LUK 4
4
Jisu Thsadsücho
(Mat 4.1-11; Mrk 1.12-13)
1Jisu, Anbü Amüsanü jeng Jordan lanü thali rocho ko lipilih lang anbünü notsicho, 2ko motsingnü nyümong yüre thsadsücho. Hütsü bekhyah ayung abinü tusü mütsucho, ko hütsü bekhyah khude abi yangcho.
3Motsing tsünü abi te yocho, “Nüh Tsingrangba tsurü thsakhang, lung hinü hümdhse kangsohng.”
4 #
Azk 8.3
Ta Jisu-nü lalingcho, “Amüsa yunü yore, ‘Nyitsarünü hümdhse dunü akang mülicheh.’ ”
5Hütsüpü motsingnü abi notuwücho ko limih la yanglihti apüm nahsüp müthsae abi te ngusohcho. Motsing tsünü abi te yocho, 6“Ihnü nü khyang hiri zii ko kuthsi apüm jünung. Hiri apüm I khyang jopehko, ko Ihnü jünyürü khyang jünung kohle. 7Nühnü Ih mübükhang, hi atümung nüyo kangnung.”
8 #
Azk 6.13
Jisu-nü lalingcho, “Amüsa yunü yore, ‘Abüdongba nü Tsingrang mübüng ko abi du dikehng!’”
9Hütsüpü motsingnü abi Jerusalem lang nowücho ko amübü kumung athsengu chah pümsohcho, ko abi te yocho, “Nüh Tsingrangba Tsurü thsakhang, nü jangjangthsa hilanü tsohchoung. 10#N. Khi 91.11Tunüo amüsa yunü yore, ‘Tsingrangba-nü nüh xükümnung nengdang abi riwürüti khyang yuzeng jünung.’ 11#N. Khi 91.12‘Ko nü jing mii lung chah mümüthinung nengdang arühnü arüh kheh la nüh wüpchonung.’”
12 #
Azk 6.16
Ta Jisu-nü lalingcho, “Amüsa yunü yore, ‘Abüdongba nü Tsingrang tüthsadsü.’ ”
13Khode motsing tsünü lang papanü Jisu thsadsükhangcho, abinü azachah nengdang abi pehjücho.
Galil la Jisu-nü Anguchi Dikehcho
(Mat 4.12-17; Mrk 1.14-15)
14Hütsüpü Jisu Galil lang thali rocho, ko Anbü Amüsa zii abi te licho. Ko abi nengdang yusi tsü hütsü mükyah apümlang sobhocho. 15Abinü Sinagog la docho ko atümungnü abi secho.
Nazaret la Jisu Mükhyüchocho
(Mat 13.53-58; Mrk 6.1-6)
16Hütsüpü Jisu-nü abi zichehba Nazaret lang wücho, ko Sabath nyümong abi nanathsacho roh-i Sinagog la züducho. Abinü amüsa yu khinung yamüsucho 17ko azikehrü Isaya vakha abi khyang jücho. Abinü thrahlohcho tsü lehchehcho ko hita thrah licho ngucho.
18“Abüdongba Nbü I chah lile,#Isa 61.1-2
tunüo ailümrü khyang yusi atsa
hironung abinü Ih müyühjü throchehcho.
Arangyoh la lirü te nyüje seyohjünung
ko nahtohrü trahsohnung;
ko ayurü lehcheh müthehsohnung,
19ko Abüdongba-nü müyurüti khümchonung
becho chihko pü züdesohnung abinü Ih müthehcho.”
20Jisu-nü thrahloh tsü lohtipü, anguchirü khyang thali jüpü pümcho. Sinagog la pümrü atümungnü abi chah du dhinglah dhing pümcho, 21abinü arüh te yocho, “Nührünü khi yuchicho roh-i, hiba amüsa yu chünye tikehre.”
22Abinü tsara chocho yuchi arüh atümungnü nyemüyang yocho, “Hivi hi Josef tsurüsü mahrü do?”
23Abinü arüh te yocho, “Akyangjürü, nü jangjangthsa kyang; nühnü Kapernaum la nguchicho Ihrünü yuchicho kyokyo nüpu yang hilasü nguching” pü nührünü Ite yoririepü Ihnü müdhecho. 24#Jhn 4.44Ihnü nührü te yuje yore, “Palu lih lalü azikehrü tsü khodesü mükhyüchore.”
