yĕh ṙô-òv nan. 16Söklöre ngaich ang Pôl; ngaich hachônglö këlre anga-aṅ, nö ngö ṙô, Yī-ö tarik aṅ Israĕl; yī-ö inrē tö pa-ekūö tö ngam Tēv; hangihtöre. 17Katöllö yik muvöhngö hī An ngam Tēv vē tarik Israĕl; ngaich hapōilö yik tarik, hē cha nö iyöng ip panam tahëng, Aikup; aṅtī tö minhôiṅyöre Anga-aṅ nö kēḵnyen cha, nö ṙā-ang in e, 18Fën anāi samyeūheu Anga-aṅ nö haruklen cha nö elinchōn. 19Keuheūthë tī Anga-aṅ nö öthakôlò nuk tö sat pumnāmö panam i Kanā-an; ngaich kētö ngam panam cha nö amin Israĕl, fënòng taneui anāi samyeūheu rô-òten. 20Unôichngöre Anga-aṅ nö kē-ĕkūö cha tö kamhôṅka, Samuĕl ök manā-aṅ, ök pròfĕt. 21Hēk unôich cha-a nö havëkö rācha, ngaich kē-ĕkūö cha ngam Tēv tö Sôl, ök kūön Kis, ök lamökngörit Penyamin, fën anāi samyeūheu. 22Ngaich hē Ò nö kēḵngen ò, ha-ūichlen Tāvit ngaich Anga-aṅ, nö rāchakūö cha; ök aheūkö Ò, nö ngö ṙô, I ngòh kūön Yēsī chin kôtökūö tö Tāvit nö tarik tö sā lōn Chu, ngòh tö la-evṙen min tö nup lōn Chu. 23Lökngörit ò, tī ngam Tēv, nö a sā ngam kinlēḵngô, nö kē-ĕkūö Israĕl tö Mahayööken, Ang Yēsū. 24Urēhĕkūö yanihih Ò, ang Yôhan nö ahangkö ngam vinôkö invöötö ellōn, i yip taṙòkhöre tarik aṅ Israĕl. 25Hē Yôhan nö ngaich nö hòṅ keuheūten tök la-enre; ngaich ngö ṙô anga-aṅ Achīö öich chu-ö, tö lōn yīö? Rö-ö chin chū-ö Anga-aṅ. Yĕh meuk, hĕng taka ap yamih nö unôich tö chu; öt kô chin rēhĕn luhnyökūö rehen kunröpö Ò.

