LUK 1
1
1Amüi Theofilus:
Ihrü yola atikehcho nengdang yusi thrahnung nyitsarü adrongnü palu kohcho nguchiko. 2Arühnü thrahba tsü hiri adikeh lanü sürünü ngucho ko sürünü yusi tsü sobhocho arühnü ihrü te yochoba lile. 3Hütsüeko, adirü Theofilus, arüh adikeh lanü Ihnü hiri khiyu apüm nengdang müzahmüki lümdhingko, ko nü nengdang achunglangnü thrahnung atsau thsanungepü Ihnü lümcho. 4Nüte doyoba lüpcho yuje tsü nühnü ajeng müdhenungthsa Ihnü hi thrahre.
Baptijüba Johan Suronung Choyohcho
5 #
1 Roh 24.10
Judea#1.5 Judea: Palestine lihmükyah apüm te dsicho. la Herod yangthsa shikhela, bebürü khüdu anengnü Zekaria, bebürü hung Abija chahnü rochoba licho. Anitpü aneng Elizabeth; abükyüsü bebü hung lanü licho. 6Anyüdingnü Tsingrangba jingte Abüdongba yuzeng atümung yochonyi akang atsa licho. 7Anyüh tsurü mülicho tunüo Elizabeth tsü pümdongcho, ko anyüding dee shizi kangcho.
8Nyümong khüdu Zekaria amübükuh la, abi alehcho bebü nguchi dikeh yacho. 9Bebürünü bichiba yangthsa roh-i, bholu chah müchiji tahnung abi chah zii thsakehcho. Hütsünü abinü Abüdongba amübükuh la züducho, 10ko müchiji tahba bekhyah sühdi tsü kuh bete dangkhidangnang yingcho.
11Müchiji tahba bholu tsalangthring Abüdongba riwürü khüdu chürocho. 12Zekaria-nü abi ngude, abi nehcho ko drücho. 13Ta riwürü tsünü abi te yocho, “Tüdrü, Zekaria! Tsingrangba-nü nü dangkhidangnang yuchiko, nü nitpü Elizabeth-nü nü khyang azarü khüdu nümüsujünung. Ko nühnü abi neng Johan dsijünung. 14Khode abi suronang nü akünyang khütoh-i ko aparüsü akünyang khütoh-i thsanung! 15#Khi 6.3Abi Abüdongba jingte amülah kangnung. Abinü yongkha tusü müyongnung. Abi asuro denü Anbü Amüsanü jeng linung, 16ko abinü Israelrü adrong arüh Tsingrang Abüdongba yang thali noronung. 17#Mal 4.5-6Abinü azikehrü Elija kyo rezehnü Abüdongba müngu wünung. Abinü auti ko azarüti kehtalijünung; abinü ayocho mühnyirüti amüsaba langlang ximülasohnung; abinü Abüdongba nyitsarüti abi nengdang rungnümsohnung.”
18Zekaria-nü riwürü te tsü yocho, “Ihnü hütsü khüta müdhenung? Ih ashirü ko I nitpüsü ashilarü kangko.”
19 #
Dan 8.16; 9.21 Riwürü tsünü yocho, “Ih Gabriel,” “Ih Tsingrangba bete yaba, abinü nüte chotanung ko yusi atsa yonung Ih müthehcho. 20Ihnü nüte nyengchoba tsü abükyü bechola tikeh ronung. Ta nühnü I chah müyudsichonü; nü tsudhre suro yingcheh nüh yu müchochehpü linung.”
21Nyitsarütinü Zekaria tuepü hitoi nyahli amübükuh la tsü liro pü nyemüyang abi yingcho. 22Khode abi chürocho, abinü arüh te müchotachehcho, hütsünü arühnü amübükuh la tsü abinü müngucheh ngukopü müdhecho. Yu khüdusü müchochehchonü, abinü akhehnü iichi arüh te chotacho.
23Khode amübükuh la abi nguchi thümcho, Zekaria-nü kulang thalicho. 24Tunyah mülipü anitpü Elizabeth afü müdeng kangcho ko choo münga kuh lanü mübüchehcho. 25Abükyünü yocho, “Ade achangkala Abüdongba-nü Ih dee troko. Abinü Ih ashah khyümüijüko!”
