MARK 16

Kangli Rocho

(Mat 28.1-8; Luk 24.1-12; Jhn 20.1-10)

1Sabath khupü, Mary Magdalin, Jakob atpa Mary ko Salome-rünü wü Jisu fü chah müyühnung axümlichi tuji lihcho. 2Nyükhih dikeh nyangnyü mütoh nyü chürode, arühnü konglang tsü wücho. 3Langla arüh-e arührü chotacho, “Ihsa khyang sünü kong trahtri lanü lung tsü zehpehjünung?” 4Hütsüpü arühnü dhingde lung tsü dhipehpü ngucho. 5Achotsü arühnü kong la tsü züducho, hütsüde arühnü dhrezarü khüdu jengki athru khyüpü tsalangthring püm ngucho, ko arühnü drücho.

6Abinü yocho, “Tüdrü. Nührünü khala chah hamkehba Jisu yangchirepü Ihnü müdhele. Abi hila mühle. Abi kangli roko! Dhing, arühnü abi hila yohpücho. 7#Mat 26.32; Mrk 14.28Ade wüng ko amonoti te Peter zehnü hiba yusi jüng: ‘Abi nührü müngu Galil lang wüko; abinü nührü te yocho roh-i, hütsüla nührünü abi ngunung.’ ”

8Hütsünü arühnü chüducho ko kong la tsünü wahseh ko drüseh tsicho. Ta arühnü sütesü tu müyocho, tunüo arühnü drücho.

Ahiba achangka khüdu#16.8 Jümü Vathrahcho ahi la achangkalang (arü 9-20 tashi tsü müngunung)

Mary Magdalin te Jisu Chüro Ngusohcho

(Mat 28.9-10; Jhn 20.11-18)

9Jisu kangli roba nyangnyü mütoh, akhudi abinü Mary Magdalin, sü chahnü amünyi nbü dhünyeh iipehjücho, abi te chüro ngusohcho. 10Abükyünü wü ashangrüti sürü tra meshünü licho arüh te yocho; 11ko Jisu akang lile, ko abükyünü abi ngukopü yocho arühnü yuchinye, abükyü chah arühnü yumüdsicho.

Mono Anyüh te Chüro Ngusohcho

(Luk 24.13-35)

12Hütsüpü, arüh yola nyüh anyüh yanglang wüchiyade, Jisu-nü jengreng pa lanü chüro ngusohcho. 13Arühnü thali ropü aparü te yocho, ta arühnü yu müdsicho.

Dhürekheh te Chüro Ngusohcho

(Mat 28.16-20; Luk 24.36-49; Jhn 20.19-23; R. Ngu 1.6-8)

14Achangkathsa, Jisu-nü mono dhürekheh te arüh yangtsu yade chüro ngusohcho. Abinü arüh yübücho, tunüo arüh yudsi mülicho ko abi akang li ngurüchah yudsinung hongziracho. 15#R. Ngu 1.8Abinü arüh te yocho, “Limih apümlang wüng ko amüi tsurü atümung te yuse atsa tsü thsingyung. 16Sünü yudsiro ko baptiro abi khümchonung; sünü yumüdsiro abi mülangjünung. 17Ko yudsirüti khyang thsayahiya nguchisohnung: I nengla arühnü amünyi nbüti iipehnung; yu apanü chonung; 18arühnü mürü thromüsunye, mahkhang müyüh yongnye, arüh müdhsakehnung; arühnü füdhsarü chah khehnü thahpünung ko arüh kyangnung.”

Jisu Ninglang Nükeh Tsicho

(Luk 24.50-53; Riwürü Nguchi 1.9-11)

19 # R. Ngu 1.9-11 Abüdongba Jisu-nü arüh te chotapü khanglang, abi ninglang nükeh küducho ko Tsingrangba tsalang pümsohcho. 20Monotinü wü apümlang thsingyucho ko Abüdongba-nü arüh yola nguchicho thsayahiya khunü arühnü thsingyuba tsü yuje-epü yuzi jücho.

Anyüu Ahi Achangka#16.20 Azengtacho khürü lalü 16.8 khanglang hiba yu yung akhiulangnü hita zika thrah ngunung.

[ 9Khingkurüti tsünü wü Peter ko ashangrüti te arüh te yocho roh-i yusi jücho. 10Hütsüpü, Jisu apunü amonoti khunü nyüchürolangnü nyü züdu chii Amüsa ko müchangkaba akangcheh lede liba yusi nengdang müthehcho]

Currently Selected:

MARK 16: SANGBSI

Highlight

Copy