LUK 5

Jisu-nü Akhudiba Monoti Dsire

(Mat 4.18-22; Mrk 1.16-20)

1 # Mat 13.1-2; Mrk 3.9-10; 4.1 Nyümong khüdu Jisu Genesaret kihdi bekhümla yade, nyitsarütinü Tsingrangba yu nyinung nyingta wücho. 2Kihtang anyüh kihbekhümla yohpüpü ngurangrüti arüh yojeh thsütohchiya abinü ngucho. 3Jisu-nü kihtang khüdu chah küducho, hütsü Simon yo thsacho ko abi te kihbekhümla tsünü azikyah düm-müthehnung tsingdhingcho. Jisu-nü kihtang la tsü pümpü amülung te docho.

4Ayu chozahde, abinü Simon te yocho, “Kihtang tsü ayü asoh-ulang düm-müthehng, ko ngurangnung nengdang nührü yojeh tsü phayohchüng.”

5 # Jhn 21.3 Simon-nü lalingcho, “Abüdongba, ihrünü shomang müyüp phako ta tusü mürang. Ta nühnü yorü tsü, Ihnü yojeh tsü phanung.” 6#Jhn 21.6Arühnü phayohchücho ko ngu khütango phatichonü arüh yojeh arohrüprü du thsacho. 7Achotsü arühnü kihtang akhüula pümrü arüh shangrü te ro troung pü khehnü dsicho. Ko arüh rocho ko kihtang anyüding ngunü jengmülümchonü kihtangti tsü amülingyohrü thsacho. 8Simon Peter-nü atikehcho tsü ngude, abinü Jisu bete mükhukeh yocho, “I tenü za tsieng, Abüdongba. Ih amünyi nyitsarüe!”

9Arühnü ngu khütango rangcho ngu abi ko abi te aparü atümung dee nyemüyangcho. 10Simon müyangrüti Zebede tsurü Jakob nyüsü hütsü roh-i nyemüyangcho. Jisu-nü Simon te yocho, “Tüdrü; ade tinü nühnü nyitsarü rangnung.”

11Arühnü arüh kihtangti kihbekhümla tphahchehpü, lüpcho pehjüko Jisu khanglang iiwücho.

Jisu-nü Nyüh Khüdu Kyangjücho

(Mat 8.1-4; Mrk 1.40-45)

12Nyümong khüdu Jisu yangdi khüdula pümde, mübhira kehrü khüdu abi yang rocho. Khode abinü Jisu ngucho, apu jangjang thsütsu abi te kihchicho, “Adirü, nühnü lümkhang, Ih müsachehjünung kohle!”#5.12 Ih müsachehjünung kohle: Hiba madhsa khunü nyüh khüdu ayahnü mümüsasohrepü yore.

13Jisu-nü akheh müyungchü abi chah thahpo yocho, “Ihnü lümre, müsachehng.” Hütsüdenü adhsa tsünü nyitsarüba tsü pehjücho. 14#Lev 14.1-32Jisu-nü abi te yuzengjo yocho, “Sütesü tüyo, ta bebüba yanglang wüng ko abi khyang dhingsohng; ko atümung bete nüh müsachehkopü yuzithsanung nengdang, Mosa-nü mülacho amübü mübüng.”

15Ta Jisu nengdang yusi tsü alaa du apümlang sobhocho, ko nyitsarü khütango abi yu nyinung ko arüh dhsara kyangsohnung nengdang abi yang rocho. 16Ta abinü anayinglang dangkhidangnangnung tsipehcho.

Dsidsisonü Dhsarü khüdu Kyangjücho

(Mat 9.1-8; Mrk 2.1-12)

17Nyümong khüdu Jisu-nü do lide, Galil, Judea ko Jerusalem yangdi müipi lanü rocho Farisirü ko yuzeng adorüti khürü hütsüla pümcho. Adhsangnangrü kyangjüsohnung Abüdongba zii abi chah licho. 18Nyitsarü khürünü dsidsisonü füdhsarü nyüh khüdu chongnong lanü dhi rocho, ko arühnü abi kuh la tsü dhi züdu Jisu bete yohpünung müküpcho. 19Ta sühdirachonü arühnü abi münozüduchehcho. Hütsünü arühnü abi kumungchah dhi küducho ko kuh chuphohnü abi chongnong chahnü amülung longla Jisu bete dhichahchücho. 20Jisu-nü arüh yudsi mülahcho ngunü nyitsarüba te tsü yocho, “I müyang, nü münyi pehjüko.”