Jisu Suronung Nengdang Choyohcho
26Elizabeth fü müdeng kangpü choo adhüroh-u chah Tsingrangba-nü riwürü Gabriel Galil la yangdi khüdu Nazaret lang müthehcho. 27#Mat 1.18Yangthsaba David chahnü trahchocho nyüh khüdu anengnü Josef te xengnung nyengcho liba amüthsengcheh lazarü yang yusi hirocho. Lazatpü neng tsü Mary thsacho. 28Riwürü tsünü abükyü te ro yocho, “Nüte atbachi lieng! Abüdongba nüte lile ko nüh dee müwajüko!”
29Riwürü yusi tsünü Mary dee mükyahshangchehcho, ko abi yu tsü tukhunang pü nyemüyangcho. 30Riwürü tsünü abükyü te yocho, “Tüdrü, Mary; Tsingrangba-nü nüh dee chomangko. 31#Mat 1.21Nü fü müdeng kangnung ko dhrezarü khüdu nümüsunung, ko nühnü abi neng Jisu dsinung. 32#2 Sam 7.12, 13, 16; Isa 9.7Abi arangcheh kangnung ko abi te Amichahba Tsingrangba Tsurü pü dsinung. Abüdongba Tsingrangba-nü abi jümürü David roh-i, yangthsarü kangsohnung, 33ko abi lede nengdang Jakob tsutpu la yangthsarü kangnung; ko abi yanglih khodesü müchangkanung!”
34Mary-nü riwürü te tsü yocho, “Ih müxengcho lazarü due. Khang, hi khüta akohnung?”
35Riwürü tsünü yocho, “Anbü Amüsa nü chah ronung ko Tsingrangba zii nü chah linung. Hütsünü asuronung liba Amüsa azarüte tsü Tsingrangrü Tsurü pü dsinung. 36Nü jünilarü Elizabeth tsü lümchehng. Abükyü azarü mülinungecho, ta dee ashilarü thsanye adelü abükyü longla choo dhüroh role. 37#Lip 18.14Tunüo Tsingrangba-nü münguchichehnung tusü mühle.”
38“Ih Abüdongba kulilarü” Mary-nü yocho: “Nühnü yocho roh-i I chah hütsü tikehsohng.” Ko riwürü tsünü abükyü tenü zacho.
Mary-nü Elizabeth Xodhingcho
39Tunyah mülipü Mary-nü rungnümpü Judea azong lih la yangdi khüdu yang dhsüdhsa wücho. 40Abükyünü Zekaria-rü kuh la züdu Elizabeth te Salüm yu yocho. 41Khode Elizabeth-nü Mary salüm yu yuchicho, ami la akhunga tsünü shungchicho. Elizabeth Anbü Amüsanü jengcho 42ko yuva athsengnü yocho, “Khingkurü atümung yola nüh dee amüwatpü, ko nühnü nümüsunung liba akhunga tsü amüwa thsaang! 43I Büdongba atpanü Ih xodhingnungthsa hitoh-i I chah tuepü tikehcho? 44Tunüo nü salüm yu yuchide, I mi la akhunga tsü akünyangnü shungchiko. 45Abüdongba yusi tsü nü chah tikehnungepü yudsinung tsü nüh khütoh-i akünyangnung!”
Mary-nü Thsacho Nengse Khi
46 #
1 Sam 2.1-10
Mary-nü yocho,
“I lasihnü Abüdongba nengsere;
47I Kangchehjüba Tsingrang nengdangnü I nbü künyangre,
48 #
1 Sam 1.11
tunüo Ih apohkiba akulilatpü abinü lümchehcho!
Ade tinü nyitsarü atümungnü Ite amüwa ngulatpü pü dsinung,
49tunüo Akohbong Tsingrang-nü I nengdang nguchi arangcheh nguchicho ngang.
Abi neng Amüsa;
50Shangnü shang sürünü abi jengreng drüro
abinü arüh te chomangre.
