Kolosyen 3

1Par konsekan, si zot in resisite avek Kris, rod bann keksoz ki dan lesyel, kot Kris pe asize dan kote drwat Bondye#3.1 War Ps 110.1.. 2Fikse zot lespri lo bann keksoz ki dan lesyel, e non pa lo bann keksoz ki lo later. 3Annefe, zot in mor e zot lavi i kasyet avek Kris, dan Bondye. 4Kan Kris, zot vre lavi ava aparet, alor, zot osi, zot ava aparet avek li e pran par dan tou son laglwar.

Ansyen Lavi ek Nouvo Lavi

5Alor, met anmor bann dezir materyel ki dan zot: Limoralite seksyel, lenpirte, pasyon, move dezir, lavaris (lavaris se idolatri). 6Bann pese parey pou atir lakoler Bondye lo bann ki pa obei li. 7Lontan, zot osi, zot ti viv konmsa, kan zot lavi ti ganny dominen par sa bann pese.

8Me aprezan, debaras zot avek tousala: Lakoler, vyolans ek mesanste. Pa les okenn parol kalonmni ek parol obsenn sorti dan zot labous. 9Pa koz manti ant zot, akoz zot in abandonn zot vye natir avek son bann move pratik. 10Zot in pran en nouvo natir: Natir zonm nouvo ki tou letan, Bondye son Kreater, pe renouvle dan vre konnesans pour nou resanble li parfetman.

11Alor, i nepli annan okenn distenksyon ant Zwif ek non-Zwif; sirkonsi ek ensirkonsi. I nepli annan etranze ek non-sivilize, lesklav ek dimoun lib, me se Kris ki tou e dan tou.

12Alor, koman en pep ki Bondye in swazir, en pep konsakre pour li e ki i kontan, ranpli zot avek konpasyon, labonte, limilite, ladouser ek lapasyans. 13Siport kanmarad, e pardonnen sak fwa ki enn parmi zot i ofans kanmarad. Parey Senyer ti pardonn zot, zot osi pardonn kanmarad.

14Pardesi tou, annan lanmour ki soud ansanm tou keksoz parfetman dan larmoni. 15Mon swete ki lape Kris i diriz zot leker. Annefe, se ver sa lape ki Kris in apel zot kan i ti fer zot vin en sel lekor. Montre zot touzour rekonesan.

16Mon demande ki parol Kris i reste dan zot avek tou son larises. Enstri, e averti kanmarad avek lasazes. Avek rekonesans, loue Bondye avek psonm, kantik ek sanson enspire par Lespri. 17Dan tou sa ki zot fer e dir, fer tou dan non Senyer Zezi. Par li, remersye Bondye nou Papa.

Konsey pour Relasyon Personnel

18Fanm! Soumet zot avek zot mari parey fodre devan Senyer.

19Mari! Kontan zot fanm e pa tret zot dir.

20Zanfan! Obei zot paran dan tou keksoz, akoz sa i fer plezir Senyer.

21Papa! Pa provok zot bann zanfan; sa i kapab dekouraz zot.

22Serviter! Obei zot bann met lo later dan tou keksoz. Pa fer li zis kan zot met i war zot, zis pour fer plezir, me fer li avek en leker senser, par respe pour Senyer. 23Dan tou sa ki zot fer, fer li avek tou zot leker, konmsi zot pe travay pour Senyer, pa pour zonm. 24Annefe, zot konnen ki zot pou resevwar an rekonpans bann byen ki Senyer in rezerve pour zot. Se nou Senyer, Kris, ki zot pe servi. 25Sak dimoun ki mal fer, pou pey pour lemal ki i'n fer, akoz Bondye pa fer preferans pour personn.

Currently Selected:

Kolosyen 3: BSK

Highlight

Copy