21Yuzeng adorüti ko Farisirütinü arühbürü chotarü, “Hiroh-i müthsamünyü choba nyitsarü hi süo! Münyi pehjünung kohba tsü Tsingrangba due!”

22Jisu-nü arüh lümcho müdhe arüh te yocho, “Nührünü tuepü hütsüta lümro? 23‘Nü münyi pehjüko pü yonung amülaba a, mahkhang, Shemüsung ko tsehng pü yonung amülabao’? 24Khang, Ihnü nührü te tsidsa yonung, Nyitsarü Tsurü chah hiba limih la münyi pehjünung tase kehle.” Hütsüpü abinü dsidsisüba nyitsarü te tsü yocho, “Shemüsung, nü yüpji dhing ko kulang wüng!”

25Hütsüdenü nyitsarüba tsü arüh atümung betenü shemüsucho, ko abi yüpji tsü dhipü Tsingrangba nengse kulang tsicho. 26Arüh atümung khütang nyemüyang, drüsehnü Tsingrangba nengse yocho, “Chünye Ihsanü anyemüyangnung nguchi nguko!”

Jisu-nü Levi Dsicho

(Mat 9.9-13; Mrk 2.13-17)

27Hütsüpü, Jisu-nü dongkhu chüducho ko alihmüthsü dhrirü anengnü Levi, abi dochungkuh la püm ngucho. Jisu-nü abi te yocho, “Ih iirung.” 28Levi-nü shemüsucho, ko lüpcho pehjüpü abi iiwücho.

29Hütsüpü Levi-nü abi kuh la Jisu nengdang thsüti arangcheh külüpcho, ko shirü yola tsü alihmüthsü dhrirü ko aparü adrong zehcho. 30Farisirü ko yuzeng adorü khürünü Jisu mono nyümnü abi te yocho, “Tuepü nührünü alihmüthsü dhrirü ko amünyirü yola tsuyongro?”

31Jisu-nü arüh te lalingcho, “Tsayengrü nengdang akyangjürü müdhsütah, ta füdhsarü nengdang dhsütahre. 32Ih amüsarü lasih thsamülasohnung müro, ta münyirü nengdang rocho.”

Kongcho Nengdang Atsingdhingba

(Mat 9.14-17; Mrk 2.18-22)

33Nyitsarü khürünü Jisu te yocho, “Johan monotinü adrongpi kongnü dangkhidangnangre, ko Farisirü monotinüsü hütsü roh-i nguchire; ta nü monotilü tsure ko yongre.”

34Jisu-nü lalingcho, “kukangbong arüh yola lipü kulang würü shirüti nührünü kongsohnung mah-o? Hütsüta mah. 35Ta arüh yolanü kuthribong notsinung nyümong tsü ronung, hütsüde arühnü kongnung.”

36Jisu-nü arüh te yukitaba hisü yocho: “Sünüsü shü asi chahnü rehcho athreh chah mükhümkehre. Tunüo shü asi tsü rehrüpnung, ko shü asi dsi-o tsüsü ahi chah tsü müphishunung. 37Mahkhang, sünüsü cikih anu shinga ahi la müliire, tunüo cikih anu tsünü shinga tsü tsohrüpnung, ko cikih tsü tsüthohnung, ko shinga tsüsü thsangnyangnung. 38Hütsü müli, cikih anu tsü shinga asi la liire! 39Ko sünüsü cikih azicho yongpü khanglang anu mühyongre. ‘Azicho tsü atsaubaepü abinü yore.’ ”

Currently Selected:

LUK 5: SANGBSI

Highlight

Copy