Kolosyen 2

1Mon oule fer zot konnen ki mannyer mon pe lite pour zot, pour bann ki reste Laodise#2.1 War 4.13. e pour tou bann ki pa konn mwan personnelman. 2Mon swete ki zot leker ava ranpli avek kouraz; ki zot reste ini dan lanmour, e posed tou bann larises konplet ki rezilta vre disernman. Konmsa, zot ava kapab konn sekre Bondye, setadir Kris li menm. 3Dan li, tou bann trezor lasazes ek konnesans Bondye in ganny kasyet.

4Mon dir zot sa, pour ki zot pa les personn tronp zot par bann zoli diskour. 5Menm si mon pa avek zot an personn, mon avek zot an lespri, e mon rezoui pour war ki zot tenir ferm e reste solid dan zot lafwa dan Kris.

Lavi Konplet dan Kris

6Alor, parey ki zot in aksepte Zezi-Kri koman Senyer, kontinyen reste atase avek li. 7Viv anrasinen dan li; konstri zot lavi lo li; reste touzour pli ferm dan lafwa dapre sa lansennyman ki zot in resevwar, e montre ki zot ranpli avek rekonesans.

8Fer atansyon ki zot pa ganny atrape par bann fo largiman filozofik, ki pa fonde lo Kris, me lo lasazes imen, lo tradisyon zonm, ek bann lespri ki kontrol lemonn#2.8 War Gal 4.3.. 9Annefe, Kris i posed dan son lekor, tou natir konplet Bondye. 10Zot osi, zot in resevwar lavi konplet dan Kris ki domin tou bann lotorite e tou bann pouvwar spirityel.

11Dan Kris zot in ganny sirkonsi, pa par en sirkonsizyon fer par lanmen zonm, me en sirkonsizyon ki sorti kot Kris e ki delivre nou kont pouvwar nou lekor peser. 12Annefe, kan zot ti ganny batize, zot ti'n ganny met dan tonbo avek Kris. Zot in krwar dan pwisans Bondye ki'n resisit li dan pouvwar bann mor. 13Otrefwa, zot ti spirityelman mor akoz zot pese, e par zot ensirkonsizyon. Me aprezan, Bondye in redonn nou lavi avek Kris. I'n pardonn nou tou nou pese. 14In efas sa lakt lakizasyon, avek tou son bann lobligasyon ki ti kont nou; in fer li disparet par klout li lo lakrwa. 15Bondye in debaras li avek pouvwar bann lotorite ek pwisans bann lespri. In fer en spektak piblik avek zot dan laviktwar son Garson.

16Pa les personn pas zizman lo zot konsernan sa ki zot manze oubyen bwar, konsernan bann zour lafet, nouvellin oubyen bann saba. 17Tousala i zis lonbraz keksoz ki pou vini dan lavenir. Me se Kris ki larealite.

18Pa les zot ganny kondannen par dimoun ki pran plezir dan bann fo pratik limilite, ek ladorasyon bann lanz e ki fer vantar dan fo vizyon. Par zot mannyer panse ki tro imen, sa bann dimoun i ranpli avek lorgey san okenn rezon. 19Zot pa reste atase avek Kris ki latet. Annefe, latet ki kontrol lekor antye e ki donn li tou sa ki neseser. Par li, tou i reste ini ansanm: Son bann zwentir, artikilasyon, ek misk, tou ansanm, Bondye ki fer li grandi.

Mor e Resisite avek Kris

20Si zot in mor avek Kris, zot in ganny libere avek bann lespri ki kontrol lemonn#2.20 War Gal 4.3.. Alor, akoz zot pe viv konmsi zot ankor fer parti lemonn e aksepte bann regleman ki ganny enpoze lo zot: 21Pa pran sa; pa gout sa; pa tous sa? 22Tousala, i konsern bann keksoz ki tanporer, akoz zot en bann regleman ek en bann lansennyman pirman imen.

23I vre ki sa bann regleman i kapab annan laparans lasazes: Devosyon personnel, limilite ek tretman strik anver son lekor. Me zot napa okenn vre valer. Tousala i zis pour satisfer bann dezir imen.

Currently Selected:

Kolosyen 2: BSK

Highlight

Copy