LUK 2

Jisu Surocho

(Mat 1.18-25)

1Hütsü shikhela yangthsaba Augustus-nü Roman yanglih atümunglang mono khinung yuzengjücho. 2Hiba akhudiba mono khide tsü Quirinius tsü Syria la Governor thsacho. 3Ko atümungnü palu neng thrahyohnung palu yangdi lang wücho.

4Josef tsü Galil la Nazaret yangdi lanü Judea la liba Bethlehem, Yangthsaba David suro lih yang wücho, tunüo abi David chahnü trahchocho khüdu licho. 5Abi te xengnung müxingta litpü Mary nüpü neng thrahyohnung wücho. 6Abükyü fü müdeng licho ko arüh Bethlehem la lide, zatbünung becho chihcho. 7Hütsü abükyünü akhudiba azarü surocho, ko shü anana la müshüpü misü tbhü la abi yüpsohpücho, tunüo shilangkuh la arüh nengdang amüdongchah mülicho.

San Nyahrüti ko Riwürüti

8San nyahrü khürü hütsü lih müdümla tsü aromang jungchah Santi nyahnü licho. 9Abüdongba ninglang riwürü khüdu arüh bete chüro ngucho, ko Abüdongba ahechi arüh chah hekehjücho. Arüh dee drüsehcho, 10ta ninglang riwürü tsünü arüh te yocho, “Tüdrü! Ihnü nührü nengdang yusi atsa hirore, khüinü nyitsarü atümung khyang akünyang amülah hirojünung. 11Chünye David yangdila nührü Kangchehjüba Abüdongba Khrista tsü suroko! 12Ko nührü te hi amüdhethsa linung: nührünü akhunga khüdu shü anananü müshüpü misü tbhü la yüpjo ngunung.”

13Thohdhünü riwürü yola tsü ninglangrü khütang zehpü Tsingrangba nengsekhi thsanü yorü: 14“Amichahba ninglang lih la Tsingrangba khyang ahechi thsaang, ko limih chah sürü te abinü longsüro arüh te atbachi thsaang!”

15Khode ninglang riwürü tsü arüh tenü za thali ninglang tuwücho, San nyahrütinü khüunü khüu te yorü, “Abüdongba-nü Ihsa te atikehcho tu yocho, hütsü dhingnung Ihsanü Bethlehem lang wünung.”

16Achotsü arühnü dhsüdhsa wünü Mary e Josef nyüh shirücho ko akhunga tsü Misü tbhü la yüpjo ngucho. 17San nyahrütinü abi ngude, akhunga nengdang ninglang riwürünü tu yocho hütsü arüh te yocho. 18San nyahrünü tu yocho hütsü yuchirü atümungnü nyemüyangcho. 19Mary-nü hiri apüm lümchehcho ko hütsüri nengdang soh lümdhingcho. 20San nyahrütinü tu yuchicho, ko ngucho hütsüri nengdang Tsingrangba nengse thali tsicho; hütsü ninglang riwürünü arüh te yocho roh-i du licho.

Jisu Neng Dsijücho

21 # Lev 12.3; Luk 1.31 Nyükhih khüdu khanglang, khode akhunga tsü müjüp-pehnung bekhyah chihcho, abi longla mühiede ninglang riwürünü jücho roh-i, abi neng Jisu dsijücho.

Jisu Amübükuh la Jücho

22 # Lev 12.6-8 Mosa yuzengnü mülacho roh-i, Josef ko Mary nyünü müsachehba nyümong chii rode; arühnü Abüdongba khyang jünung abi Jerusalem lang nowücho. 23#Nüch 13.2, 12Abüdongba yuzeng la thrahnü licho roh-i: “Adhrerü aukhurü atümung Abüdongba khyang khakhuchüjünung.” 24Abüdongba Yuzengnü mümüdhrü anyüh mahkhang kuh-mümüdhrü za anyüh amübü jüng pü yocho roh-i, anyüsü mübünung wücho.

