INLAHEN 10

Pītör Nāṅ Kôrnëliös

1Hĕng taka ök umuh tarik i Kaisarī, Kòrnēli ök mine-eny ò; yönṙen yik tö hēngòng Kumnyung aṅ Italī invëka, tö-akaha ök nö tarik, tö pa-ekūö inrē tö ngam Tēv, nö holtö yik aṅ patīre nö ṙòkhöre. 2Tö pōyen tī ök nö alōntö tarik ve-ekūötēv inrē nö örheūheu. 3Hĕng taka ök ma-ahānga aṅ im Tēv tölöökö mineūkö tö ò, nö yihtöre nö in ò, ik tö lūöi köṅny ṙô tö harap; ngaich ngö ṙô tö ò, Kòrnēli.

4Ngaich haköpmatre anga-aṅ nö ngëichken ò; ngaich ngö ṙô, tö pinhe-eṅkūöre, Mā! Asuāpa? Ngaich ngö ṙô anga-aṅ tö ò, Söllö nup ṙô meh ve-ekūötēv, nup tī meh inrē inlōnti, nö inköpkölōn nö i kūö ngam Tēv. 5Tīnngö tarik man ngaich i Yòppa; kē-ĕrkūö Sīmōn, öp tö Pītör invëka. 6Iyöng in Simōn ap, ap yōm uk, ap töpatī-ivö tap i kūö mai. Anga-aṅ ap min vame-eny nang meh tö la-en meh. 7Ngaich hē chanūhu ök ma-ahānga vame-eṅkūö ò; nët tak havë-eti ngaich anga-aṅ tö nak mahalanṙen aṅ patī ò, hĕng tak ök kumyung, töpa-ekūö tö ngam Tēv, aṅ i yik töngngöh nö in ò. 8Keuheūthöṙô anga-aṅ nö ve-eny nang cha, ngaich tīnngen cha nö i Yòppa.

9Ngaich im huṙöich, hē cha nö ṙòngmö el talöökö, ngaich röhta nö ip panam; yòhlö Pītör nö i kui patī, nö ve-ekūötēv, im tö nët sīön köṅny ṙô. 10Ngaich kapahare anga-aṅ, nö hòṅ nyā. Ṙònghöichṙen pöri yik vamī nya-aṅkūö, ngaich heūv anga-aṅ. 11Meuk ngam halīöngö anga-aṅ nö löpnyörekūö; ngaich hĕng ök yamônti tö sā töpōi tāk intĕh, i nuk tö fën nangre hinôti angū-ö nö el tumlat. 12Ök tö-aṅhaṅvmat tö nup tökeuheūttöre mihëṅṙö töfënö kalröön, töṙeūla chehen aṅ ngih panam, nup chehechōn lamātulöng inrē. 13Ngaich ngö ṙô tö ò, Choholre Pītör; fël nya-aṅkūöre. Ngö ṙô pöri ang Pītör,

14Hö-ö; Mā; öt hĕng heuh chin nya-aṅvkūö tö töhuich. 15Ngaich hēk ök ṙô, nö ngö, im innët heuh, Në tölöök tö tī ngam Tēv, un töhuich, tö ṙô meh, 16Lūöi heuh angū-ö nö ngatī; ngaich nönglūk ök intĕh nö kēḵlöngö nö el halīöngö. 17Ngaich hē Pītör nö ṙòngmö öt akahalōn tö manah ngam heūvö re, ngaich yik tarik tahīntö Kòrnēli, nö sökhaka nö i kūö inkūp, tö kinheūṅtenre nö hatön chūök patī Sīmōn; 18Ngaich hūḵa cha-a nö hatön, yē Sīmōn ök tö Pītör invëka, nö iyöng umuh.

19Ṙòngmö afēḵngen ök heūvöre Pītör, ngaich ngö ṙô ngam Töhet Fanöinylö tö ò, Meuk yip tarik lūöi tak chamöhö meh. 20Choholre man; yòhngö. Kiröönngöre in cha; um piyū-en, tön tanīntö Chu yip. 21Yòhngö ngaich Pītör nö i yik tarik; ngaich ngö ṙô, Chū-ö chin chahöh yīö. Asuh ap chööḵnyö yīö yih?

22Ngaich ngö ṙô cha-a hĕng taka ap yöngṙen töhēngòng kumyung, ang Kòrnëli, talöök ap nö tarik tö pa-ekūö inrē tö ngam Tēv, tö eūnyu inrē tö vē Yahūti; ve-evkūö ap tö ngam Tēv, nö lökten ik töhet ma-ahānga, nö hōtu nö tīnngö mahavëten meh i patī ò; hōtu inrē nö hang nup ṙô meh. Havëhötnen cha ngaich anga-aṅ, ngaich hachūöklen cha. 23Ngaich im huṙöich anga-aṅ nö kiröönngöre nö in cha; rēvre yik Kristīön aṅ Yòppa hamòl ò. 24Ngaich im huṙöich cha-a nö sölta nö i Kaisarī. Höng hökken cha Kòrnēli; ngaich nö havëtö yik mak alahare nö ṙòkhöre, yik milālö hol ò inrē. 25Ngaich hē kunhēthöt Pītör, höngkūö ò ngaich Kòrnēli; ngaich afukngöre nö i röön ò, nö salāman. 26Hachohlen ò pöri Pītör, nö ngö ṙô, Choholre man; tarik chin chū-ö inrē, öich sā meh. 27Kuhēthötre anga-aṅ, nöng vanëḵngöre tö kūö ò; ngaich kôtökūö tö yik tömaṙôngö nö hamūlöre. 28Ngaich ngö ṙô anga-aṅ tö cha, Akahalōn yin tö vē Yahūti nö tökööl nö hamūltöre nö i tahëng mihëṅṙö tarik; kööl inrē nö yihken cha. Hameukhumat pöri chū-ö tö ngam Tēv, öich sōtu töhuich ngö, tö tarik. 29Lökten chin yih, öich öt sahōḵngu, hē linukkö chu.

