LUK 3

Baptijüba Johan Athsingyuba

(Mat 3.1-12; Mrk 1.1-8; Jhn 1.19-28)

1Yangthsaba Tiberius yangthsacho kang dhüremüngau la; Pontius Pilat tsü Judea governor, Herod tsü Galil yangthsarü, ko amung Filip tsü Iturea ko Trakonitis limih la yangthsarü; Lesanias tsü Abilene yangthsarü, 2ko Annas e Kaifas nyüh tsü Amungthriba Bebürüti licho. Hütsü shikhela lipilih la Zekaria tsurü Johan yanglang Tsingrangba yu rocho. 3Hütsünü Johan-nü Jordan yongkhi mükang liba lih atümunglang wünü thsingyu yocho, “Nührü münyi lanü ximüla bapting, ko Tsingrangba-nü nührü münyi pehjünung.” 4#Isa 40.3-5Azikehrü Isaya vakha la thrah licho roh-i:

“Lipilih la nyüh khüdunü züdele:

‘Abüdongba nengdang lang rungnüm;

abi tsehsohnung lang müchongkhüti pihng!

5Lihkoh atümung sühmüjangnung,

akhang azong atümung ngah kangnung.

Lang amüshi tsü müchongsohnung,

ko aküprah lang müjangri kangsohnung.

6Ko nyitsarü atümungnü Tsingrangba akangcheh ngunung!’”

7 # Mat 12.34; 23.33 Nyitsarü khütango Johan yanglang abi khyang baptisohnung rocho. Abinü arüh te yocho, “Nührü mürü zati!” “Tsingrangba-nü müthehnung liba akhingchi lanü tsiphunung kohnungepü sünü nührü te yocho? 8#Jhn 8.33Nührü münyi lanü ximülakopü ngusohnung nguchiti nguching. Ko nührü yola Abraham tsü nührü jümürüepü yonung tüdikeh. Ihnü nührü te yore, Tsingrangba-nü lung hirinü Abraham tsurüti kangsohnung kohle! 9#Mat 7.19Singdong tsü ayingnü renung püh rungnüm lile; asih atsa müsihba singdong atümung retsu michang la dhiyohchünung.”

10Amülung tsünü abi te tsingdhingcho, “Khang Ihrünü tu nguchinung?”

11Abinü lalingcho, “Sü fükhüm anyüh liro abinü amüliba khyang khüdu jüng, ko sü tsuyongnung liro abinü hütsü changtaang.”

12 # Luk 7.29 Alihmüthsü dhrirü khürü baptisohnung rocho, ko arühnü abi te tsingdhingcho, “Adorü, Ihrünü tu nguchinung?”

13Abinü arüh te yocho, “Yuzeng chah alaa tüdhri.”

14Rothsarü khürünüsü abi te tsingdhingcho, “Ihrü khüta? Ihrünü tu nguchibao?” Abinü arüh te yocho, “Sü chahnüsü thsi rohcho tükhyü mahkhang arahkheh la süsü tümülangjü. Nü chothsila longkyang lieng.”

15Nyitsarü alongdi alaa limüsucho, ko arühnü Johan tsü Mesia a mahnangpü lümcho. 16Hütsünü Johan-nü arüh te yocho, “Ihnü nührü kih la baptijüre, ta I tenü adiuba khüdu tsehle. Ihlü abi jingkhüm yo lehchehnungsü müleng. Abinü nührü Anbü Amüsa ko michang la baptijünung. 17Pungkhyang lanü fürü wicheh abi shih la khyübülungnung nengdang, apu kheh la müro biyale; ta abinü ayülü khodesü mümehba michang la tahpehnung.”

18Johan-nü lang papa adrongnü thsüchi arüh te yuse atsa thsingyucho. 19#Mat 14.3-4; Mrk 6.17-18Ta Johan-nü governor Herod yübücho, tunüo abinü amung nitpü Herodias khyüjücho, ko apa münyi nguchi adrong nguchicho. 20Hütsüpü Herod-nü alaa amütsau nguchi Johan arangyoh kuh la khangticho.

Jisu Bapticho

(Mat 3.13-17; Mrk 1.9-11)

21Nyitsarü atümung baptipü khanglang, Jisu sü bapticho. Abi dangkhidangnang yade ning khangthrucho, 22#Lip 22.2; N. Khi 2.7; Isa 42.1; Mat 3.17; Mrk 1.11; Luk 9.35ko Anbü Amüsa mümüdhrü kyo abi chah jürocho. Ko ninglangnü yuva khüdu rocho, “Nüh Ihnü müiba Tsurü. Nü chah I long kyangre.”

Jisu Jümürüti

(Mat 1.1-17)

23Khode Jisu anguchi dikehcho, abi kang sangreo azirü thsacho. Abi nyitsarünü lümcho roh-i Josef tsurü, sü Heli tsurü licho, 24Mathat tsurü, Levi tsurü, Melki tsurü, Jannai tsurü, Josef tsurü, 25Matathias tsurü, Amo tsurü, Nahum tsurü, Esli tsurü, Nagai tsurü, 26Math tsurü, Matathias tsurü, Semein tsurü, Josek tsurü, Joda tsurü, 27Joanan tsurü, Resa tsurü, Zerubabel tsurü, Shealtil tsurü, Neri tsurü, 28Melki tsurü, Addi tsurü, Kosam tsurü, Elmadam tsurü, Er tsurü, 29Joshua tsurü, Eliezer tsurü, Jorim tsurü Mathat tsurü, Levi tsurü, 30Simeon tsurü, Juda tsurü, Josef tsurü, Jonam tsurü, Eliakim tsurü, 31Melea tsurü, Menna tsurü, Matatha tsurü, Nathan tsurü, David tsurü, 32Jesse tsurü, Obed tsurü, Boaz tsurü, Salmon tsurü, Nashon tsurü, 33Aminadab tsurü. Admin tsurü, Arni tsurü, Hezron tsurü, Perez tsurü, Juda tsurü, 34Jakob tsurü, Isak tsurü, Abraham tsurü, Tera tsurü, Nahor tsurü, 35Serug tsurü, Reu tsurü, Peleg tsurü, Eber tsurü, Shela tsurü, 36Kainan tsurü, Arfaxad tsurü, Shem tsurü, Noa tsurü, Lamek tsurü 37Methusela tsurü, Enok tsurü, Jared tsurü, Mahalalel tsurü, Kenan tsurü, 38Enosh tsurü, Seth tsurü, Adam tsurü, Tsingrangba tsurü.

Currently Selected:

LUK 3: SANGBSI

Highlight

Copy