26Kahōlö, yī-ö kūön Aprahām, yip mī-in yīö inrē tö pa-ekūö tö ngam Tēv; in hī an ngam ṙô inyööken nö tīntu. 27Pò cha yip mi-inyöng i Yerūsalem, yip yöngṙen cha inrē, kūö cha nö öt akahalōn tö Ò, öt rēhĕn tö nup ṙô yik pròfĕt, nö tö örheūheu nö ve-evkūö hē el töhet sakāmö; hateungngö u cha-a ngaich, nö öthakôlò Ò. 28Ngaich pòrô cha-a nö öt kôtökūö tö lökngen kinpaha Ò; ngaich ve-ekūö Pailĕt cha-a, nö hōtö finëlngö Ò. 29Ngaich hē cha, nö keuheūten tö nuk taṙòkhöre tökūichi inlahen Ò; kēḵ an cha-a ngaich nö ṙā-ang rōi ök chōn; ngaich ṙāten Ò nö el anūlö. 30Ngaich hachohlen Ò pöri ngam Tēv. 31Ngaich ṙōl sumkam Anga-aṅ nö meūkö tö cha, yip yamih nö hol Ò nö i Yerūsalem, nö ṙā-ang Kelelī; yip ameūken Ò töngamuh nö i vē tarik. 32Ngaich ahangken yīö īhö, tö ngam tölöök inhānga, kinlēḵngô nö i yik muvöhngö hī. 33Tö tī ngam Tēv nö hateungngö e, in hī ayī-ö kūön cha, i tī Ò nö hachohlen Yēsū; sā kinūichngö e inrē nö im innëtö Salmai, nö ngö Me-eṅ Man Kūön Chu; i ngih sakāmö Man Öm lökngörit Chu. 34I ngam tī Ò nö hachohlen Ò, nö ṙā-ang i yip tökapah, öt hēk nö kapah tö ngamuhöten, sā ṙô Ò nö ngö ṙô, Kē-ĕkūö Meh Chin min tö ngam töhet, tököp inrē, kinlēḵngô in Tāvit. 35Ngatī inrē angū-ö nö i mat öp tahëng Salmai, nö ngö, Öt halöngten ngam Töhetre Man min nö meuk chinhūngö. 36Pò Tāvit nö ngaich nö kapah, ngaich holtöṙah yik muvöhngöre, ngaich chahū-uyö; tö kinheūṅten ò nö lök la-en ngam Tēv, ik hē ò. 37Öt chahu-uyö pöri Anga-aṅ, ngam hachohlö ngam Tēv. 38Lökten yin yēḵ akahalōn, kahōlö, tö e, nö lökten i ngòh Tarik nö ahangka nö in yīö, ngam inṙē-ĕl tökööl. 39Ṙòkhöre yip ṙamātö ellōnre, nö lökten in Ò, nö halööklöngö i nup tökeuheūttöre, nup tötkô nö halööklöng nö in yīö nö lökten im chöngö Môsös. 40Haṙēmngenre yin lökten, hòṅ ngih nö öt teunghökui yīö, ngih ṙô yip pròfĕt, tö ngö. 41Yĕh meuk yin, yī-ö tömiyëḵ; pingangkūö, ngaichngen inrē pò Chu Öich la-evṙen i në sakāmö yīö tö ngam la-en chūök yīö rö-ö ṙātö ellōnre, pòrô angū-ö nö vënyu nö in yīö töp tö hĕng tak. 42Ngaich hē cha nö kunyī-inyre, ngaich yik tarik nö ve-ekūö cha, nö hōten cha nö hēk nö mumkahten cha ip tahëng töhet sakāmö. 43Hē pinyāingö yik tö mūl tarik, maṙôngö yik Yahūti yik tö-akaha tö vītuṙen nö Yahūti inrē, nö tömrit nā Pôl, nāṅ Parnapas, nak vame-eṅkūö cha, hōten cha nöngngöh nö im inlōnti aṅ im Tēv.

44Ngaich im unôich töhet sakāmö, öhten nö hĕng pumnāmö yik tarik nö hamūlöre, nö hòṅ hang ṙô ngam Tēv. 45Hē yik Yahūti pöri nö meuk yik tömaṙôngö; ngaich cha-a nö īnu tö kumnyahlōnre; ngaich ahôngö ṙô Pôl, ötlēkôre inrē. 46Ngaich hēk nā Pôl, nāṅ Parnöpas, nö hakôḵnyôre, nö ngö ṙô, Tö hòṅ urĕh an ngam ṙô ngam Tēv nö vënyu nö in yīö. Ngaich pöri yī-ö sōḵo e, ngaich an havöötökūöre i vē tahëng mihëṅṙö tarik. 47Pòn angū-ö chöngö ngam Mā Tēv tö ai; nö ngö ṙô, Vīten Meh Chin, Öm ëāṅvö mat vē tahëng mihëṅṙö; hòṅ Meh Öm inyööken söl ip manā-angkūö ngih panam. 48Ngaich hē yik tahëng mihëṅṙö tarik nö hāngö e, ṙāmölōn cha-a ngaich; ngaich ha-öiny ngam Mā Tēv. Ngaich yik tö hōtu nö im nômö tö örheuheū-aṅ, nö ṙātö ellōnre.

49Ngaich ngam ṙô ngam Tēv nö pōiti pinrātngö nö im panam. 50Ngaich pöri yik Yahūti nö harunlö alaha yik tökôlò kikānö tö pa-ekūö tö ngam Tēv, yik mākūö panam inrē ngaich chöngu tö ötinkôlò nā Pôl, nāṅ Parnapas; ngaich ahōngen cha nö ṙā-ang ip panam cha. 51Pitōngngö pitung röönre pöri cha-a; ngaich yihtöre nö i Ikôniöm. 52Ngaich yik mahaköp nö ṙāmölōn, īnu inrē tö ngam Töhet Fanöinylö.

Currently Selected:

INLAHEN 13: CANIBSI

Highlight

Copy