30Lökten chin hatönö yīö töp lökten linukkö chu tö yīö. Ngaich ngö ṙô ang Kòrnēli, Fën hang sumkang ngaich, töng töngamuh, öich ve-ekūötēv i patīre, i tö lūöi köṅnyṙô. Ngaich hĕng tak ök tarik samökhak nö i kūö chu, tö ayānga mat inyut. Ök tö ngö ṙô, 31Kòrnēli; hāngö nup ṙô meh ve-ekūö Tēv; söllö inrē nup inlōnti tī meh, nö inköpkölōn nö i kūö ngam Tēv. 32Lökten man tīnngö chamuh Yòppa, nö havëten Sīmōn nö in meh, ap tö Pītör invëka; i yöng patī Sīmōn ap, ap yōm uk, nö i kūö mai; anga-aṅ ap min vame-eny nang meh. 33Ngaich ilööṙen chū-ö tīnngö lamukken meh; ngaich me-eṅ löök öm yih. Ṙòkhöre in īhö ngaich ihih, i kūö ngam Tēv; öi hòṅ hang nup taṙòkhöre tinöölô meh tö ngam Mā Tēv.

Aheūkö Pītör

34Ngaich Pītör nö kaknyöre nö ngö ṙô, Akahalōn takô chin ngaich tö ngam Tēv nö töt atöltuṙen tö tarik; 35I tum mihëṅṙö vē tarik pöri, ngòh töpa-ekūö tö Ò, töla-evṙen inrē tö tölöök anga-aṅ tö hōḵov tö Ò. 36Ngam ṙô tahīntö Ò i yip kūön Israĕl, minkahten tölöök inhangkö kumchiḵṙen, lökten in Yēsū Kristū; (Anga-aṅ An Mā taṙòkhöre;) 37Akahalōn yin yī-ö tö e angū-ö ṙô, ngam tö keuheūtngöre chūök nö ahangka nö i Yūtā; urĕh nö i Kelelī, unôich tö ngam minkahten vinôkö tö Yôhan; 38Tö Yēsū aṅ Nāsaret, ngam tö hachāmö elkui tö ngam Tēv, tö ngam Töhet Fanöinylö, minhôiṅyö inrē. Ök kumröönköre nö la-evṙen tö tölöök, halanken yik taṙòkhöre töt hakôlöngṙô tö ngam sī-ö, pò ngam Tēv nö in Ò. 39Ihö in mameuk nuk taṙòkhöre la-en Ò i panam yip Yahūti, i Yerūsalem inrē. Ök töfëli inrē tö cha, kilöllöngö nö i rōi chōn. 40Anga-aṅ töhachohlöngö tö ngam Tēv, im linūöi sumkum; 41Ngaich hōten Ò nö hameuktu, öt i taṙòkhöre tarik, i yip tökatöllöng pöri tö ngam Tēv mameuk, in ih öi nyamā, òk inrē holkūö Ò, unôichrit Ò nö choholre, nö ṙā-ang i yip tökapah. 42Ngaich hōten ih Anga-aṅ, öi mumkahten tarik tö Ò nö Anga-aṅ vahīlö ngam Tēv, nö kamòkken tö-aṅ, tökapah inrē. 43Anga-aṅ An ha-eūkö yik taṙòkhöre pròfĕt, tö ngòh ṙamātö ellōnre nö in Ò, nö teūngen min tö inṙē-ĕl tököölre, lökten i Mine-eny Ò.

Teungtöre Ngam Töhet Fanöinylö Nö I Kūö Yik Tahëng Mihëṅṙö

44Ṙònghöichṙô ang Pītör tö u, teungtöre ngaich ngam Töhet Fanöinylö nö i kui cha nö ṙòkhöre, yik hamang ngam ṙô. 45Ngaich yik tö tunyīnyi, yik ṙamātö ellōnre, nö uṙeh, yik hamòlröön Pītör; pò ngam inlōnti aṅ im Töhet Fanöinylö, nö hōngtu nö i më tahëng mihëṅṙö tarik. 46Pò cha nö hang ṙô cha nö ṙô tö tahëng ëlô, ha-öiny ngam Tēv inrē. 47Ngaich ngö ṙô ang Pītör, Tarīku hòng tö kô nö sōtö ngam mak, hòṅ vē nö öt vōkö, vē tö ngaich nö teūngen tö ngam Töhet Fanöinylö, nö sā hī ayī-ö? 48Ngaich hōten cha anga-aṅ nö vōkö, i Mine-eny Yēsū Kristū. Ve-ekūö ò ngaich cha-a, nö höngngöh nö haroh tum sumkam nö in cha.

Currently Selected:

INLAHEN 10: CANIBSI

Highlight

Copy