25Hütsü shikhela nyüh khüdu anengnü Simon Jerusalem la licho. Abi amüsarü Tsingrangba jengreng drürü nyüh khüdu ko Israel khümchosohnung mükhyah ying licho. Anbü Amüsa abi chah licho, 26ko abinü Abüdongba anyengchocho Mesia tsü müngu delü müsünungepü abi te nyengchocho. 27Anbünü Simon amübükuh yang nowücho. Khode tpurünü azarü Jisu tsü amübükuh lang yuzeng yangthsa roh-i abi nengdang nguchinung norocho, 28Simon-nü azarü tsü akheh la wüpchocho ko Tsingrangba khyang anengse jücho:

29“Ade, Abüdongba, nüh anyengchocho yuje,

nü dikehrü atbachila tsisohng.

30Ipu nahnü nü akangcheh nguko,

31khüiba nühnü liküprü bete rungnümcho.

32 # Isa 42.6; 49.6; 52.10 Yangpirü te nü lümcho mishanung atsingse khüdu

ko nü müyurü Israelrü nengdang ahechi.”

33Au e atpa nyüh tsü Simon-nü abi nengdang chocho yuchi nyemüyangcho. 34Simon-nü arüh müwajüpü atpa Mary te yocho, “Israel la khütango thsangnyangjünung ko khümchonung Tsingrangba-nü hiba azarü hi throchehko. Abi tsü Tsingrangba chahnü amüdhethsa khüdu khüi nyitsarü adrongnü nyüm chonung 35ko hütsüta arüh arang lümlong mishajünung. Ko nohsheng akoh kyo, awah tsünü nübükyü lasih khakhu thranung.”

36Asher hung lanü Fanuel tsulatpü azikehlarü chomilarü khüdu anengnü Anna licho. Abükyü xengpü kang dhünyeh du anii te licho, ko ade abükyü kang qurepü müyü ashilarü licho. 37Abükyünü khodesü amübükuh müpehjücho; ama atsingse, kongnü dangkhidangnang Tsingrangba mübücho. 38Hütsü shikhela abükyü tsü rocho, ko Tsingrangba khyang anengse jücho ko Jerusalem nyüje kangnung Tsingrangba yingrü atümung te azarü nengdang tsü chocho.

Nazaret lang Thalicho

39Josef e Mary nyühnü Abüdongba yuzengnü dhsütahcho atümung nguchikhangpü, Galil la arüh yangdi Nazaret yang thali rocho. 40Azarü tsü zicho ko suzeh kangcho; abi lümlong ajeng ko Tsingrangba amüwa abi michah licho.

Amübükuh la Azarü Jisu

41 # Nüch 12.1-27; Azk 16.1-8 Kang mükhu Jisu tpurü tsü Jerusalem lang Phungkhu Thsütila zehnung wücho. 42Khode Jisu kang dhüreanyüh dhreza kangcho, ayah roh-i arühnü thsütila zehnung wücho. 43Thsüti tsü changkapü, arühnü kulang thalicho, ta azaba Jisulü Jerusalem la nyehlipehcho. Abi tpurünü hütsü mümüdhehcho; 44arühnü abi tsü amülung yola tsehlepü lümnü mükhyang tsehpü khanglang arüh tsutpurü ko shangrüti yola yangchinung dikehcho. 45Arühnü abi müngucho tsü abi yangchi Jerusalem lang thali wücho. 46Asangu nyümong arühnü abi amübükuh la Jihudarü adorüti yola, arüh yu nyinü, ko arüh te tsingdhingnü püm ngucho. 47Abi yu yuchirü atümungnü abinü thsehdhsa lalingcho ngu nyemüyangcho. 48Abi tpurünü abi ngude, arüh nyemüyangcho, ko atpanü abi te yocho, “Ale, tuepü hiroh-i nguchiro? Nüu Ihjü dee müci rohcho nüh yangchirü mado.”

49Abinü arüh te lalingcho, “Tuepü nührü Ih yangchiro? Ih I U kuh la linungepü nührünü mümüdhecho mah-o?” 50Ta arühnü abinü lalingba tsü mühnyichehcho.

51Achotsü Jisu-nü arüh yola Nazaret lang thali wücho ko hütsüla abinü arüh yochonyi licho. Atpanü hiri atümung alasih la lümkehnü yohpücho. 52Jisu shutsa ko lümlong anyüdingla, Tsingrangba ko nyitsarünü khyünyünungthsa zicho.#1 Sam 2.26; Cho 3.4

Currently Selected:

LUK 2: SANGBSI

Highlight

Copy