51Abinü apu rezeh kheh müyungchücho ko amüthsehrü
atümung ko arüh rahti thsangnyangjücho.
52 #
Job 5.11; 12.19 Abinü athrungrü yangthsarüti yangthsaba pümji lanü nüchocho,
ko azikyahrü dhikehcho.
53Abinü yangkongrü atsanü jengjücho,
ko alirü khehshü tsisohcho.
54Abinü ihrü jümürü te nyengchocho yohpücho
ko abi kulirü Israelrü tronung rocho.
55 #
Lip 17.7
Abinü Abraham ko abi chahnü trahchocho atümung te
lede nengdang achomang ngunung lümkehcho!”
56Mary-nü Elizabeth te choo asango lipü kulang thalicho.
Baptijüba Johan Surocho
57Elizabeth zatbünung becho chihcho, ko dhrezarü khüdu nümüsucho. 58Kurümrüti ko tsutpurüti atümungnü Abüdongba-nü abükyü te khütoh-i tsa nguchicho hütsü yuchicho, ko arüh atümung abükyü yola künyangtacho.
59 #
Lev 12.3
Akhunga tsü nyükhih khüdu pide, arühnü abi müjüp-pehnung norocho, ko arühnü abi neng au kyo Zekaria dsijünyücho. 60Ta atpanü yocho, “Imoh! Abi neng Johan dsijünung.”
61Arühnü abükyü te yocho, “Nührü tsutpurü yola neng hi sünü dsi mühle!” 62Hütsütade arühnü au te abinüsü azaba neng tsü sü dsijünyüropü khehnü mülachi tsingdhingcho.
63Zekaria-nü athrahnung thrahva chingpü “Abi neng Johan” pü thrahcho. Arüh atümung dee nyemüyangcho! 64Hütsüde tsü Zekaria-nü thali yu chonung kohcho, ko abinü Tsingrangba neng semüsucho. 65Mükangmüshü lirü atümung adrünü jengcho, ko Judea azong lih atümunglang hiri yusinü jengcho. 66Hütsü yuchirü atümungnü hütsü nengdang lümnü tsingdhingcho, “Hiba azarü hi tu kyo kangnungo?” Tunüo Abüdongba zii abi chah lile.
Zekaria-nü Choyohcho
67Johan au Zekaria tsü Anbü Amüsanü jengcho, ko abinü Tsingrangba yusi hicho.
68“Ihsanü Israel Tsingrang, Abüdongba senung!
Abi anyitsarü tronung ko lehchehjünung rocho.
69Abinü Ihsa khyang akohba Kangchehjüba jüko,
Abi kulirü David chahnü trahchocho khüdu.
70Abinü papadenü apu Amüsa azikehrü khunü,
71Ihsa münyehrü khehlanü ko thrünyirü tase lanü
Ihsa khümchonung nyengchocho.
72Abinü Ihsa jümürüti te achomang ngusohnung ko
abi Amüsa azengtacho lümkehnung yocho.
73-74Ihsa jümürü Abraham te yuchümnü,
abinü arorüh khehlanü Ihsa khümchonung
ko tu adrü mülipü abi dikehsohnung nyengchocho,
75hütsünü Ihsa akang ayung
abi jingte müsa linung.
76 #
Mal 3.1
Itso, nüh Amichahba Tsingrangba azikehrü dsinung.
Nüh Abüdongba müngu abi nengdang
lang rungnümnung wünung,
77anyitsarü khyang arüh mülang pehjü
arüh khümchonung yonung.
78Ihsa Tsingrang tsü yanglilüm ko aküna.
Abinü akangcheh vijing avisa Ihsa chah hekehjünung,
79 #
Isa 9.2
ko ninglangnü asü nbükhüm amarürah la lirüti atümung chah vijünung,
ko atbachilang Ihsa nünung.”
80Azarü tsü zicho ko shutsa ko anbü la lümjingcho. Ko Israelrü te misha ngusohba nyümong müchihde abi lipilih la licho.
Currently Selected:
LUK 1: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