25 #
1 Yang 17.1
“Hi nyieng: Israel lih la Elija shikhe khode kang asang pü achangsho tsing mürocho ko yangkong apümlang tikehcho, hütsütade chomilarü khütango lichoeba tsü yuje. 26#1 Yang 17.8-16Israel la sü yanglang sü Elija müwüsoh, ta Sidon lih la Zarefat la liba chomitpü yanglang du wüsohcho. 27#2 Yang 5.1-14Ko azikehrü Elisha shikhe Israel la mübhira kehrü khütango licho; ta Syria-ba Naman chah khu arüh süsü mükyangcho.”
28Sinagog la lirünü hi yuchide, arüh rihlong chürocho. 29Arühnü shemüsunü yangdi lanü abi dsepehcho ko khüi zong la arüh yangdi thri licho, hütsü zong chah notuwücho. Arühnü lungdhong la tsü dümyohchü süsohnung lümcho, 30ta abinü arüh kahlanü bücheh tsipehcho.
Amünyi Nbünü Rangchoba Nyitsarü Khüdu
(Mrk 1.21-28)
31Hütsüpü Jisu-nü Galil la yangdi khüdu Kapernaum lang wücho ko Sabath nyümong abinü nyitsarüti te docho. 32#Mat 7.28-29Abinü docho yuchi arüh atümungnü nyemüyangcho, tunüo abinü tase bichi chocho. 33Sinagog la tsü nyitsarü khüdu amünyi nbünü rangchoba zehcho; ko abinü yuva amülahnü züdecho, 34“Hai, ihrü te nüh tu nguchinyüro, Nazaret-rü Jisu? Nüh ihrü changsohnung hila rocho mah-o? Nüh sünang Ihnü müdhele: Nüh Tsingrangba amüsa yusi hirü!”
35Jisu-nü anbü te tsü yuzengjo yocho, “Tümümüpko nyitsarü chah tsünü chürung!” Amünyi tsünü arüh bete nyitsarüba tsü khülusohcho ko tu mülerohpejüpü abi chahnü tsipehcho.
36Ko nyitsarü atümung nyemüyangnü khüunü khüu te yocho, “Yu hiri hi tuo? Tase ko zii la nyitsarü hinü amünyi nbü khyang yuzeng jüre ko arüh chürore!” 37Ko Jisu nengdang yusi tsü hütsü lih apümlang sobhocho.
Jisu-nü Nyitsarü Adrong Kyangjücho
(Mat 8.14-17; Mrk 1.29-34)
38Jisu-nü Sinagog tsü pehjücho ko Simon kuh la züducho. Ko Simon nitpü atpa rihminü khee dhsa yüpjocho, ko arühnü Jisu te abükyü nengdang yocho. 39Abinü wü abükyü yüpji müshüm yacho, ko rihmi te tsü abükyü pehjünung yuzengjücho. Rihmi tsünü abükyü pehjücho, ko hütsütade tsünü shemüsu abükyünü arüh dikehcho.
40Nyü züdupü, dhsara papanü füdhsarü atümung Jisu yanglang norocho; ko arüh nyitsarü müipi chah apu khehnü nyümkeh arüh atümung kyangjücho. 41Amünyi nbütisü nyitsarü adrong chahnü chüro, “Nüh Tsingrangba Tsurüe, pü züde tsicho!”
Jisu-nü amünyiti khyang yuzeng jonü müchosohcho, tunüo arühnü abi Mesia epü müdhecho.
Jisu-nü Sinagog la Thsingyucho
(Mrk 1.35-39)
42Nyangnyü khüu Jisu-nü yangdi tsü pehjüpü anaying müdüm khüdu lang tsipehcho. Hütsünü nyitsarütinü abi yangchimüsucho, ko arühnü abi ngude, abi mütsisohnung müküpcho. 43Ta abinü arüh te yocho, “Ihnü Tsingrangba yanglih Yuse Atsa tsü apa yangdi langsü thsingyubae, tunüo hütsü nengdang Tsingrangba-nü Ih müthehcho.”
44Hütsünü Judea lih Sinagog apüm la abinü thsingyu rachicho.
Currently Selected:
LUK 4: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
